Dîngà dituku mêmè kwangata dipangadika dya kupeta mushindu wa kukosoloka ne dibiikila adi. Mvwa mupatuke ngenda nya kudi dîbà dibwelela bwa kwenza mudimu mu ferme kampanda. Mulunda wanyi, Nzambi’s mmunene kwine kwônsò aku anu bu mudiye mu mwaba mukwabo wônsò ewu. Anyisha ubweleleku ku dilabula dyanyi mêmè edi. PaakubiikilaYe, wâMwitaba.
Dinda kampanda dya ngondo wa citeema wa cidimu cya 1927, mêmè kwambila maamu ne mvwa nya ku lwendu lwa kuya kenza cituudilu ku Tunnel Mill, kudi bule bwa miles dikumi ne inaayi [kilomeeta ipacila ku makumi abidi ne isatu] kuumukila ku Jeffersonville kutuvwa basombele musangu awu. Nkaavwa mumane kulongolola lwendu lwa kuya ku Arizona ne balunda baanyi bakwabo. Paakalwa maamu kupeta kabidi luumu lwa kûmvwà, ncicivwa ku Tunnel Mill to, kadi nkaavwa ku Phoenix, Arizona, ngenda nyeema Nzambi wa Dinanga awu. Nsombelu wa mu ferme kwikalaye mwîmpè bwa cikondo kampanda, kadi abidi mmale asatu mmîpì ke yêyè kuntondaye, anu mùtù disanka dikwabo dyônsò dya pa buloba edi. Kadi Nzambi atumbe, anyishaku ngǎmbè mwaba ewu ne, dilabula ne Yesu ditu dyenda dishaala misangu yônsò ditwe nsukaadi kadiyi ditondaku to. Yesu utu wafila ditalala dipwangane ne busambi misangu yônsò.
Misangu yàbûngì nkaadi mumvumvwe cipeepele cituuta mu mici mileemile ya pins. Bivwa anu bu ne mvwa mwa kuumvwa Dîyì Dyende dibiikidila lwa kule mu diitu, dyamba ne: “Adama, udi penyi?” Mitooto ivwa anu bu ne ivwa mipwekelele mu mushindu wa uyikwata ne byanza. Nzambi uvwa anu bu ne uvwa pabwîpì menemene.
Cintu cimwepele cìtù cimweka bu ne cicidi cingambila maalu àbûngì too ne leelu ewu pa bidi bitangila ditunga adi mbibeeba bya mu cipeela. Wêwè mudidinge mupambuke mupatuke mu cibeeba, udi ujimina anu bipeepele nunku ewu. Misangu yàbûngì beena ngendu ya dibandila dya myaba batu bamona tuubilongo twa mu cipeela kadi kuumuka mu cibeeba bwa kuya katutuula. Batu balaluka mu cipeela too ne mudibo bakajimina ne mîngà misangu bafwa bwa nyoota. Ke mudibi kabidi mu njila wa bwena Kilisto—Nzambi utu ne cibeeba. Udi ucyamba mu Yeshaayi, nshapita wa 35. Badi bacibiikila ne “Cibeeba cya Cijila.” Misangu yàbûngì bisankasanka bya pa buloba bitu bikukoka bikulalula kule ne cibeeba. Dîbà adi wajimiji dilabula dyebe ne Nzambi. Mu cipeela paudi mujimine, kutu mîngà misangu kumweneka mâyì a bakishi. Bwa bantu badi munkaci mwa kufwa nyoota, mâyì a bakishi awu neikale bu musulu anyi dijiba. Misangu yàbûngì bantu batu banyeemenaku ne bakadishindamu kadi basangana ne badi anu munkaci mwa dyowa lusenga lwa mudilu. Mûngà musangu dyabulu udi ukuleeja cintu kampanda cidiye yêyè wamba ne ndipicisha dya kapeepe. Cidi anu mmâyì a bakishi cyanaana, ncintu cidi kaciyi anu cya bushuwa to. Wêwè mwambe ne uciteeleje neudisangane ukaadi udinowela tunyinganyinga pa mutu webe awu. Kumucyuku yêyè awu to, wêwè mubadi muswibwe. Itabuuja Yesu utu wafila mâyì a mwoyi kudi aba badi ne nzala ne nyoota.
