Wona kanye nje emavi ekugcina labhalwe eThestamentini leliDzala aniketa lesetsembiso lesi: “Bukani, Ngitonitfumelela Eliya umprofethi lungakefiki lusuku lweNKHOSI lolukhulu nalolwesabekako: Futsi uyophendvulela inhlitiyo yabobabe kubantfwana, nenhlitiyo yebantfwana kuboyise, funa ngifike futsi ngishaye live ngesicalekiso.” (Mal 4:5-6)
Lusuku lweNkhosi lolukhulu nalolwesabekako lusatofika noko, ngako sifanele ngebucotfo sibuke umprofethi Eliya. EBhayibhelini, baprofethi bebangeti ngemdvumo wetinhlangano tetenkholo. Bebeta kulabakhetsiwe labayingcosana. Awucabange nje kube umprofethi waMalakhi 4 weta, futsi wagejwa. Uma-ke afana nebaprofethi basendvulo, futsi kwaba lidlanzana kuphela lebantfu lelamcondza na? Uma lomprofethi atobuya elusukwini lwekugcina, siyomati kanjani na? Imphendvulo ibonakala kalula nje emiBhalweni. Utoba nemvelo yemprofethi. Uyokwati timfihlo tenhlitiyo. Uyokwenta imimangaliso. Tinhlangano tetenkholo tiyolinga kumdvumata. Kodvwa kuyoba nalabayingcosana labakhetsiwe labamcondzako njengesitfunywa lesetsenjisiwe selusuku.
Siyokwati kanjani uma Eliya sekabuya na? Timphawu tini letiyovetwa ebaleni kuze simcondze na?
Eliya bekayindvodza yasehlane. Tibonakaliso letinkhulu netimanga talandzela inkonzo yakhe. Washumayela ngekumelana nebubi belusuku lwakhe. Washumayela ikakhulukati ngekumelana nesimilo lesibi seNdlovukazi Jezebeli. Ngesikhatsi Eliya enyuselwa eZulwini ngencola yemlilo, umoya wakhe wehlela etikwa-Elisha. Tibonakaliso letinkhulu netimanga tase-ke tikhomba inkonzo ya-Elisha, naye futsi washumayela wamelana netono telive. Bobabili baprofethi bema bodvwa bamelene netinhlangano tetenkholo tangalolosuku. Emakhulu eminyaka kamuva, umoya lofanako wabuya emhlabeni kuJohane umBhabhatisi. Umprofethi Malakhi washo ngaphambili kutsi Eliya uyobuya kutsi etfule iNkhosi: “Bukani, Ngitotfuma sitfunywa sami, futsi siyolungisa indlela embikwami…” (Malaki 3:1). Johane umBhabhatisi bekacinisile esimeni lapho abita kuphendvuka emkhatsini webantfwana baNkulunkulu. Njenga-Eliya, washumayela wamelana nenkhosi netinhlangano tetenkholo tesimanje. INkhosi Jesu yacinisa kutsi Johane umBhabhatisi bekangumprofethi waMalakhi 3 eNcwadzini yaMatewu (11:10): “Ngoba lona nguye, lokubhalwe ngaye kutsi, Buka, Ngiyatfuma sitfunywa sami embikwebuso bakho, lesitolungisa indlela yakho embikwakho.” Lukha 1:17 utsi umoya wa-Eliya (Eliyase) wawutoba kuJohane umBhabhatisi, “Futsi uyohamba embikwayo emoyeni nasemandleni a-Eliyase, kubuyisela tinhlitiyo tabobabe kubantfwana.” Kodvwa caphelani leyoncenye yesibili yaMalakhi 4 isatogcwaliseka noko: “…nenhlitiyo yebantfwana kuboyise, funa Ngifike futsi ngishaye umhlaba ngesicalekiso.” Leyoncenye yemBhalo iyofezeka ngaphambi kwekuBuya kwesiBili kwaKhristu.
Iminyaka letinkhulungwane letimbili emvakwaJohane umBhabhatisi, sekusikhatsi futsi semoya wa-Eliya kutsi ubuye emhlabeni.
Lolosuku selufikile! Kulomnyaka, siwubonile umoya wa-Eliya ubuya. Ushaye indiva inchubo yebuhlelo yamanje. Wamelana netono telive. Wakhombisa tibonakaliso netimanga letingenakubalwa. Washumayela livi-ngelivi leliBhayibheli kusukela kuGenesisi kuya eSambulweni. Umprofethi waMalakhi 4 wefika njengoba etsenjisiwe, futsi waletsa uMlayeto lovela esiHlalweni sebukhosi saNkulunkulu Somandla. Ligama lalowomprofethi nguWilliam Marrion Branham. Simbita nge “Mnaketfu Branham.”
