Mu cibambalu cya lupitaadi aci mwakabanga mwenda mwenza mîdimà byenze anu bu mu diitu dinene. Mvwa mwa kuumvwa cipeepele cituuta mu mabeji, paaci cyumvwika bu civwa kule menemene mu diitu. Ukaadiku pàmwǎpa mumvwe dituuta dya cipeepele cikole ciikale cituuta mu mabeji, ciikale cyenda ciseemena cyenda ciseemena mwaba ûdì. Mêmè kudyambila mundamunda ne: “Ee, ke lufu lukaadi lulwa kungangata elu.” Kaa! Bivwa bikengela musuuka wanyi utuutakeene ne Nzambi, ke mêmè kuteeta mwa kusambila kadi nciyi anu mumanye mwa kusambila to.
Cipeepele cyenda ciseemena, cyona cyenda cibanda cyenda cibanda. Mabeji adila bu makasa, dyakamwe mêmè muye.
Kumwekabi dîbà adi bu ne nkaavwa mwalukile mushaale cyakabidi mwânà mutekete ku makàsà kutupu, mwimane mu kajila aku mwinshi mwa muci umweumwe awu. Mêmè kuumvwa dîyì dimwedimwe dyakamba ne: “Kunu maala nansha mfwanka” adi. Ne mabeji âmvwà ngumvwa awu avwa amweamwe a bwena akatuutabo kudi cipeepele mu muci awu dituku adi.
Kadi ewu musangu dîyì kwamba ne: “Ndi mukubiikile kadi kuyi muswe kuya to.” Kwambululadi nanku musangu mwisâtù.
Apu nanku mêmè kwamba ne: “Mukalenge, piikalabi ne ngwêwè, anyisha ngaalukile pa buloba nenku nênyiishè Evanjeeliyo Webe mwimanyine pa misonga ya nzubu ne mu masangu a mìsèèsù. Nêngàmbilè bantu bônsò bwa bwalu abu!”
Paakamana kupita cikeena-kumona eci, mêmè kumona ne ncivwaku muumvwe bîmpè bya menemene to. Ngangabuka uvwa mumpande awu ucivwa anu mu nzubu amu. Wakalwa kuntangila kadi kupapukaye. Uvwa mumweke anu bu uvwa wela meeji ne mvwa mwa kwikala mumane kufwa, ke kwambaye mwaba awu ne: “Mêmè ewu ncitu muntu utu uya mu ekeleeziya to, bûngì bwa bantu bàtù bàntancilà mêmè mbunene be, kadi ngajingululu ne Nzambi ngudi musambe mwânà wa balume ewu.” Cyakambilaye dîyì adi, ncyêna mumanye. Muntu nansha umwe kavwaku mwanji kwamba bwalu pa bidi bitangila cyôcì aci to. Bu cikondo aci mêmè mwikale mumanye bîndì mumanye mpindyewu ebi, mvwa mwa kwikala mujuuke mu bulaalu abu ngenda ngela mbila ya Butumbi bwa Dînà Dyende.
Paanyima paa ndambu wa matuku ke bôbò kumpa dyanyisha dya kwalukila kumbelu kadi mêmè mucĭkàle anu nsaama ne mwenzejiibwe bwa kwikala kuvwala binete ku mêsù bu mucivwawu amona bitaayitaayi. Mutu uvwa unnyungakana pâmvwà nshaala mutangile cintu mutanci.
Mêmè kupatuka kuya ngenda nkeba bwa kupeta Nzambi. Ke mêmè kwenza ngûmuka mu ewu ekeleeziya ngâya mu ekeleeziya mukwabo mwikale ntata bwa kupeta mwaba uvwa mwa kwikala dibiikila dya ku cyoshelu dya mu mushindu wa cyena kale. Cìvwà cyenza dibungama ncya ne ncyakapetaku mwaba nansha umwe to.
Mvwa ngambamba ne bu mêmè mwa kwikala mwena Kilisto, mvwa mwa kujinga kwikala anu wa menemene. Mwambi kampanda wâkangumvwa ngamba dîyì adi kwambaye ne: “Mpindyewu wêwè mwanaanyi Billy, neuye kule too ne ku Dikolesha dya maalu.” Mvwa anu ngambamba ne mêmè mudidinge mupete ntendeleelu, mvwa muswe mmuumvwe padiye ulwa apu anu bu mwakamuumvwabo kudi bayiidi amu.
Kaa, Dînà Dyende ditumbe. Mêmè kupeta ntendeleelu pashiishe ne nyewu ncidi anu nende, ne ku dikwacisha Dyende nêmmulamè tootooto.
Diloolo kampanda mêmè kuumvwa nzala yàbûngì ya Nzambi ne ya dilabula dilelela mu mushindu wa ne ngâkapàtuka kuya lwa ku cisaasa cya kale lwa kumfundu kwa nzubu ne nâkateeta mwa kusambila. Ncivwa mumanye mwa kusambila mu ciine cikondo aci to, ke pa nanku mêmè kubanga patupu kwakula Nende anu bu mûndì mwa kwakula ne muntu kana yônsò ewu. Dyakamwe kulwaku bukênkè mu cisaasa amu, kwenzabu nkuruse, ne dîyì kupatukiladi mu nkuruse mwine amu ne kwakuladi naanyi mu mwakulu ûmvwà mêmè nciyi mwa kuumvwa to. Pashiishe bwôbù kuumuka kuyabu. Mêmè kushaala bu mukwacike ku nzembu. Pângààlu kupingana mu mêmè, mêmè kusambila kabidi ne: “Mukalenge, piikalabi ne ngwêwè, swaku walukile cyakabidi wakule naanyi.” Mvwa mbala Bible wanyi kubangila anu pâmvwà kumbelu ku cipatukidi cya mu lupitaadi, nenku nkaavwa mubale mu 1 Yone 4 ne: “Bananga, kanwitabuuji nyuma yônsò cyanaana to, kadi nuyiteete nê nya kudi Nzambi.”
