Imibono yachubeka. Watjelwa balingani bakhe lababafundisi kutsi lemibono yakhe yayingaveli kuNkulunkulu. Watjelwa kutsi bekangenwe ngumoya lomubi. Loku kwamkhatsata ngalokujulile. Umtfwalo waba-mkhulu kakhulu kutsi awutfwale, ngako waya ehlane kuyofuna iNtsandvo yaNkulunkulu. Bekatinikele kakhulu kangangekutsi wafunga kutsi angabuyi angenamphendvulo. Kwakukulapho, endlwaneni yetingodvo lendzala yekwetsiya, lapho iNgelosi yeNkhosi yamnika kutfunywa kwakhe. Emkhatsini waletinye tintfo, iNgelosi yamtjela loku: “Uma utotfola bantfu kutsi bakukholwe, futsi ubecotfo uma ukhuleka, akukho lutfo loluyoma embikwemikhuleko yakho, hhayi ngisho nemdlavuza.”
Konkhe kungabata kwase kuhambile. Manje bekasanekutfunywa futsi ngesibindzi watsatsa tinyatselo waya embili. Imvuselelo yekuphilisa yase icalile.
Emakhulu etinkhulungwane atsamela imikhankhaso yaBranham. Tinkhulungwane taphiliswa ngeliGama leNkhosi Jesu Khristu. Labanye bavangeli njenga Oral Roberts nje, T.L. Osborne, na A.A. Allen masinyane balandzela uMnaketfu Branham base bacala imikhankhaso yabo yetimvuselelo tekuphilisa. INkhosi yanisa yehlisa tibusiso taYo njengalokungakaze phambilini. Sandla lesiphilisako saJesu Khristu sasesiphindze futsi satsintsa bantfu baKhe.
“Bengikhaliswa yinjabulo etikwesiphiwo saNkulunkulu samadvutane nje ebandleni lemnaketfu lotsandzekako, William Branham, ngesiphiwo sakhe lesimangalisako sekuphilisa. Lolu ludzaba lwaNkulunkulu enta lokukhulu kakhulu kunako konkhe lesingakucela noma sikucabange (Efes. 3:20), ngoba angikaze ngibone noma ngifundze noma yini lelinganiswa nenkonzo yekuphilisa yaWilliam Branham.”
UMfund. F.F. Bosworth, umvangeli lodvume umhlaba wonkhe nalomunye wabobabe labasungula lihlelo iAssemblies Of God kanjalo nenhlangano yemaPhentekhostali amanje.
“Kulesinye senteko, sabukela lapho akhuluma endvodzeni ilele embhedzeni loluhlaka. Ekucaleni kwakungekho phawu lwekusabela lokunebuhlakani kulendvodza. Inchazelo yase iyavela kumfati eme edvutane, kutsi lendvodza yayingabulawa ngumdlavuza kuphela, kodvwa yayisihhulu futsi ingakwati kuva lokwakushiwo.
UMnaketfu Branham wase ke utsi kwakutodzingeka kutsi lendvodza yemukele kuva kwayo kute akhone kuyiyala mayelana nekuphiliswa kwemdlavuza wayo. Kwabakhona sikhashana semkhuleko. Masinyane nje lendvodza yase ikhona kuva! Tinyembeti letinkhulu letibanti tehla ngetihlatsi talendvodza ebusweni bayo lonkhe likusihlwa lalingenakuvakalisa kakhulu futsi lingatsintseki. Yalalela ngekukhatsalela lokujulile njengoba yatjelwa ngekukhululwa kwayo kumdlavuza.”
UMfund. Gordon Lindsay, umbhali loyingcweti, umfundisi, nemsunguli weChrist For The Nations Insitute.
“UMnaketfu Branham watsi, ‘Indvodza yeKhongolosi seyiphilisiwe.’ Inhlitiyo yami yagcumagcuma. Ngaphuma ngatsi cekelele ngase ngemukela iNkhosi uMphilisi wami. Ngatibeka eceleni timboko tami…nelingaphansi leliZulu lehlukana.”
William D. Upshaw, indvodza yeKhongolosi yaseUS (1919-1927), lomele lukhetfo lweMengameli wase US nga 1932. Wakhubateka kusukela awa wephuka licolo lakhe angumntfwana. Bekana 84 ngesikhatsi aphiliswa ngalokuphelele emkhulekweni weMnaketfu Branham, emvakwekukhubateka iminyaka lengema 66. Akazange abe asaba nesidzingo sesitulo semasondvo noma timboko tonkhe tinsuku tekuphila kwakhe.
“Ngangikadze ngilele ngemhlane wami iminyaka lesiphohlongo netinyanga letintsatfu ngineT.B. Nabodokotela sebaphonse lithawula ngami. Sisindvo semtimba wami sasingendluli kumaphawondi langema 50 futsi kwakubonakala kwangatsi lonkhe litsemba lase lingasekho. Kwase-ke eJeffersonville, eIndiana, kwefika uMfund. WM Branham embonweni lebekawubonile ngeliwundlu libambeke ehlane futsi lalikhala ‘Milltown,’ lokungulapho ngihlala khona. UMnaketfu Branham bekangakaze abe lapha noma ati noma ngubani walapha. Angena, wabeka tandla etikwami wase uyakhuleka, abita etikwami liGama leNkhosi yetfu letsandzekako Jesu. Intfo letsite yabonakala ingibamba futsi khona lapho nje ngase ngiphakeme ngibonga Nkulunkulu ngemandla aKhe ekuphilisa. Manje sengingumshayi wepiyano ebandleni iBaptisti lapha.”
Georgia Carter, eMilltown eIndiana, waphiliswa kuT.B. lebulalako nga 1940 futsi akakaze aphatfwe ngulesosifo ngalelinye lilanga emphilweni yakhe. Umelele emashumi etinkhulungwane tebantfu labaphiliswe ngenkonzo yakhe futsi basaphiliswa nanamuhla.