“William Branham, lengangimtsandza futsi ngamkholwa kutsi ungumprofethi waNkulunkulu.”
Oral Roberts, umvangeli lodvume umhlaba-jikelele nemsunguli we-Oral Roberts Univesithi.
“William Branham wefika endleleni yetfu njengemprofethi waNkulunkulu futsi wasikhombisa ekhulwini-minyaka lemashumi lamabili ngalokucacile tintfo letifanako lesakhonjiswa tona emaVangelini…Nkulunkulu ubavakashele bantfu baKhe, ngoba umprofethi lomkhulu uvukile emkhatsini wetfu.”
Dkt. T.L. Osborn, umvangeli wemaPhentekhostali nembhali loyingcweti.
“Ngaphambi kwekukhulekela umuntfu, bekaniketa imininingwane lengenaphutsa lemayelana netifo, kanye nemininingwane ngetimphilo tabo - lidolobhana lasekhaya kubo, imisebenti, iminyakato - ngisho nasemuva le ebuntfwaneni babo. Branham akazange nakanye ente liphutsa ngelivi lekwati kuyo yonkhe iminyaka nginaye. Loko kucukatsa, eludzabeni lwami, tinkhulungwane tetenteko.”
Ern Baxter, umvangeli, imenenja yemiKhankhaso yaBranham iminyaka lesikhombisa, nalongulomunye webaholi basekucaleni beBritish New Church Movement.
Akukaze seloku iNkhosi Jesu Khristu yahamba umhlaba kubenemuntfu lotsintse umhlaba ngendlela lenkhulu kakhulu kangaka. Kusukela ekucaleni kwekutitfoba endlwaneni yetingodvo lelikamelo-linye emagcumeni aseKentucky, kuya e-Amarillo, eTexas, lapho iNkhosi yamyisa khona eKhaya, imphilo yakhe ngalokuchubekako yaphawulwa tentakalo letingetulu kwemvelo. Ekucondzisweni yiNgelosi yeNkhosi nga 1946, inkonzo yeMnaketfu Branham yaveta inhlanse leyokhela sikhatsi setimvuselelo letinkhulu tekuphilisa letashanyela iMerica yonkhe nasemhlabeni jikelele. Kute kube ngulolusuku, uvunywa bosomlandvo labangemaKhristu njenga “babe” ne “mholi losibonelo” wemvuselelo yekuphilisa yabo 1950 leyagucula liBandla lemaPhentekhostali futsi ngekwelucobo yavusa kundlondlobala enhlanganweni yaBosindzisiwe, namuhla yona lewunga cishe onkhe emahlelo emaPhrothestane. Naloku nje, acinisile esimeni, emahlelo anciphisa kufundzisa kwakhe futsi aphika kutfunywa kwakhe.
Nomaphi lapho bekaya khona, Nkulunkulu wafakaza kutsi uMnaketfu Branham ungumprofethi kulesitukulwane lesi. NjengaJobe, iNkhosi yakhuluma naye isesihhushuhhushwini. NjengaMosi, iNsika yeMlilo yabonakala imhola. NjengaMikhaya, wetfukwa bafundisi basesontfweni. Njenga-Eliya, bekayindvodza yasehlane. NjengaJeremiya, watfunywa yiNgelosi. NjengaDanyela, wabona imibono yesikhatsi lesitako. NjengeNkhosi Jesu, beyati timfihlo tenhlitiyo. NanjengaPawula, waphilisa labagulako.
INkhosi futsi ivakashele bantfu baYo ngemprofethi. Ngesikhatsi lesimnyama kunato tonkhe emlandvweni, lapho similo sekutiphatsa sesicwile etinjulweni letingakaze tibonwe netikhali tembubhiso sisikita emkhatsini, indvodza letitfobile yatfunywa ivela ebukhoneni baNkulukulu kubitela sive lesifako ekuphendvukeni.
Umfundzi lotsandzekako Johane wabhala ngeNkhosi Jesu:
Futsi kukhona naletinye tintfo letinengi latenta Jesu, letingatsi, uma betingabhalwa tona ngatinye, ngitsi ngisho nemhlaba wonkhe bewungeke utenele tincwadzi lebetingabhalwa. Ameni. (Johane 21:25).
Lokufanako kungashiwo ngemphilo yaMnaketfu Branham. Kunetinshumayelo letitheyishiwe letingetulu kweti 1,200 netinkhulungwane tetindzaba ngemphilo yalendvodza lelichawe. Noko ngalokuchubekako siva timfakazo letinsha temtselela wakhe etimphilweni tetigidzi tebantfu. Lencwajana beyingeke ilitsintse lingetulu lemfutfo lendvodza yaNkulunkulu lebenawo emhlabeni.