Kuta lusuku lapho ngamunye wetfu, noma ngabe ngumKhristu noma ngulokunye, loyotfola khona ngco kutsi yini lengesheya kwelikhethini lesikhatsi. LiBhayibheli letsembisa kuPhila lokuPhakadze kulabanye, futsi kulabanye, letsembisa kulahlwa. Sonkhe sidalwa lesingumuntfu emlandvweni wonkhe besitibuta impela, “Kuyokwentekani kimi uma sengifa na?”
Kadzeni ngaphambi kwekutsi kuke kubekhona liBhayibheli kutsi lifundvwe, umprofethi Jobe wabuka imvelo. Wakhuluma ngelitsemba lesihlahla, kutsi sasijutjwa kanjani bese siyafa, kantsi ngeliphunga lemanti, uyahluma uphile bese ukhipha emahlumela lamasha. Jobe bekati kutsi umuntfu, njengesihlahla, bekayobuye futsi avukele ekuphileni:
Uma umuntfu afa, uyobuye aphile yini futsi? bengiyolindza tonkhe tinsuku tami lengibekelwe tona, kute kufike kuguculwa kwami.
Wena utongibita, mine ngikuphendvule; wena bewuyoba nekulangatelela umsebenti wetandla takho.
Ngoba manje ubala tinyatselo tami: ungacapheli sono sami na? (Jobe 14:14-16)
Jobe mhlawumbe bekete liBhayibheli kulifundza, kodvwa bekati kutsi Nkulunkulu ngalelinye lilanga uyomvusa ethuneni lapho uMhlengi webantfu eta khona.
O kwangatsi emavi ami manje angabhalwa! o kwangatsi angabhalwa encwadzini!
Acoshwe edvwaleni nge-pheni yensimbi nangemtfofi edvwaleni kute kube phakadze.
Ngoba mine ngiyati kutsi umhlengi wami ukhona, nekutsi uyokuma ngelusuku lwekugcina etikwemhlaba:
Futsi noma nje tibungu tesikhumba sami tibhubhisa lomtimba, noko enyameni yami ngitombona Nkulunkulu: (Jobe 19:23-26)
Lomprofethi bekakhuluma ngeNkhosi Jesu nekuvuka kwebantfu baKhe. Ngesambulo Jobe wati kutsi noma nje imitimba yetfu ingahle ibune iphele nya, Jesu uyobuyisela inyama yetfu. Nangemehlo etfu lucobo, siyokubona kuBuya kwaKhe. Bonkhe bantfu baNkulunkulu balangatelela kubona lolosuku lwenkhatimulo.
Kepha noko, njengalokuciniseke impela nje kutsi Nkulunkulu ukhona, ukhona futsi nadeveli; futsi njengalokuciniseke impela nje kutsi likhona liZulu, sikhona futsi nesihogo. Imivuzo lephakeme kunaloko bebangakucabanga nje. UMphostoli Pawula wakusho kutsi, Liso alikakuboni, nendlebe ayikakuva, kanjalo futsi akungeni enhlitiyweni yemuntfu, letintfo Nkulunkulu latilungisele labo labamtsandzako. (I Khor. 2:9)
Imicondvo yetfu ingeke ikucondzisise kutsi liZulu liyoba likhulu kanjani, futsi kanjalo ingeke ikucondzisise kwesabeka lokukhulu kwesihogo. Jesu wasitjela kutsi sihogo sibi kakhulu kutsi bekungabancono uma besingajuba sitfo semtimba wetfu kunekutifaka engotini yekuya kuleyondzawo leyesabekako.
Futsi uma sandla sakho sikukhubekisa, sijube: kuncono kuwe kutsi ungene ekuphileni uyingini, kunekutsi ubenetandla totimbili uye esihogweni, emlilweni longayucinywa: (Makho 9:43)
Ngako ngubani lotoya eZulwini na? Futsi ngubani lotoya esihogweni na? Kungumcabango lodzabukisako, kodvwa Jesu watsi linengi lebantfu aliyuwemukela umvuzo Latsandzako kuwuniketa: Ngenani ngelisango lelincane: ngoba lisango libanti, nendlela yinkhulu, leholela ekubhujisweni, futsi banengi labangena khona: Ngoba lisango lincane, nendlela yincane, leholela ekuphileni, futsi bayingcosana labatoyitfola. (Math. 7:13-14)
Jesu futsi watsi, "Akusibo bonkhe labashoko kimi kutsi, Nkhosi, Nkhosi, labayongena embusweni welizulu; kuphela lowenta intsandvo yaBabe wami losezulwini. Labanengi bayotsi kimi ngalolosuku, Nkhosi, Nkhosi, asiprofethanga yini ngeligama lakho na? nangeligama lakho sakhipha emadimoni na? nangeligama lakho senta imisebenti leminengi yemandla na? Futsi ke ngiyosho kubo kutsi, Angizange nginati: sukani kimi, nine benti balokubi." (Math. 7:21-23)
Ngenca nje yekutsi umuntfu utisho kutsi ungumKhristu akuchazi kona kutsi usindzisiwe. Ngako, lona ngumbuto losebaleni emicondvweni yetfu: Ngikwemukela kanjani kuPhila lokuPhakadze na? Jesu wasinika imphendvulo lelula kakhulu: Ngicinisile, ngicinisile, Ngitsi kini, Loyo lova livi lami, futsi akholwe ngulongitfumile, unekuphila lokungunaphakadze, futsi akayukuya ekulahlweni; kepha wendlulile ekufeni wangena ekuphileni. (Johane 5:24)
Ngenhlanhla lembi, kunebantfu labambalwa kakhulu emhlabeni namuhla labatsandzako kutsatsa sikhatsi etinsukwini tabo letimatasatasa kutsi beve Livi laNkulunkulu. Futsi kukhona ngisho labambalwa labatolikholwa Livi uma bake baliva.