Dîngà dituku mêmè kupeta mukanda mumfundila ufumina kwetu mwikale ungambila ne umwe wa ku baakunyi baanyi baa balume uvwa usaama bikole. Uvwa ng’Edward, mwakunyaanyi uvwa mundonde munyima. Mu bushuwa bwa bwalu ncivwa mwele meeji ne disaama divwa ndya dikole to, pa nanku mêmè kwela meeji ne něumvwè anu bîmpè. Kadi diloolo kampanda paanyima paa ndambu wa matuku mêmè mwikale ngumukila mu cimenga mpicila lwa ku nzubu wa cidiilu wa ferme, mêmè kumona dibeji dya mukanda pa meesa. Mêmè kudyambula. Bavwa bambamu ne: “Bill, patukila lwa ku mpàtà wa ku nord. Mbwalu bwa mushinga mukole be.” Pângààkamanà kubala kabeji aku ke mêmè ne mulunda wanyi kampanda twêtù kuya lwa ku mpàtà mwine awu. Muntu wa kumpala ûngààkatuutakeenà nende uvwa mmulami wa diitu mukulumpe wa ku Texas uvwa wenza mudimu mu ferme mwine awu. Dyende uvwa Durfy, kadi tuvwa bamwinyike dînà ne “Pop.” Uvwa ne kwîsù kubungame paakangambilaye ne: “Mwanaanyi Billy, ndi mukutwadile mukenji wa dibungama.” Pa dîbà diine adi ke mfumu wa keetu kasumbu kulwaye mwaba utuvwa awu. Bôbò kungambila ne mukenji ucivwa ufikilaku ku nshinga mwikale wamba bwa lufu lwa mwaneetu wa balume.
Mulunda wanyi munanga, ngâkanji kushaala katanci too nciyi mwa kunyungaku to. Civwa ndufu lwa musangu wa mbedyambèdì bwa mu dyetu dîkù. Kadi cîndì njinga kwamba ncya ne meeji a kumpala akamvwila avwa ngaa kumanya ne yêyè ukaavwaku mudilongolole ku lufu anyi. Ndi mwenze anu nkudimuka bwa kutuma mêsù ku luseke lukwabo lwa mpàtà awu uvwa wa kàlaabi, binsonji kadi kuntunkumuka bimpwekela pa matama. Kadi ke mêmè kubanga kuvuluka mutuvwa nende twadikuma eku twadikuma eku patucivwa bânà bakese ne mushindu mwine uvwa maalu matukolele.
Tuvwa tuya mu kalaasa katuyiku ne kantu kiine kaa bushuwa aka kaa kudya to. Bânà baa nkàsà mu bisabaata bapatuke pambelu ne tuvwa ne cya kuvwala nkooci mikulakaji milamakaja ne mpengele lwa ku nshingu eku bu mutuvwa katuyiku tuvwala miteelu to. Ke mêmè kuvuluka kabidi dituku dikwabo divwa Maamu mwele ndambu wa matala makanga mu kambekeci bwa didya dyetu dya mundaamuunya. Katuvwa tudiila kaaba kamwe ne bakwabo bânà to. Katuvwa ne mushindu wa kupeta byakudya muvwabo bôbò naabi to. Tuvwa misangu yônsò mwa kuditapa e kuya lwa pamutu paa kakuna bwa kadiilapu. Ndi mvuluka dituku diine ditwakapeta matala makanga adi kadi twêtù kwela meeji ne ncya kudya cyebe cya dinoono eci. Pa nanku bwa mêmè kutwishiibwa ne mvwa ne cya kupeta wanyi ndambu wa matala awu ngâkapàtuka kumpala kwa nkankala, mêmè kwangata dyanyi dyanza kumpala kwa mwaneetu awu kwangataye wende ndambu.
Nenku pângààkashààlà mwimane mwaba awu ne mêsù matangija ku mpàtà awu uvwa muunya muumishe, ke meeji aanyi kuyawu ku bintu byônsò abi, nenku mêmè kudikonka ne Nzambi uvwa mumwangateku mumuteeke mu kaaba kîmpè menemene anyi. Ke Nzambi kumbiikilaye cyakabidi, kadi anu bu pa ciibidilu ke mêmè kwenza mwanyi mwônsò bwa kucilwisha.
Mêmè kudilongolola bwa kwalukila kwetu bwa dijiikiibwa dyende. Révérend McKinny wa Port Fulton Church, muntu udi bwanyi mêmè anu bu taatu, paakayiishaye diyiisha dyende dya ku citalu adi ke kwambaye dîyì dya ne: “Kudi mwa kwikala bamwe bantu mwaba ewu badi kabayi bamanye Nzambi to, byôbì nanku, mutekemenaayi mpindyewu.” Kaa, kadi ke mêmè kuupukila nkwasa ûmvwà musombele, Nzambi nguvwa wakula naanyi cyakabidi. Mubadi muswibwe, paabiikilaYe, wâMwitaba.
