Ngalelinye lilanga ngangitfole indlela yekulucosha lolobito. Ngangiphuma ngiya enshonalanga kuyosebenta eplazini letinkhomo. Mngani, Nkulunkulu mkhulu nje ngephandle lapho njengoba Anjalo kunoma nguyiphi indzawo. Kwangatsi ungazuza ngesentakalo sami. Uma Akubita, Mphendvule.
Ngalokunye kusa kweNyoni ngemnyaka wa 1927, ngatjela make kutsi ngangiya eluhambeni lwekuyokhempa eTunnel Mill, lokucishe kube ngemamayela lalishumi nakune kusuka eJeffersonville lapho besihlala khona ngalesosikhatsi. Ngase ngivele ngilungiselele luhambo loluya eArizona nalabanye bangani. Ngesikhatsi Make eva kimi futsi, ngangingekho eTunnel Mill kodvwa ePhoenix, e-Arizona, ngibalekela Nkulunkulu weluTsandvo. Imphilo yaseplazini letinkhomo yayiyinhle kakhulu kwesikhashana, kodvwa masinyane yaguga, njenganoma nguyiphi lenye injabulo yelive. Kodvwa ake ngisho lapha, Akadvunyiswe Nkulunkulu, kutsi sentakalo naJesu sikhula siya ngekubamnandzi ngekubamnandzi ngaso sonkhe sikhatsi futsi asigugi. Jesu uniketana kuthula lokuphelele nendvudvuto sonkhe sikhatsi.
Tikhatsi letinengi ngiwuvile umoya uvunguta etihlahleni letindze tesipheshula. Kwakubonakala kwangatsi ngangingaliva leliPhimbo laKhe libita khashane ehlatsini, litsi, “Adamu, ukuphi na?” Tinkhanyeti tabonakala kwangatsi tisedvute kakhulu ngangekutsi wawungatitsatsa ngetandla takho. Nkulunkulu wabonakala kwangatsi bekasedvute kakhulu.
Intfo yinye ngalelolive yimigwaco lelugwadvule. Uma uke wake waphuma emgwacweni, ulahleka kalula kabi. Tikhatsi letinengi tivakashi tibona timbali letincane taselugwadvule bese tiphuma emgwacweni lomkhulu kutsi titikhe. Tizulazula tisuke elugwadvule futsi tilahleke futsi ngaletinye tikhatsi tibulawe koma. Kunjalo nangendlela yemKhristu–Nkulunkulu unemgwaco lomkhulu. Ukhuluma ngawo ku-Isaya, sahluko 35. Ubitwa nge “Mgwaco lomkhulu webuNgcwele.” Tikhatsi letinengi tinjabulo letincane telive tikudvonsa uphume emgwacweni lomkhulu. Khona-ke sewulahlekelwe lwati lwakho naNkulunkulu. Elugwadvule uma ulahlekile, lapho ngaletinye tikhatsi kubonakala lutalagu. Kubantfu lababulawa koma, lutalagu luyoba ngumfula noma lichibikati. Tikhatsi letinengi bantfu bagijimela kuto bese bawela kulo kuphela batfola kutsi babhukusha nje esihlabatsini lesishisako. Ngaletinye tikhatsi develi ukukhombisa intfo letsite atsi sikhatsi lesimnandzi. Lolo nje lutalagu nje, kuyintfo lengesiyo sibili. Uma ulalela uyotitfola kuphela ulakanyisa tinsizi enhloko yakho. Ungamlaleli, mfundzi lotsandzekako. Kholwa Jesu lokunika emanti laphilako kulabo labalamba futsi bome.
Ngalelinye lilanga ngatfola incwadzi levela ekhaya ingitjela kutsi lomunye webanaketfu bekagula kakhulu. KwakunguEdward, longelamako. Kusobala angikucabanganga kukubi kakhulu, ngako ngangikholwa kutsi bekatoba ncono. Kodvwa ngalokunye kuhlwa tinsuku letimbalwa kamuva ngesikhatsi ngangivela edolobheni lapho ngendlula ehholeni lokudlelwa kulo ndzawonye eplazini letinkhomo, ngabona liphepha etikwelitafula. Ngalitsatsa. Lalifundzeka litsi, “Bill, yenyukela edlelweni lelingasenyakatfo. Kumcoka kakhulu.” Emvakwekuba sengiyifundzile lenothi umngani nami saphumela edlelweni. Umuntfu wekucala lengahlangana naye kwakungumcaphi welipulazi letinyamatane lomdzala weLone Star lobekasebenta epulazini letinkhomo. Ligama lakhe kwakunguDurfy, kodvwa sasimbita nga “Pop.” Bekanekutjengisa kudzabuka ebusweni bakhe lapho atsi, “Mfana Billy, nginetindzaba letimbi takho.” Ngalesosikhatsi fomeni weta enyuka. Bangitjela kutsi ithelegramu yayisandza kufika, ingitjela ngekufa kwemnaketfu.
Mngani lotsandzekako, kwesikhashana angikhonanga kunyakata. Kwakukufa kwekucala emndenini wakitsi. Kodvwa ngifuna kusho kutsi intfo yekucala lengacabanga ngayo yayikutsi ingabe bekasakulungele yini kufa. Lapho ngijika futsi ngabuka ngale kwenkhangala lemtfubi, tinyembeti tehla etihlatsini tami. Kutsi ngakukhumbula kanjani kutsi sasizabalaza kanjani ndzawonye ngesikhatsi sisebafanyana nekutsi kwakukadze kulukhuni kanjani kitsi.