Emabandla asitjela kutsi sibe ngumuntfu lolungile, sicabange ngalokungiko, singacambi emanga, sikhohlise, noma sebe, futsi sitobese siya eZulwini. Awacondzi kutsi sihogo siyogcwala bantfu lababonakala baphila timphilo letilungile. Intfo lekhona impela kutsi singeke siye eZulwini ngenca yemisebenti yetfu lelungile noma ngoba sililunga lelibandla lelitsite. Yinye kuphela indlela leya ekuPhileni lokuPhakadze, naleyo ingaJesu Khristu. Wasiyala kutsi sifanele SIKHOLWE Livi laKhe, leliliBhayibheli. Nakungenjalo, besingasindziswa kanjani na?
Uma lusuku lekwahlulelwa selukufikela, ngabe uyokuva yini kutsi, “Wotani, nine lenibusisiwe nguBabe wami, nidle lifa lembuso leniwulungiselelwe kusukela kwasekelwa umhlaba,” (Math. 25:34) noma uyova, “Sukani kimi, nine labacalekisiwe, niye emlilweni longunaphakadze, lolungiselwe develi netingelosi takhe”? (Math. 25:41)
Njengoba emehlo akho afundza kulamagama, unekutikhetsela lofanele ukwente: Ungakhetsa yini kukholwa Livi laNkulunkulu na?
Utolicitselaphi liphakadze na?
Imibhalo
Jobe 14:12-16
Kanjalo umuntfu ulala phansi, angabe asavuka: ate angabikho emazulu, abayuvuka, abayuphaphanyiswa ebutfongweni babo.
O kwangatsi ungangifihla ethuneni, kutsi ungigcine ekusitsekeni, kute kwendlule intfukutselo yakho, kutsi wena ungincumele sikhatsi, futsi ungikhumbule!
Uma umuntfu afa, uyobuye aphile yini? bengiyolindza tonkhe tinsuku tami lengibekelwe tona, kute kufike kuguculwa kwami.
Wena utongibita, mine ngikuphendvule; wena bewuyoba nekulangatelela umsebenti wetandla takho.
Ngoba manje ubala tinyatselo tami: ngabe wena awucapheli sono sami?
Jobe 19:23-26
O kwangatsi emavi ami manje angabhalwa! o kwangatsi angabhalwa encwadzini!
Acoshwe edvwaleni nge-pheni yensimbi nangemtfofi edvwaleni kute kube phakadze.
Ngoba mine ngiyati kutsi umhlengi wami uyaphila, nekutsi uyokuma ngelusuku lwekugcina etikwemhlaba:
Futsi noma nje tibungu tesikhumba sami tibhubhisa lomtimba, noko enyameni yami ngitombona Nkulunkulu:
Matewu 7:21-23
Akusibo bonkhe labashoko kimi kutsi, Nkhosi, Nkhosi, labayongena embusweni welizulu; kuphela lowenta intsandvo yaBabe wami losezulwini.
Labanengi bayotsi kimi ngalolosuku, Nkhosi, Nkhosi, asiprofethanga yini ngeligama lakho na? nangeligama lakho sakhipha emadimoni na? nangeligama lakho senta imisebenti leminengi lemihle na?
Futsi ke ngiyosho kubo kutsi, Angizange nginati: sukani kimi, nine benti balokubi.
Matewu 22:14
Ngoba banengi lababitiwe, kepha bayingcosana labakhetsiwe.
Johane 3:16-17
Ngoba Nkulunkulu walitsandza live kangaka, wate wanikela ngeNdvodzana yakhe letelwe yodvwa, kutsi ngulowo nalowo lokholwa ngiyo angabhubhi, kodvwa abenekuphila lokungunaphakadze.
Ngoba Nkulunkulu akayitfumanga iNdvodzana yakhe emhlabeni kutsi yehlulele umhlaba; kodvwa kutsi umhlaba usindziswe ngayo.
Johane 5:24
Ngicinisile, ngicinisile, Ngitsi kini, Loyo lova livi lami, futsi akholwe ngulongitfumile, unekuphila lokungunaphakadze, futsi akayukuya ekulahlweni; kepha wendlulile ekufeni wangena ekuphileni.
I BaseKhorinte 2:9
Kepha njengokuba kubhaliwe kutsi, Liso alikakuboni, nendlebe ayikakuva, kanjalo futsi akukangeni enhlitiyweni yemuntfu, letintfo Nkulunkulu latilungisele labo labamtsandzako.
I BaseThesalonikha 4:13-18
Kepha angitsandzi kutsi nibe ngulabangati, bazalwane, mayelana nalabo labalele, kute ningadzabuki, ngisho njengalabanye labangenalo litsemba.
Ngoba uma sikholwa kutsi Jesu wafa wabuye wavuka, ngalokunjalo ke Nkulunkulu uyobaletsa nalabalele kanye naJesu.
Ngoba loku sikusho kini ngelivi leNkhosi, kutsi tsine lesisekhona sisasele kute kubesekubuyeni kweNkhosi asinawubendvulela labo labalele.
Ngoba iNkhosi lucobo iyokwehla ezulwini ngelivi lenhlokomo, ngeliphimbo lengelosi lenkhulu, nangelicilongo laNkulunkulu: nalabafele kuKhristu bayovuka kucala:
Khona ke tsine lesisekhona sisasele siyohlwitfwa kanye nabo emafini, kutsi sihlangabete iNkhosi emoyeni: futsi kanjalo ke siyobanayo iNkhosi njalonjalo.
Ngako-ke dvudvutanani ngalamavi.