TiMfihlakalo leteMbuliwe

Ekucaleni enkonzweni yeMnaketfu Branham kwacaca kutsi inchubo yelihlelo yakhiwa kuchubekisela embili tinhlangano tetenkholo, futsi hhayi liVangeli leliciniso. UMnaketfu Branham bekalikholwa liBhayibheli Livi ngeLivi, futsi bekangancemphetisi, ngisho noma kwakusho kubandlululwa kubalingani bakhe, bangani, noma umndeni.

Ngesikhatsi aseselilunga leliBandla leMissionary Baptisti, watjelwa kutsi agcobe bafundisi besifazane. Noko, bekayati imiBhalo yonkhe kahle kakhulu. I Thimothewu 2:12 usho ngalokucacile kutsi, “Kodvwa angimvumeli wesifazane kutsi afundzise, noma abuse etikwendvodza, kodvwa akatithulele,” naku I BaseKhorinte 14:34 kutsi, “Besifazane benu abathule emabandleni: ngoba abakavumeleki kutsi bakhulume…” Loku kwakungesilutfo lolumelene nebesifazane, kodvwa liBhayibheli lalilubeka ngembaba kulesifundvo. Ngesikhatsi umncamula jucu uniketwa, akakhonanga kuncemphetisa ngako walishiya lelibandla.

Lowo kwakungesiwo wona kuphela umBhalo lowawunganakwa ngalokuphelele ngemahlelo. INkhosi yembula liciniso lembhabhatiso kuMnaketfu Branham. Bekangayala kanjani Jesu atsi, “Ngaloko hambani, futsi nifundzise tive tonkhe, nibabhabhatise egameni leYise, neleNdvodzana, nelaMoya loNgcwele,” ube kantsi wonkhe umbhabhatiso lobhalwe eBhayibhelini wawuseGameni laJesu na? Umphostoli Phetro wayala eTentweni 2:38 kutsi phendvukani nibhabhatiswe eGameni laJesu Khristu. ImiBhalo isebenta ngebunye lobuphelele, kodvwa kwabita umprofethi kwembula lemfihlo: “Yise” akusilo ligama, “iNdvodzana” akusilo ligama, na “Moya loNgcwele” akusilo ligama. Njengendvodza yinye nje inguyise webantfwana bayo, iyindvodzana yebatali bayo, nemnakabo kuletalwa nabo, noko ligama layo ayisuye u “yise,” “indvodzana” noma u “mnakabo.” UYise, iNdvodzana, naMoya loNgcwele ticu teliGama laJesu Khristu. Matewu 28:19 neTento 2:38 kwangena ekuhlelekeni ngekucondzisa ngalokuphelele.

Ngisho nesono sasekucaleni eNsimini yase-Edeni sembulwa, hhayi njengekudla sitselo, kodvwa kuyintfo lembi kakhulu. Kwakungenta kanjani kudla lucetu lwesitselo masinyane kwembule ku-Adamu na-Eva kutsi bebangcunu na? Kalula nje akuyenti ingcondvo. Lihlanganaphi lihhabhula nebungcunu na? UMprofethi waNkulunkulu bekembula ngalokusobala lemfihlo.

Tatibobani letingelosi lokukhulunywa ngato eSambulweni sahluko 2 nese 3 na? Emagama ato angahle avakale ejwayelekile.

Babobani labagibeli bemahhashi labayimfihlakalo beSambulo sahluko 6 na? Banentfo yinye lemcoka kakhulu lebahlanganisako.

Ngabe kuyakhulunywa yini nge-United States eNcwadzini yeSambulo na?

Bobani laba labangu 144,000 labasindziswa esahlukweni 7 na?

Ngubani lengwadla lenkhulu yesahluko se 17 na? Inkhomba yayo nato tonkhe letimfihlakalo leti tembulwa eMlayetweni walomprofethi lonemandla lotfunywe avela kuNkulunkulu.

Akusiko kuphela kutsi imimangaliso lengenakubalwa yalandzela lendvodza, kodvwa timfihlakalo letifihlwe eBhayibhelini iminyakanyaka nato futsi tembulwa enkonzweni yakhe. Kwacaca kutsi lomprofethi wagcwalisa leminye imiBhalo leminengi kunaMalakhi 4.

Sambulo 10:7: Kepha ngetinsuku teliphimbo lengelosi yesikhombisa, lapho seyitobetsa, imfihlakalo yaNkulunkulu itawube seyifeziwe, njengaloko atatisa tinceku takhe baprofethi.

