“Ngesikhatsi ngitalwa endlwaneni lencane yetingodvo yaseKentucky enhla lapho, iNgelosi yeNkhosi yangena efasitelweni yase ima lapho. KwakuneNsika yeMlilo.”
Kusa kwase kucala nje kubhoboza bumnyama besibhakabhaka lesipholile saMabasa. Lelilodvwa vo, lifasitelo lelukhuni laliphakanyiswa livuleke kuvulela kukhanya kwasekuseni kungene endlwaneni lencane yetingodvo lenelikamelo-linye. Inyoni irobini ime edvute nelifasitelo yayibonakala ikakhulukati ijabule kakhulu kulokusa futsi yayikhala ngawo onkhe emaphaphu ayo. Ngekhatsi kwendlwana yetingodvo, Charles Branham lobekasemusha bekafake tandla takhe ku-ovaloli yakhe lensha sha wase ubuka phansi umkakhe loneminyaka le 15 budzala. “Sitometsa ligama lelitsi nguWilliam,” kwasho babe.
Ngekhatsi kwelifasitelo kwefika kuKhanya lokungetulu kwemvelo. KuKhanya kwadzabula ekamelweni kwase kwengama etikwembhedze lapho luswane lwalusandza kutalwa khona nje. Loku kwakukuKhanya lokufanako lokwakhipha bantfwana bemaHebheru eGibhithe. KwakukuKhanya lokufanako lokwahlangana naPawula asendleleni yakhe lebuke eDamaseku. Futsi Kwakuyochubeka kutsi kuhole loluswane loluncane kubita uMlobokati waKhristu aphume emhlabeni. Loko kuKhanya kwakungesiko lokunye ngaphandle kweNgelosi yeNkhosi, iNsika yeMlilo; futsi Yaseyiphindze yabonakala kumuntfu.
Futsi ekhatsi lapho, kulendlwana lencane leyakhiwe ngetingodvo, ngaloko kusa ngaMabasa 6, umbelekisi wavula lifasitelo kute kukhanya kutokhanya ngekhatsi kwentela Mama naBaba babone kutsi nganginjani. Kwase-ke kuKhanya lokucishe kube yisayizi yemcamelo kweta kuvunguta kungena ngelifasitelo. Kwashaya indingilizi ngalapho bengikhona khona, kwase kwehlela embhedzeni. Labanengana bebantfu basentsabeni bebeme lapho. Bebakhala.
Likhaya leliphuyile lalisemagcumeni aseningizimu Kentucky, edvute nelidolobhana lelincane laseBurkesville. Lolusuku kwakungu Mabasa 6, 1909. Loluswane lwalulwekucala kubantfwana labalishumi lebebatotalwa nguCharles na Ella Branham.
Akubanga sikhatsi lesidze ngaphambi kwekutsi iNgelosi yeNkhosi ivakashele William Branham futsi.
Asengumntfwana, iNgelosi kucala yakhuluma naye, itsi uyophila imphilo yakhe edvute nelidolobha lelitsiwa yiNew Albany. Waya endlini wase utjela unina lokwakusandza kwenteka nje. Njenganoma ngumuphi make, akacabanganga kangako ngalendzaba wase umlalisa embhedzeni kuthulisa imizwa yakhe lemincane. Eminyakeni lemibili kamuva, umndeni wakhe watfutsela eJeffersonville eIndiana, emamayela lambalwa nje kusuka eningizimu Indiana lidolobha laseNew Albany.
INgelosi futsi yakhuluma kulomprofethi lomncane eminyakeni lembalwa kamuva. Kwakulusuku lweNyoni loluthulile nelilanga lelifutfumele likhanya lidzabula emacembeni lamibalabala asekwindla. Lomfanyana bekachuta lapho aphetse emabhakede lamabili emanti entasi emzileni. Sinyani semmbila sasiboshelwe ngaphansi kwelutwane lwakhe lobelulimele kulugcina lungangcoli. Wahlala phansi kutsi aphumule emtfuntini wesihlahla lesidze sem-phophula. Tinyembeti tatigeleta emehlweni akhe lapho akhala ngebhadi yakhe: Bangani bakhe bebatijabulela emgodzini wekudweba wendzawo, futsi yena bekabambekile atfutsela uyise emanti. Masinyane nje, umoya wacala kuhhusha esihlahleni ngetulu kwakhe. Wesula emehlo akhe wase uma ngetinyawo takhe. Weva umsindvo wemacembe avunguta emoyeni…kodvwa kwakungekho-moya. Wabuka etulu, futsi cishe libanga lelinguhhafu etulu esihlahleni sem-phophula, intfo letsite yayiyalukisa emacembe.
Masinyane nje liPhimbo lakhuluma, “Unganatsi noma ubheme noma wone umtimba wakho nganoma nguyiphi indlela, kutoba nemsebenti wakho kutsi uwente uma sewukhulile.” Lomfana lowetfukile loneminyaka lesikhombisa budzala wawisa emabhakede akhe wase ugijimela kunina.
Njengemprofethi Samuweli, Nkulunkulu futsi bekakhulumile kumntfwana.
Emavikini lambalwa kamuva, bekadlala timabula nemnakabo lomncane. Kuva lokungakejwayeleki kwefika etikwakhe. Wabuka ngephandle etikweMfula i-Ohio wase ubona libhuloho lelihle. Emadvodza lalishumi nesitfupha awela ekufeni kwawo lapho libhuloho liwela umfula. Lomprofethi lomncane bekabone umbono wakhe wekucala. Watjela unina, futsi wayibhala phansi lendzaba yakhe. Iminyaka kamuva, emadvodza la 16 awela ekufeni kwawo lapho libhuloho iSecond Street eLousiville, eKentucky lakhiwa khona etikweMfula iOhio.
INkhosi yayimkhombisa imibono yesikhatsi lesitako. Futsi njengebaprofethi embikwakhe, lemibono ayizange yehluleke.