Bumnyama babuya ngekwandza egunjini lesibhedlela, kwangatsi kwakusemahlatsini lamakhulu. Ngangiwuva umoya uvunguta emacembeni, noko kwakubonakala kuyindlela lenkhulu lephambukela ehlatsini. Mhlawumbe nike nakuva kuphafuka kwemoya uvungutisa emacembe, usolo usondzela futsi usondzela kuwe. Ngacabanga, “Yebo-ke, loku kufa kutongitsatsa.” O! umphefumulo wami wawutodibana naNkulunkulu, ngatama kukhuleka kodvwa angikhonanga.
Waya ngekusondzela lomoya, kuya ngekuvakala kakhulu kakhulu. Emacabunga awahlatela futsi kwaba kanye nje, ngangingasekho.
Kwabonakala-ke kwangatsi ngase ngibuyile futsi sengingumfanyana longakagwabeli, ngime kuleyondledlana phansi kwesihlahla lesifanako. Ngaliva leloPhimbo lelifanako lelatsi, “Ungalokotsi unatse noma ubheme.” Nemacembe lengaweva bekangulafanako nalalavunguta kulesosihlahla ngalolosuku.
Kodvwa kulesikhatsi lesi leliPhimbo latsi, “Ngakubita futsi wangahambi.” Laphindza katsatfu.
Ngase-ke ngitsi, “Nkhosi, uma lowo kunguWe, ngivumele ngibuyele emuva futsi emhlabeni futsi ngitolishumayela liVangeli laKho kusukela eticongweni tetindlu nasemakoneni etitaladi. Ngitotjela wonkh’umuntfu ngalo!”
Ngesikhatsi lombono sewendlulile, ngatfola kutsi ngangingakaze ngive buncono. Dokotela wami lohlinzako bekasolo akulesakhiwo. Wefika wase uyangibuka futsi wamangala. Wabuka kwangatsi bekacabanga kutsi ngase ngifile, wase utsi ke, “Angisiyo indvodza lesontsako, umsebenti wami mkhulu kakhulu, kodvwa ngiyati kutsi Nkulunkulu umvakashele lomfana.” Kutsi wakusho lani loko, angati. Kute ngisho munye lobekashito lutfo ngako. Kube ngangikadze ngati ngalesosikhatsi kunaloko lesengikwati manje, ngangiyovuka kulowombhedze ngimemeta iNdvumiso eGameni laKhe.
Emva kwetinsuku letimbalwa ngavunyelwa kubuyela ekhaya kodvwa ngangisasolo ngigula futsi ngaphoceleleka kutsi ngifake tibuko emehlweni ami ngenca yekungabonakali kahle. Inhloko yami yayichachatela uma ngibuke noma yini kwesikhashana.
Ngacala kuphuma kutsi ngifune futsi ngitfole Nkulunkulu. Ngangihamba ngisuka ebandleni ngiye ebandleni, ngitama kutfola indzawo letsite lapho kwakukhona khona kubitela e-altari lokuyifashini lendzala. Incenye ledzabukisako kutsi ngangingatfoli ngisho nayinye.
Ngatsi uma ngake ngaba ngumKhristu, ngiyoba nguye mbamba. Umfundisi lowangiva ngiphawula watsi, “Manje mfana Billy, uphambukela ekuhlanyeni.” Ngatsi uma ngike ngatfola inkholo, ngangifuna kuyiva uma seyifikile, njengoba nje bafundzi benta.
O alidvunyiswe liGama laKhe. Ngatfola inkholo kamuva futsi ngisasolo nginayo, nangelusito lwaKhe, ngiyoyigcina njalo.
Ngalobunye busuku ngamlambela kakhulu Nkulunkulu nesentakalo sibili kutsi ngaphumela ehhokweni lelidzala ngemuva kwendlu ngase ngitama kukhuleka. Ngangingati kutsi kukhulekwa kanjani ngako nje ngacala kukhuluma naYe njengoba ngangingakhuluma nanoma ngubani lomunye. Ngalesosikhatsi nje nako kufika kuKhanya ehhokweni futsi kwenta siphambano neliPhimbo lelivela kulesiphambano lakhuluma kimi ngelulwimi lebengingalucondzi. Lase liyesuka-ke liyahamba. Ngamangala. Nasengisangulukile futsi ngakhuleka, “Nkhosi uma lowo kunguWe, ngisite wota futsi ukhulume nami njalo.” Ngangikadze ngifundza liBhayibheli lami kusukela ngibesekhaya ngibuya esibhedlela futsi ngangikadze ngifundze I Johane 4, “Batsandzekako, maningakholwa ngibo bonkhe bomoya, kodvwa bavivinyeni kutsi babaNkulunkulu yini.”