Sasiya esikolweni cishe singenako lokwenele kutsi sidle. Tintwane tatiphuhle ngaphandle kweticatfulo tetfu futsi sasidzingeka sigcoke emabhantji lamadzala laboshwe ngetulu entsanyeni ngoba sasingakafaki mahembe. Kutsi ngakhumbula kanjani futsi ngalelinye lilanga Make bekanembasha yelantji ebhakedeni lelincane. Sasingadli nalabanye babo bonkhe bantfwana. Sasingakwati kudla njengoba bebanako. Sasihlala njalo sitsi shelele ngale kweligcuma bese siyadla. Ngiyalukhumbula lolusuku lesasinembasha ngalo, sasicabanga kutsi kwakulidzili impela. Ngako kuciniseka kutsi nginayo incenye yami yayo, ngaphuma ngaphambi kwasemini ngase ngicaphuna kahle legcwele sandla ngaphambi kwekutsi umnaketfu atfole incenye yakhe.
Kwase kutsi-ke ngime lapho ngibuka lelolanga licotfula inkhangala ngacabanga ngato tonkhe letotinto futsi ngamangala kutsi ngabe Nkulunkulu bekamyise endzaweni lencono yini. Khona-ke futsi Nkulunkulu wangibita, kodvwa njengalokuvamile, ngatama kulwisana nako.
Ngalungiselela kuta ekhaya ngemngcwabo. Ngesikhatsi uMfund. McKinny weliBandla lasePort Fulton, indvodza lebeyinjengababe nje kimi, washumayela umngcwabo wakhe wakuphatsa kutsi, “Kungahle kube nalabanye lapha labangamati Nkulunkulu, uma kunjalo, Memukele manje.” O ngasibamba ngci kanjani situlo sami, Nkulunkulu bekasebenta futsi. Mfundzi lotsandzekako, uma Abita, Mphendvule.
Angiyuze ngakhohlwa kutsi Babe lomdzala tatane naMake kutsi bakhala kanjani emvakwemngcwabo. Ngangifuna kubuyela eNshonalanga kodvwa Make wangincenga kakhulu kutsi ngihlale ngaze ngatsi ekugcineni ngavuma kuhlala uma ngangingatfola umsebenti. Masinyane ngatfola umsebentana eNkapaneni yeteMisebenti yeSive yase-Indiana.
Cishe eminyakeni lemibili kamuva ngisahlola ema-mitha esitolo sema-mitha eGas Works eNew Albany, ngahishwa yigesi futsi emaviki ngaguliswa ngiyo. Ngaya kubo bonkhe bodokotela lengangibati. Ngangingatfoli buncono. Ngaguliswa sisu lesine-esidi, ibangwa yimiphumela yegesi. Kwakuya ngekuba kubi kakhulu ngaso sonkhe sikhatsi. Ngayiswa kubodokotela labatigogodzele tifo eLousville, eKentucky. Batsi ekugcineni kwakungutfunjana wami futsi batsi ngangidzingeka ngibe nekuhlindvwa. Angikukholwanga ngoba ngangingakaze ngibe nebuhlungu eluhlangotsini lwami. Bodokotela batsi kwakungasekho lebebangangentela kona ngite ngibe nekuhlindvwa. Ekugcineni ngavuma kutsi nako kwentiwe kodvwa ngagcizelela kutsi basebentise umutsi wekufiyota wendzawo kute ngikhone kubuka kuhlindvwa.
O, ngangifuna umuntfu kutsi eme ngakimi lobekati Nkulunkulu. Mine bengikholelwa kuwo umkhuleko kodvwa ngangingakwati kukhuleka. Ngako umfundisi weliBandla iFirst Baptisti wahamba nami kuya egunjini lekuhlinzela.
Ngesikhatsi bangisusa etafuleni ngiya embhedzeni wami, ngativa ngiya ngekuphelelwa ngemandla nangekuphelelwa mandla ngaso sonkhe sikhatsi. Inhlitiyo yami kwase kulukhuni kutsi ishaye. Ngeva kufa etikwami. Kuphefumula kwami kwakuya ngekuba kufisha ngaso sonkhe sikhatsi. Ngati kutsi ngase ngifike ekupheleni kwemgwaco wami. O mngani lindza ute ufike lapho kanye, khona-ke uyocabanga ngencumbi yetinto lotentile. Ngangati kutsi ngangingakaze ngibheme, nginatse noma ngibe ngisho namiphi imikhuba lengcolile kodvwa ngangati kutsi ngangingakulungele kudibana naNkulunkulu wami.
Mngani wami uma kuphela nje ulilunga lelibandla lelibandzako lelingilo ngeligama nje, uyokwati uma sewufika ekupheleni kutsi awukalungeli. Ngako uma kunguloko kuphela lokwatiko ngaNkulunkulu wami, ngiyakucela khona lapha kutsi uguce ngemadvolo akho bese ucela Jesu kutsi akunike lesosentakalo sekutalwa kabusha, njengoba Atjela Nikhodima kuJohane sahluko 3, nekutsi o tiyokhala kanjani tinsimbi tenjabulo. Alidvunyiswe liGama laKhe.