EBhayibelini, Nkulunkulu sonkhe sikhatsi bekaletsa uMlayeto waKhe kubantfu belive ngemprofethi wemnyaka. Wakhuluma kuMosi ngesihlahla lesivutsako wase umnika kutfunywa kutsi ahole emaHebheru aphume eGibhithe. INsika yeMlilo lebonakalako naletinye tibonakaliso kwaniketelwa kutsi kucinisekise inkonzo yakhe. Johane umBhabhatisi waletsa uMlayeto alungiselela live ngekufika kwaMesiya. Asabhabhatisa iNkhosi Jesu eMfuleni iJordani, liPhimbo lelivela eZulwini lacinisa kutfunywa kwaJohane kutsi etfule liWundlu laNkulunkulu, “Lena yiNdvodzana yami letsandzekako, leNgitfokotile ngayo.” Iminyaka kamuva, liPhimbo leNkhosi laphindze levakala likhuluma kumprofethi ngesikhatsi Akhuluma naPawula ngekuKhanya lokuphumphutsekisanako, futsi kamuva yamnika kutfunywa kubeka emabandla ngekwenchubo. Kuwo onkhe lamaThestamenti leLisha naleliDzala, Nkulunkulu akaze akhulume kubantfu baKhe ngenchubo yebuhlelo noma inhlangano yetenkholo. Bekahlala njalo akhuluma kubantfu ngendvodza yinye: umprofethi waKhe. Futsi Wacinisekisa labaprofethi laba ngetibonakaliso letingetulu kwemvelo.
Kodvwa kutsiwani ke nganamuhla na? Ngabe Nkulunkulu usalembula yini Livi laKhe kubaprofethi na? Tisekhona yini tibonakaliso letingetulu kwemvelo na? Nkulunkulu bekangamtfumela yini umprofethi welusuku-lwamanje eveni na? Impendvulo ingulecinisekisa kakhulu impela, “Yebo!”
Kodvwa sitawukwati kanjani uma umprofethi avuka na? Uyobukeka njani na? Uyokwenta kanjani na? Sibonakaliso sini layosinika sona na? MiBhalo mini layoyigcwalisa na?
Baprofethi basendvulo bebangemadvodza aNkulunkulu langemachawe, futsi bekangesabi kumelana netinhlangano tetenkholo. Empeleni, bebacishe impela bahlala njalo betfukwa bafundisi betenkholo. Eliya watiphonsela insayeya tinhlangano tetenkholo ngelusuku lwakhe, ababuta kutsi Nkulunkulu bekatowuhlonipha umnikelo wabo, noma wakhe. Bamemeta. Baprofetha. Bagcumela ngetulu kwe-altari. Batisika ngemikhwa. Kodvwa Nkulunkulu akabevanga. Eliya wabuka etulu eZulwini wase utsi, “Akwateke namuhla kutsi wena unguNkulunkulu ka-Israyeli, nekutsi mine ngiyinceku yakho, nekutsi ngente tonkhe letintfo leti ngelivi lakho.” Wase-ke ubita umlilo kutsi wehle uvela eZulwini kutsi ucotfule umnikelo. Mikhaya umprofethi wamelana neNkhosi yaka-Israyeli, nebuphristi bonkhe, ngesikhatsi ekhuta umPhristi loMkhulu Zedekhiya ngekuprofetha emanga. LomPhristi loMkhulu wambhamula ebusweni neNkhosi yamfaka ejele ngenca yekukhuluma liciniso. Ngisho neNkhosi Jesu bekatondvwa kakhulu tinhlangano tetenkholo tangelusuku lwaKhe bate baMbetsela kanye netigebengu letimbi kakhulu kunato tonkhe. Uma umlandvo uphetse liciniso, umprofethi utotondvwa yinchubo yebuhlelo yesimanje, futsi uyotsatfwa ngekutsi ungulokholwa lokuphambene nekukholwa lokungiko, umprofethi wemanga, noma lokubi kunaloko. Kodvwa Nkulunkulu uyokuma nenceku yaKhe.
Kube bekunemprofethi kulolusuku lwamanje, bekatokwemukelwa kanjani liBandla laseKhatolika na? LiBandla leBaptisti na? LiBandla lemaLuthela na? Noma nguliphi lihlelo na?