LiPhimbo limemeta emhlabeni kutsi kuphunywe emahlelweni futsi kubuyelwe eVini laNkulunkulu lasekucaleni. Ngamunye wetfu unelitfuba lelifanako lelo Phetro, Jakobe, naJohane bebanalo. Sinelitfuba lekutsi sibalwe nalabayingcosana labakhetsiwe baNkulunkulu labangayukhotsama etinhlanganweni tetenkholo telusuku.

UmBhalo loNgcwele ucopha timphilo nemisebenti yemadvodza lahamba naNkulunkulu futsi bekagcotjwe kakhulu ngaMoya waKhe kutsi amemetela ISHO KANJE INKHOSI, nemavi awo aciniswa tibonakaliso netimanga letingenakuphosisa. Bekabaprofethi baNkulunkulu, neliPhimbo laNkulunkulu esitukulwaneni sawo.

Ngabe tikhatsi tehlukile yini manje kunaloko betingiko ngesikhatsi Jesu alapha na? Kwakubaholi betenkholo labaMbetsela. Bafundzi bebalidlanzana lelincane emkhatsini wenchubo lenkhulukati yetenkholo. Bebabandlululwa, bahhalatiswa, futsi ekugcineni babulawe ngekuma bamelane nemgudvu lomkhulu wenchubo yebuhlelo. Singahle singabulawelwa inkholelo yetfu namuhla, kodvwa sihlushwa impela. NjengebaFarisi nebaSadusi, bangeke bayiphike imimangaliso leyalandzela inkonzo yeMnaketfu Branham ngako basebentisa lokunye kuhlasela. Ungahle uve kutsi bekangumprofethi wemanga, umholi wenkholoze, noma lokubi kakhulu. Ecinisweni, bekayindvodza letfobile yaNkulunkulu leyema yagcila imelene nekulawula kwekungayekeli emahlelo netinkholoze letinako etikwebantfu baNkulunkulu. Bahlasela Jesu ngendlela lefanako ngesikhatsi Amelana nemibhedesho yabo nemasiko.

Nkulunkulu wakuhlonipha kuvuma kweMnaketfu Branham kukholwa lonkhe Livi eBhayibhelini, futsi Usebentisa inkonzo yakhe kuholela tigidzi temiphefumulo kuJesu Khristu. Namuhla, liPhimbo leNgelosi yesiKhombisa livakala kakhulu njengoba beLisolo linjalo. Cishe bantfu labatigidzi letimbili umhlaba-jikelele bayawukholwa uMlayeto weMnaketfu Branham. Leli kungahle kube lidlanzana lelincane laletigidzigidzikati letimbili letitisho buKhristu, kodvwa kunini lapho bantfu baNkulunkulu bebangesilo khona lidlanzana na?

Sinaletingetulu kwe 1,200 tinshumayelo leticoshiwe leticuketse leliPhimbo lelaprofethwa kutsi lifike eSambulweni 10:7. Ngayinye yaletinshumayelo leti ivula sikhiya setimfihlakalo letinye letinengi taNkulunkulu. LeloPhimbo likhona kuwe uma uvuma kuLiva.

Akukho ngisho sinye sikhashana lapho ngiletsa khona umlayeto kubantfu kute bangilandzele, noma bajoyine libandla lami, noma ngicale kuhlanganyela lokutsite nenhlangano. Angikaze ngikwente loko futsi angeke ngikwente loko manje. Anginanshisekelo ngaletotintfo, kodvwa nginenshisekelo etintfweni taNkulunkulu nebantfu, futsi uma ngingafeza intfo yinye nje ngitaweneliseka. Leyontfo yinye kubona kwakheke buhlobo beliciniso bakamoya emkhatsini waNkulunkulu nebantfu, lapho khona bantfu baba tidalwa letinsha kuKhristu, letigcwaliswe ngaMoya waKhe futsi baphile ngekweLivi laKhe. Ngitotsandza kumema, ngincuse futsi ngecwayise wonkhe wonkhe kutsi eve liphimbo laKhe kulesikhatsi lesi, futsi ninikele timphilo tenu ngalokuphelele kuYe, njengoba ngisho ngiyetsemba enhlitiyweni yami kutsi nginikele konkhe kwami kuYe. Nkulunkulu anibusise, futsi kwangatsi kuta kwaKhe kungatfokotisa inhlitiyo yenu.

Mfund. William Marrion Branham