Mvwa mumanye ne nyuma kampanda uvwa mummwenekele, nenku pângààsambìdì yêyè kummwenekela cyakabidi. Nenku kungenzekalabi anu bu ne mbanguumushe bujitu bwa livres de poids binunu bibidi [kìlô 907] mu musuuka wanyi. Mêmè kutupika kwimanyina kuulu kadi kuvukuta lubilu too ne kwetu kumbelu, biine abi byenze anu bu ne mvwa nyeema lubilu mwikale ngendela mu lupeepa.
Maamu kunkonkaye ne: “Bill, cidi cikwenzekele ncinganyi?” Mêmè kumwandamuna ne: “Ncyêna mumanye to, kadi bushuwa budi ne ndi ndyumvwa bîmpè ne mupeepele.” Ncicivwa mwa kushaala kabidi mu nzubu amu to. Bivwa bikengela anu kupatuka kuya ngenda nyeemakana mbilu.
Ke mêmè kumanya mwaba awu ne Nzambi Yêyè muswe bwa mêmè kuyiisha, uvwa mwa kungondopa, pa nanku mêmè kuya ku ekeleeziya kampanda kuvwabo biitabuuja dilaabangana dya maanyi, ke mêmè kwondopiibwa anu pa cibanza. Ke mêmè kumona mwaba awu ne bayiidi bavwa ne cintu kampanda cidi ciibûngì cya bambi leelu ewu kabayi naaci nansha. Bayiidi baakabatiijiibwa ne Nyuma Mwîmpè ne pa nanku bavwa mwa kwondopa babeedi ne kwenza bishima bya bukole mu Dînà Dyende. Pa nanku mêmè kubanga kusambila bwa dibatiiza dya Nyuma Mwîmpè ne mêmè kudipeta.
Dîngà dituku paanyima paa ngondo mitwe ku isambombo, Nzambi kumpaye dijinga dya mwoyi wanyi. Yêyè kwakula naanyi munda mwa bukênkè bunene mwikale ungambila bwa kuya kayiisha ne kasambidila babeedi ne Yêyè mwikale mwa kubondopa nansha disaama dyabo diikale dya bishi. Mêmè kubanga kuyiisha ne kwenza cyakangambilaYe bwa kwenza aci. Kaa, mulunda wanyi, ncyêna mwa kubanga dikulondela byônsò bidi byenzeke to: Mêsù a bampofo mmatabale. Balema mbendè. Kansere yàbûngì mmyondopiibwe ne bishima bya mishindu yônsò mbyenjiibwe.
Dîngà dituku kwinshi kwa mùsèèsù wa Spring Street, mu Jeffersonville, Indiana, paanyima paa ditabuluja dya mbingu ibidi, mvwa munkaci mwa kubatiiza bantu 130. Divwa dituku dya luuya lukole dya ngondo wa mwandamukulu, nenku pavwa bantu batwe ku binunu bisatu mwaba awu. Nkaavwa anu ne mbatiize muntu wa 17, ke dyakamwe mêmè kuumvwa cyakabidi kaadîyì katekete menemene aku kamba ne: “Banduluka.” Kuulu kuvwa kwenze mùtù cyamu cya kabanda mu dituku adi dya luuya lukole dya ngondo wa mwandamukulu. Katuvwa bapeteku mvula nansha wa kânà to kukaavwa mbingu mitwe ku isatu. Mêmè kuumvwa kabidi dîyì adi, nenku musangu mwisâtù ewu kwambadi kabidi ne: “Banduluka.”
Mêmè kubanduluka kadi kulwaku mutooto munene ubalakana uumukila muulu, ûnkaavwà mumonemone misangu yàbûngì kumpala kadi nciyiku munwaˇmbìlebù to. Misangu yàbûngì nkaadi mwambilembile bantu mùtù mutooto awu umweka kadi biikale anu bafwa mu tuseku bamba ne: “Bill, aci wêwè’s ngudi udifwanyikijilaci. Anyi pàmwǎpa uvwa uloota.” Kadi Nzambi atumbe, bwa ewu musangu Yêyè kudileejaYe mumweneke ku mêsù a bantu bônsò, bwalu mutooto awu wakapwekelela panshi menemene mwaba ûmvwà awu mu mushindu wa ne ngâkapanga ne mwa kwakula. Paanyima paa ndambu wa tusunsukila twa dîbà tumane kupita, mêmè kwela lubila lukole ne bantu bààbûngì kubandulukabo e kumonabo mutooto awu anu kumutu kwanyi menemene. Bamwe kufwabo cipuuka pavwa bakwabo beela mbila ne bakwabo bavukuta mbilu baya. Pashiishe mutooto kwalukilawu muulu, ne kaaba kaakuumukawu kavwa kaa cipaapu cya makàsà matwe ku asambombo [centimètres 15,24] mu nseke yônsò, nenku kaaba kiine aku kushaalaku kanyungakanangana ne kavwanduluka byenze bu ne mmavwala atuuta. Kwakenzeka kaaba kiine aku kaaditutu kakese katooke, ne mutooto awu wakaangaciibwa mu kaaditutu kakese aku.