INkhosi Jesu yatfuma bonkhe labaMkholwako: “Naletibonakaliso leti titobalandzela labo labakholwako; Ngeligama lami batokhipha emadimoni; batokhuluma ngetilimi letinsha; Batophatsa tinyoka; futsi uma banatsa lokubulalako, kungeke kubenengoti kubo; batobeka tandla etikwalabagulako, futsi batosindza.” (Makho 16:17-18). Ngabe lomBhalo ucinisile namuhla na? Uma ungakacinisi, aphelelwa nini sikhatsi emaVi eNkhosi na? Kulo lonkhe liBhayibheli, baprofethi bebakhona kuphilisa labagulako, bakhiphe emadimoni, futsi bente imimangaliso. Mosi wabeka inyoka yelitfusi embikwebantfu baka-Israyeli kubaphilisa ekulunyweni tinyoka letinesihlungu (Numeri 21:9). Namani, umSiriya lonemandla, weta ku-Elisha kutsi aphiliswe bulephelo (II EmaKhosi 5:9). Ngesikhatsi insizwa iwela ekufeni kwayo isuka efasitelweni lelisetulu, umphostoli Pawula wayigona wase ubuyisela kuphila emtimbeni losewufile (Tento 20:10). Sinalokucoshiwe kuphela kweminyaka lecishe ibe 3½ yemphilo yeNkhosi yetfu Jesu, kodvwa ekhatsi naleyominyaka lembalwa, Wachubeka njalo aphilisa labagulako. Timphumphutse tentiwa tabona. Labanebulephelo baphiliswa. Tihhulu tatfola kuva kwato. Tinyonga tahamba. Lonkhe luhlobo lwesifo lwaphiliswa (Mat 4:23).
Nkulunkulu futsi wacinisekisa baprofethi bakhe ngaletinye tindlela ngaphandle kwekuphilisa. Ngisho netimfihlo letatigadvwe kakhulu tenhlitiyo tentiwa tatiwa kulamadvodza aNkulunkulu. INkhosi Nebukhadinezari bekaneliphupho lelikhatsatako, kodvwa bekangakhoni kukhumbula kutsi lalimayelana nani. Umprofethi Danyela wayitjela inkhosi kokubili leliphupho nesiprofetho lesalandzela (Dan 2:28). Akukho lutfo lolwalufihlakele kuSolomoni ngesikhatsi iNdlovukazi yaseSheba ifika embikwakhe. Bekagcwaliswe kakhulu ngaMoya kangangekutsi wayitjela imibuto yenhlitiyo yayo ngaphambi kwekutsi iyibute (I EmaKhosi 10:3). Elisha watjela iNkhosi yaka-Israyeli onkhe emachinga eNkhosi yaseSiriya, ngisho nemavi angansense lakhulunywa ekamelweni layo lekulala (II EmaKhosi 6:12).
Ngeminyakato yaYo lucobo, iNkhosi Jesu kanengi yakhombisa kutsi loMoya wekubona lokufihlakele unguMoya waKhristu. Wabona imvelo lefihlakele yaNathanayeli ngesikhatsi Atsi, “Bukani umIsrayeli lucobo, lokungekho nkhohliso kuye!” Futsi Jesu wachubeka nekutjela Nathanayeli kutsi bekakuphi ngesikhatsi Filiphu amtjela ngaMesiya (Johane 1:48). Ngesikhatsi Nathanayeli abona kutsi Jesu bekayati inhlitiyo yakhe, masinyane waMcondza njengaKhristu. Kwekucala Jesu abona Phetro, Wamtjela ligama leyise, Jona (Johane 1:42). Phetro-ke washiya konkhe wase ulandzela Jesu tonkhe tinsuku tekuphila kwakhe. Jesu wahlangana newesifazane waseSamariya emtfonjeni wase umtjela tono takhe letendlulile. Emavi akhe ekucala abakutsi, “Mnumzane, ngiyabona kutsi ungumprofethi wena” (Johane 4:19). Bonkhe bobatsatfu balabantfu laba bebavela emikhakheni leyehlukene yemphilo, noko masinyane bamcondza Jesu ngesikhatsi Abakhombisa siphiwo sekubona lokufihlekele.
Ngabe lesiphiwo lesi sanyamalala ngesikhatsi likhasi lekugcina leliBhayibhli libhalwa na? Uma lemimangaliso lena ibhalwe ngalokusobala kakhulu eBhayibhelini, iphi kepha namuhla na? Umprofethi welusuku lwesimanje uyocinisekiswa impela yimimangaliso.
Ngabe Nkulunkulu sewubakhohliwe bantfu baKhe na? Ngabe Usakhona kuphilisa labagulako na? Ngabe Usakhuluma natsi ngebaprofethi baKhe na? Ngabe noma ngumuphi webaprofethi ulubona ngaphambili lolusuku lolu na?
Ngabe tikhona yini tiprofetho letisatogcwaliseka na?