Ncyadyakupwaku mwoyi mwakadilabo kudi Taatu wanyi ne Maamu bakulakaje bakwate ne bya luse paanyima paa dimujiikabo adi to. Mvwa nkeba bwa kwalukila kudi Dîbà Dibwelela kadi maamu kunsengeleelaye ne mwende mwônsò bwa mêmè kushaala, ke ndekeelu wa byônsò mêmè kwitaba bwa kushaala bu mêmè mwa kupeta mudimu. Ntanta mukese naka mêmè kupeta mudimu ku Cyapu cya Midimu ya Mbulamatadi wa Indiana, kûndì mwangaciibwe ku mudimu mpindyewu ewu.
Paakapitaku bidimu bitwe ku bibidi, mêmè munkaci mwa dikenketa ma-compteurs mu ditanda dya ma-compteurs mu Cyapu cya Gaz cya mu New Albany, ke gaz kumbwelayi mu dyûlù, nenku cyôcì aci kunsaamisha munda mwa mbingu. Mêmè kuya kudi bangangabuka bônsò bâmvwà paanyi mumanye abo. Nciyi mwa kupetaku diikisha nansha. Mêmè kusaama cifu, cijuula kudi bwenzeji bwa gaz ayi. Disaama ke kubangadi dyenda dikola misangu yônsò. Kuyabo naanyi kudi bangangabuka baa dimanya dya pabwadi baa mu Louisville, Kentucky. Ndekeelu wa byônsò bôbò ne civwa nkalaalaala, nenku kwambabo ne bivwa bikengela kumpanda. Mêmè ncivwa mwa kuciitabuuja to, bwalu ncivwaku ne cintu cinsaama lwa mu luseke lwanyi emu to. Bangangabuka kwambabo ne kabacivwa kabidi ne cya dingenzela to anu bôbò bampande. Ndekeelu wa byônsò ke mêmè kwitaba bwa kucyenzabo kadi mwikale nsuminyina bwa kuntwabo bwanga bwa dibenga kunsaamisha pa mwine mwaba awu bwa ngaamona mwa kwikala mbandila padibo bampanda apu.
Kaa, kadi ke mêmè kujinga bwa muntu uvwaku mumanye Nzambi ikale mungimanyine ku luseke. Mvwa ngitabuuja mu disambila kadi ncivwa mumanye mwa kusambila to. Pa nanku mwambi wa mu Ekeleeziya wa Kumpala wa Ba-Baptistes kuyaye naanyi mu cibambalu cya dipandangana.
Mbenze anu bangumusha ku meesa awu baya naanyi mu bulaalu bwanyi, mêmè kudyumvwa ngenda nteketa ngenda nteketa dîbà dyônsò. Mwoyi wanyi ukaavwa kauciyi utuuta kabidi bikole to. Mêmè kuumvwa Lufu lungikile. Mweyelu wanyi kubanga ukaadi wenda ukeepa dîbà dyônsò. Mêmè kumanya ne ngaafiki kundekeelu kwa njila wanyi. Kaa, mulunda wanyi, indila’s wǎnjì ufike pa mwine mwaba awu, ke paakuvwila meeji a bintu byàbûngì byûkaadì mwenzenze abi. Mvwa mumanye ne kacya ncivwaku munwe mfwanka, munwe maala anyi mwikale ne biibidilu kampanda bya bukooya to, kadi mvwa mumanye ne ncivwa mudilongolole bwa kutuutakeena ne Nzambi wanyi to.
Mulunda wanyi, wêwè mwikale anu mwena ekeleeziya naka wa mmwenekelu wa kwîsùkwîsù wa mukwate mashika ewu, neukamanye pawafika kundekeelu ne kwêna mudilongolole to. Pa nanku, piikalabi ne ke cyebe cyônsò cyûdì mumanye pa bidi bitangila wanyi Nzambi ewu, ndi nkulomba anu mwaba ewu bwa uye ku binu ulombe Yesu akupe dilabula adi dya Dilediibwa dya cyakabidi, mwakambilaYe Nikodeme mu Yone, nshapita 3, kaa, ne ngonga ya disanka’s neidile. Dînà Dyende ditumbe.