UMnaketfu Branham uhlala achaza iNsika yeMlilo leyayicinisekisa inkonzo yakhe. Yayikhona ekutalweni kwakhe, yabonwa tinkhulungwane elusentseni lweMfula i-Ohio, futsi yayibonakala imlandzela nomakuphi lapho bekaya khona. Kwakungu 1950 lapho iNkhosi yaniketa kokubili emakholwa nalabangakholwa ngalokufanako bufakazi lobungenakuphosisa kutsi leNsika yeMlilo yayinemprofethi.
Busuku babumbonywe kuphikisana eSam Houston Coliseum. UMnaketfu Branham bekahola imvuselelo yekuphilisa leyayishanyela live. Tibusiso teNkhosi Jesu tatitfululeka njengemvula etikwemasimu akamoya akolo. Kodvwa tibonakaliso letinkhulu nemimangaliso atitanga ngaphandle kwekugceka. Njengasosonkhe sikhatsi, sitsa savusa sitsa. Lemibutfo lemibili yahlangana eHouston eTexas, neNgelosi yeNkhosi cobo lwaYo yehla kutolwa lemphi.
Tinkhulungwane tase tivele tikhona kutotibonela imimangaliso lengenakubalwa lebeyilandzela lendvodza yaNkulunkulu. Lusuku ngaphambili, licembu lebafundisi bendzawo laphosela umprofethi insayeya enkhulumeni-mphikiswano ngekuphilisa kwaNkulunkulu, kodvwa lensayeya yawela kulenye yetimphekeleteli temprofethi lendzala leyetsembekile, uMfundisi F.F. Bosworth. Labanengi bancikati bebancotjwa ngumfundisi wendzawo loyiBaptisti nemhlatiyi lowatiwako wekuphilisa kwaNkulunkulu. Lenkhulumo-mphikiswano yaputjukela emaphephandzabeni, lokwatsi ngekushesha asakata tihloko, “Boya BeSayensi Yetenkholo ButoBhunya Nga 7 p.m. Namuhla ESam Houston Coliseum.”
Lomncikati wacasha umtfwebuli wetitfombe lokufundzele, Ted Kipperman waseDouglas Studios, kutsi abhale lenkhulumo-mphikiswano. Ngaloko kuhlwa, titfombe tatsatfwa neMnaketfu Bosworth eme ngekutitfoba lapho umncikati eme ngekutimisela ngetikhundla tekwesabisa; ngalesinye sikhatsi ngemuno wakhe wawuhlokolota ebusweni bendvodza lendzala letitfobile.
Ngesikhatsi lenkhulumo-mphikiswano icala, uMfundisi Bosworth ngekushesha wafakaza buciniso bekuphilisa kwaNkulunkulu ngebufakazi bemBhalo futsi-ke, kungashiyi mbuto, wacela bonkhe labo lebebakadze baphilisiwe ebutsakatsakeni babo kutsi baphakame. Tinkhulungwane taphakama tema ngetinyawo tato. Emvakwekuba labo lebebaphilisiwe sebatsatse titulo tabo, wabuta uma labo labaphiliswa ngekuphilisa kwaNkulunkulu bebangemalunga ekumeni lokuhle kwelihlelo lalendvodza kutsi beme. Emalunga elibandla langemakhulu lamatsatfu aphakama kutsi ngekuchosha aveta ebaleni sihawu iNkhosi Jesu lebeyiwakhombise sona.
Insayeya yavela kumncikati-ke. “Akavele lowomphilisi waNkulunkulu. Akente.” UMnaketfu Bosworth wakucacisa kutsi Jesu bekanguye kuphela uMphilisi waNkulunkulu, kodvwa kuklabalaza lokuvela kumncikati kwachubeka. Ekugcineni, uMnaketfu Bosworth wamemela uMnaketfu Branham ngembili. Wasemukela simemo emkhatsini wetinhlokomo tekumesekela.