Ngangati kutsi umoya wawubonakele kimi futsi lapho ngikhuleka wabonakala futsi. Kwase-ke kubonakala kimi kutsi kwangatsi kwakukadze kunemaphawondi layinkhulungwane lesuswa emphefumulweni wami. Ngagcuma ngaya etulu ngase ngigijmela endlini futsi kwabonakala kwangatsi ngangihamba emoyeni.
Make wabuta, “Bill, kwentekeni kuwe na?” Ngaphendvula, “Angati kodvwa impela ngitiva ngikahle futsi ngilula.” Angibange ngisahlala endlini sikhatsi lesidze. Ngadzingeka kutsi ngiphume futsi ngigijime.
Ngati-ke kutsi uma Nkulunkulu bekafuna ngishumayele, Bekatongiphilisa. Ngako ngaya ebandleni lelalikholelwa ekugcobeni ngemafutsa futsi ngaphiliswa masinyane. Ngabona-ke kutsi bafundzi bebanentfo linengi lebafundisi labangenayo namuhla. Bafundzi babhabhatiswa ngaMoya loNgcwele futsi kanjalo bebakhona kuphilisa labagulako nekwenta imimangaliso lemikhulu ngeliGama laKhe. Ngako ngacala kukhulekela umbhabhatiso waMoya loNgcwele futsi ngamtfola.
Ngalelinye lilanga cishe tinyanga letisitfupha kamuva, Nkulunkulu wangipha sifiso senhlitiyo yami. Wakhuluma kimi asekuKhanyeni lokukhulu, angitjela kutsi ngihambe ngiyoshumayela nekukhulekela labagulako futsi Bekabaphilisa kungakhatsaleki kutsi sifo sini lebebanaso. Ngacala kushumayela futsi ngenta Langitjela kutsi ngikwente. O mngani, ngingeke ngicale kukutjela kutsi konkhe kwentekeni: Emehlo laphumphutsekile avuleka. Tinyonga tahamba. Imidlavuza iphilisiwe, nato tonkhe tinhlobo temimangaliso tentiwe.
Ngalelinye lilanga entasi kweSpring Street, eJeffersonville, eIndiana, emvakwemvuselelo yemaviki lamabili, ngangibhabhatisa bantfu labali 130. Kwakulusuku lweNgci lolushisako futsi kwakunebantfu labacishe babe ti 3,000 lebebakhona. Ngase ngitobhabhatisa umuntfu we 17 ngesikhatsi khona ngalesosikhatsi nje ngiva lelo lelihoshotako, liPhimbo lelincane futsi latsi, “Buka etulu.” Sibhakabhaka sasinjengelitfusi ngalolosuku lweNgci lolushisako. Sasingakaze sibenemvula cishe emaviki lamatsatfu. Ngaphindze ngaliva leliPhimbo futsi, kwase kutsi-ke futsi kwesitsatfu latsi “Buka etulu.”
Ngabuka etulu futsi nako kuta esibhakabhakeni inkhanyeti lenkhulu lekhatimulako, lengangiyibonile tikhatsi letinengi ngaphambilini kodvwa kutsi ngangingakanitjeli ngayo. Tikhatsi letinengi ngibatjelile bantfu ngayo ibonakala futsi kuphela bebahleka futsi batsi, “Bill, uyakucabanga nje loko. Noma mhlawumbe bewuphupha.” Kodvwa akadvunyiswe Nkulunkulu, ngalesikhatsi lesi Yayitibonakalise Yona lucobo ebaleni kubo bonkhe, ngoba yeta yasondzela kakhulu kimi kangangoba angikhonanga ngisho nekukhuluma. Emvakwekuba imizuzwana lembalwa seyendlulile ngamemeta nebantfu labanengi babuka etulu futsi babona lenkhanyeti ingetulu kwami nje. Labanye baculeka ngesikhatsi labanye bamemeta nalabanye babaleka. Khona-ke lenkhanyeti yabuyela emuva esibhakabhakeni nalendzawo lapho yayisuke khona yayitsi ayibe sikwele lesingemafidi lalishumi nesihlanu nalendzawo yayisolo ichubeka futsi ishaya situngeletane noma kwangatsi emagagasi bekagicika. Kwakubumbeke kulendzawo lifu lelimhlophe lelincane nenkhanyeti yemukelwa etulu kulelifu lelincane.