Mêyì a ndekeelu menemene adi mafunda mu Dipungila Dikulukulu adi afila mulayi ewu ne: “Monaayi, nênnùtùmìnè Eliya muprofeta kumpala kwa dilwa dya dituku dinene dya MUKALENGE didi dikwacisha bwôwà: Nenku neakudimune myoyi ya baataatu bwa kuyitangija kudi bânà, ne myoyi ya bânà bwa kuyitangija kudi baataatu baabo, bwa ncilu kubutula buloba ku mulawu.” (Maal. 4.5-6)
Dituku dinene dya Mukalenge didi dikwacisha bwôwà dicidi dilwa, pa nanku bikengela tukebe muprofeta Eliya ne meeji etu matooke ônsò. Mu Bible, baprofeta kabavwa balwa kudi malongolodi a ntendeleelu avwabo biitaba kudi bantu bàbûngì to. Bavwa balwa kudi basungula banyaabanya. Elaayibi meeji tǔng ne bu muprofeta wa Maalaki 4 awu mwa kulwa, cibì kumupangilabo. Twǎmbè tǔng bu yêyè mwikale mufwanangane ne baprofeta baa kale, ne anu dyanza dya bantu kumujingululabo? Piikala muprofeta ewu ne cya kwalukila mu dituku dya ndekeelu, netumanye munyi? Dyandamuna ndimweke patooke mu Mifundu. Yêyè neikale ne ngiikadilu wa muprofeta. Neamanye maalu masokome a mu mwoyi. Neěnzè bishima. Malongolodi a ntendeleelu neakebe bwa kumudyombola. Kadi nekwikale basungula banyaabanya badi bamujingulula bu musanjeela mulaya wa dituku edi.
Netumanye munyi paalukila Eliya? Ngiikadilu kaayi yaleejaye bwa twêtù kumujingulula?
Eliya uvwa muntu wa mu cipeela. Bimanyinu binene ne maalu a kukema bivwa bishindikija mudimu wende wa bwambi. Uvwa uyiisha ulwishangana ne maalu mabi a mu dituku dyende. Wakayiisha nangananga mwikale ulwisha masandi a Mukalenge mukaji Izabela. Paakambwibwa Eliya mu dyulu mu dikalu dya kapya, nyuma wende wakapona pambidi paa Elisha. Bimanyinu binene ne maalu a kukema ke kwikalabi cimanyinu cya mudimu wa bwambi wa Elisha pa dîbà adi, ne wakayiisha pende mwikale ulwisha mpekaatu ya baa pa buloba. Baprofeta aba bubidi bwabo bavwa baditole biikale bayiisha balwisha malongolodi a ntendeleelu a mu dituku adi. Bidimu nkama bimane kupita, nyuma umweumwe ewu wakaalukila pa buloba munda mwa Yone Mubatiiji. Muprofeta Maalaki ngwâkadyànjila kwamba ne Eliya nealukile bwa kuleejaye Mukalenge: “Monaayi, nêntumè musanjeela wanyi, ne yêyè nealongolole njila kumpala kwanyi…” (Maalaki 3.1). Yone Mubatiiji uvwa anu bu muvwabi ne nebyenzeke mushindu awu bu muvwaye ubiikila bantu ku kanyinganyinga munkaci mwa bânà baa Nzambi. Anu bu Eliya, yêyè wakayiisha mwikale ulwisha mfumu ne malongolodi a ntendeleelu a cyena leelu. Mukalenge Yesu wakashindika ne Yone Mubatiiji uvwa muprofeta wa Maalaki 3 mu Mukanda wa Maataayi (11.10) ne: “Bwalu yêyè ewu, ke udibo bafunde bamba ne: Monaayi, ndi ntuma musanjeela wanyi kumpala kwebe, wîkala mwa kulongolola njila webe kumpala kwebe.” Luuka 1.17 udi wamba ne nyuma wa Eliya (Elias) uvwa ne cya kwikala mu Yone Mubatiiji: “Nenku yêyè neaye kumpala kwende mu nyuma ne bukole bya Elias, bwa kukudimuna myoyi ya baataatu bwa kuyitangija kudi bânà.” Kadi tangilaayi bîmpè ne citupa ciibîdì cya Maalaki 4 cicivwa ne cya kuula: “…ne myoyi ya bânà bwa kuyitangija kudi baataatu baabo, bwa ncilu kubutula buloba ku mulawu.” Aci citupa cya Mufundu necyenzeke kumpala kwa Dilwa Diibîdì dya Kilisto.