Umprofethi, agcwaliswe ngaMoya loNgcwele, waniketa lemphendvulo lelandzelako:
Angeke sengikhone kuphilisa ngisho munye umuntfu. Loku ngiyakusho. Ngesikhatsi ngiseluswane ngatalwa enhla eSifundzeni saseKentucky, ngekusho kwamake wami lotsandzekako, naloko lokucinisekiswe emphilweni yami yonkhe, kwaba khona kuKhanya lokwangena ekamelweni lalawo mafuhlufuhlu lamadzadlana lapho, lapho kwakukhona, kungekho siyilo kulo, lingenalo ngisho nelifasitelo, bebanentfo lendzadlana nje yelifasitelo lapho, njengesivalo lesincane, futsi basifuca savuleka cishe ngensimbi yesihlanu ekuseni, nalokuKhanya loku kwashaya indingilizi ekhatsi njengoba nje kwakukusa kwelusuku. Kusukela ngalesosikhatsi, bekusolo Kunami. KuyiNgelosi yaNkulunkulu. Yahlangana nami sicu sami eminyakeni lembalwa leyendlulile. Kusukela phansi emphilweni yami, Yangitjela tintfo lokwentekile, futsi ngitishito njengoba Ingitjelile nje. Futsi ngiphonsela insayeya noma ngubani kunoma nguyiphi indzawo, kutsi aye edolobheni lapho ngakhuliswa khona, noma nguyiphi lenye indzawo, kutsi sitatimende lesike sentiwa eGameni leNkhosi, kepha lesifika nje ncamashi ngendlela lokutsite sitofika ngayo.
Emva kwekuba sekashito lawomavi, uMoya loyiNgcwele wehlela ngembili, nalomtfwebuli wetitfombe lojabule kakhulu watsatsa sitfombe. UMnaketfu Branham wesuka ngembili nalesilula, noko sitatimende sesiprofetho: “Nkulunkulu utofakaza. Ngingeke ngisasho lutfo lolunye.”
Lobambisene neMnumz. Kipperman ngekushesha waya kuyosebenta ageza titfombe entela tindzaba tangekusa lokulandzelako. Wacaphela intfo leyincaba lapho advonsa sitfombe lesitfwetjuliwe sekucala kulomutsi wekugeza. Sona, njengaletilandzelako titfombe letitfwetjuliwe letisihlanu, sasingenalutfo. Wadvumela inhlitiyo yakhe futsi wawela embili ngesikhatsi advonsa sekugcina lesiprintiwe kulomutsi wekugeza. Lapho, kulesositfombe lesitfwetjuliwe sekugcina, kwakuyiNsika yeMlilo esimeni lesibonakalako iphumule ngetulu kwenhloko yemprofethi waNkulunkulu, William Marrion Branham.
Bantfwana baka-Israyeli batibonela iNsika yeMlilo ihola Mosi, nebantfu balolusuku lwesimanje batibonele leyoNsika yeMlilo lefanako ihola lomunye umprofethi.
Lesitfombe lesitfwetjuliwe ngekushesha sendluliselwa kuGeorge J. Lacy, uMhloli Lokufundzele wemiBhalo yebufakazi Lobungatjatwako waseU.S. F.B.I., lowasicinisekisa lesitfombe ngembono wakhe webungcweti. Incwadzi lesemtsetfweni leyavetwa nguMnumz. Lacy isekhasini lelilandzelako.
Loku kwakukudzala ngaphambi kwabongcondvo-mshini nemakhamera lasebenta ngetinombolo, futsi kwakungeke kwachazwa nganoma ngutiphi tindlela tekwenta letatiwa yisayensi, kunekutsi kwakukhona kuKhanya sibili etikwenhloko yaWilliam Branham. Namuhla lesositfombe lesitfwetjuliwe lesifanako singabonwa eUnited States Library Of Congress, enhlokodolobha yesive, eWashington DC.