Bikeena-kumona kutungunukabi. Bavwa bamwambila kudi balombodi nende baa ekeleeziya ne bikeena-kumona abi kabivwa bya kudi Nzambi to. Bavwa bamwambila ne nyuma mubi kampanda nguvwa mumukwate. Aci ke kumutacishaci bikole mu meeji. Bujitu kwikalabu bupite kabuciyi dyambula to, ke kuyaye mu mwaba wa cipeela bwa kuya kapeta Diswa dya Nzambi. Ukaavwa mudifile bikole mu mushindu wa mudicipe bwa kayi mwa kwalukila kayi mupete dyandamuna to. Muvwa mmwamwa, mu kazubu kaa kale muvwaye uyaayaaya bwa kwela mateyi mwamwa, ke mwakamupeela Mwanjelo wa Mukalenge mudimu wakatumiibwaye naawu bwa kwenza. Mu maalu makwabo, Mwanjelo wakamwambila nenku: “Wêwè mufikishe bantu ku dikwitabuuja, ne mwikale ne meeji matooke paudi usambila, kakwakwikala cintu nansha cimwe cyakandameena ebe masambila, nansha kansere kiine.”
Mpatà yônsò kuumukayi. Ukaavwa mpindyewu ne mudimu mumutuma naawu nenku ke kutungunukaye ne dikima dyônsò. Ditabuluja dya dyondopa dikaavwa dibange.
Binunu nkama bya bantu bavwa baya mu tumpanye twa Branham. Binunu bya bantu bavwa bondopiibwa mu Dînà dya Mukalenge Yesu Kilisto. Batangadiki bakwabo bu mudi Oral Roberts, T.L. Osborn, ne A.A. Allen kabaakajanguluka to baakalonda Mwaneetu Branham kadi kubangabo abo matabuluja a dyondopa. Mukalenge kulokeshaye mabenesha Ende mu mushindu wa kacya. Cyanza cya dyondopa cya Yesu Kilisto cyakalenga bantu Bende musangu ewu kabidi.
“Ntu anu ndila mwadi wa disanka bwa dipà dya Nzambi dya matuku mashaale aa ditumina ekeleeziya wa mwaneetu munanga, William Branham, ne dipà dyende dya dyondopa didi dikemeshangana. Ebu mbwalu budi Nzambi mwikale wenza bintu byàbûngì bipite ne byônsò bitudi mwa kulomba anyi kwelela meeji (Efeso 3.20), bwalu mêmè ewu ncituku mwanji kumona kacya anyi mubale cintu nansha cimwe ciikale mwomumwe ne mudimu wa bwambi wa dyondopa wa William Branham to.”
Rév. F.F. Bosworth, mutangadiki mwende luumu wa buloba bujima mwikale kabidi umwe wa ku baataatu baakajuula dingumba dya Assemblées de Dieu kabidi ne nkwaka wa Mpenta wa leelu ewu.
“Musangu kampanda, twâkabandila pavwaye wakula ne muntu mulume mulaadika mu kalaalu kaa babeedi. Kumpala kakuvwaku cimanyinu nansha cimwe cya dyandamuna dyetu dya meeji edi dya kudi muntu awu to. Dyumvwija dyakalwa pashiishe kudi mukajende uvwa mwimane pabwîpì nende ne, muntu awu kavwa anu ufwa kansere nkaayaku to; kadi uvwa mpudimaci ne kavwa mwa kuumvwa bivwabo bamba to.
Ke mwaba awu Mwaneetu Branham kwambaye ne bivwa bikengela bwa muntu awu kupetaye lumvu lwende bwa wamona mwa kumuleeja bwalu bwa dyondopiibwa dyende ku kansere. Kwanji kupitaku katanci kaa disambila. Dyakamwe muntu awu kubangaye kuumvwa! Mamata manene a binsonji kuzololokawu pa matama a muntu awu uvwa diloolo dijima adi mpala kayiku mwa kuleeja muvwaye udyumvwa cibì mupuwe anu nyanyanya. Wakateeleja ne ntema yônsò pavwaye ulondelangana bwa disungidiibwa dyende ku kansere.”
Rév. Gordon Lindsay, mufundi wa dipoko, mwambi, ne mujuudi wa Institut Christ Pour Les Nations.
“Mwaneetu Branham kwambaye ne: ‘Congressiste ewu wamanyi kwondopiibwa.’ Mwoyi wanyi kutupika ne disanka. Mêmè kupatuka kwaka e kwitaba Mukalenge bu Mwondopi wanyi. Mêmè kwimansha mabaya aanyi a balema… nenku bavwa mu citupa cya kwinshi kwa Dyulu kufiikabo munda!”
William D. Upshaw, Congressiste wa États-Unis (1919-1927), wakafila mpala bwa kumusungulabo bu Mfumu wa ditumga wa États-Unis mu 1932. Mucibukile panshi kubangila paakadishindaye ne kucibuka nyima pacivwaye mwânà. Ukaavwa ne bidimu 84 paakondopiibwaye ku kantu ne kantu ku dimusambidila dya Mwaneetu Branham, paanyima paa yêyè mushaale mucibukile panshi bidimu 66. Kaakapetaku dijinga dya dikalu dya balema anyi mabaya a balema to matuku ende ônsò akashaalayi ne mwoyi.
“Mvwa mu bulaalu kacya ngela cyâdì muulu kukaavwa bidimu 8 ne ngondo 9 mwikale ne disaama dya cyâdì, ne bangangabuka bakaavwa bandekele. Bikaavwa bwalu bukole bwa mêmè kwikala ne livres de poids 50 [kìlô 23] yetu eyi ne byôbì biine bikaavwa bimweke anu bu ne ditekemena dyônsò dikaavwa diye. Nenku ke Révérend WM. Branham, muumukile ku Jeffersonville, Indiana, ku ntanta wa miles 35 [kilomeeta 56] ne kwetu kumbelu, bilondeshile cikeena-kumona civwaye mumone cya kânà kaa mukooko bakakwate mu cipeela kiikale kadila kateela “Milltown” (Ke mwaba mene ûndì mêmè musombele). Mwaneetu Branham kavwaku mwanji kufika muneemu emu kacya anyi bamumanyeku kudi muntu wa muneemu emu to. Paabwediye, kuntentekelaye byanza ne kunsambidilaye, usoka dînà dya Mukalenge wetu munanga Yesu pambidi paanyi. Ke kwenzabi anu bu ne Cintu kampanda cyakankwata, nenku mêmè kujuuka dyakamwe mwikale ngela Nzambi twasakidila bwa bukole Bwende bwa dyondopa. Nkaadi mpindyewu mwimbi wa cisanji cya piànô mu ekeleeziya wa ba-Baptistes muneemu emu.”
Georgia Carter, Middletown mu Indiana, wakondopiibwa ku disaama dya cyâdì mu 1940 ne kaakadisaamaku kabidi dituku dikwabo nansha dimwe to mu nsòmbelu wende. Yêyè ncileejilu cya bantu binunu makumi batu bondopiibwe mu mudimu wende wa bwambi ne bacidi anu benda bondopiibwa too ne leelu ewu.