Bidimu binunu bibidi paanyima paa Yone Mubatiiji, dîbà ndyedi dyǎkùmbanyi kabidi bwa nyuma wa Eliya kwalukilaye pa buloba.
Dituku adi dyafiki! Mu cikondo eci, tudi bamone nyuma wa Eliya mwalukile. Mmwele kadyombo ku ndongolwelu wa cyena mangumba. Mmukandameene mpekaatu ya baa pa buloba. Mmuleeje bimanyinu ne maalu a kukema bûngì kabuyi kubala. Mmuyiishe Bible ku mwaku ne ku mwaku kuumukila ku Genese too ne ku Bwakabuulwibwa. Muprofeta wa Maalaki 4 awu mmulwe anu mwakalayabo, ne mmutwale Mukenji uumukila ku Nkwasa wa butumbi wa Nzambi wa Bukole bwônsò. Dînà dya muprofeta mwine awu didi William Marrion Branham. Tutu tumubiikila ne “Mwaneetu Branham.”
“William Branham, ûmvwà mêmè ewu munange ne mwitabuuje ne mmuprofeta wa Nzambi.”
Oral Roberts, mutangadiki mwende luumu wa buloba bujima ne mwibaki wa Université Oral Roberts.
“William Branham wakalwa kutudi bu muprofeta wa Nzambi ne wakatuleeja mu bidimu bya cinunu ne nkama citeema ebi bintu bimwebimwe menemene byakatuleejabo mu Evanjeeliyo… Nzambi mmusambe bantu Bende, bwalu muprofeta munene mmujuuke munkaci mwetu.”
Dr. T.L. Osborn, mutangadiki wa beena Mpenta ne mufundi wa dipoko.
“Kumpala kwa kusambidilaye muntu, yêyè uvwa mwa kwanji kwamba kantu ne kantu anu mu kôkò pa bivwa bitangila masaama a muntu awu, ne kantu ne kantu kabidi pa bivwa bitangila nsòmbelu wende=cimenga civwaye musòmbele, midimu ivwaye wenza, byenzedi byende—mene too ne maalu a pacivwaye mwânà mutekete. Kacya musangu wende nansha umwe Branham kaakatupakanaku mu dîyì dya dimanya adi munda mwa bidimu byônsò bîmvwàku nende abi nansha. Ciine aci ncyangate, bwanyi mêmè, binunu bya maalu.”
Ern Baxter, mutangadiki, mulongolodi wa Tumpanye twa Branham munda mwa bidimu mwandamutekete, mwikale kabidi umwe wa ku balombodi baa nzanzanza baa Mouvement de la Nouvelle Église Britannique.
Kacya anu Mukalenge Yesu Kilisto wendela pa buloba ebu muntu nansha umwe katuku mufile bwenzeji pa baa pa buloba mu mushindu wa ndondo nanku to. Kuumukila ku ntwadijilu wa bupwekele mu kazubu kaa cibambalu cimwe mu mikuna ya mu Kentucky, too ne ku Amarillo, Texas, kwalu Mukalenge kumwangata kamufila Kwabo, nsòmbelu wende uvwa ku musangu ne ku musangu mumweneshiibwe ne maalu matambe mfukilu. Ku bulombodi bwa Mwanjelo wa Mukalenge mu cidimu cya 1946, mudimu wa bwambi wa Mwaneetu Branham wakapatula kantolantola kaa mudilu kaakateemesha kapya mu cipungu cijima cya matabuluja manene a dyondopa akatangalaka eku ne eku kwa Amerike too ne mu nyungulukilu wa buloba bujima. Too ne leelu wa Ndaaya ewu, mbamumanye kudi bafundi baa maalu malonda a bwena Kilisto bu “taatu” ne “muleeji wa dikàsà” wa ditabuluja dya dyondopa dya mu bidimu bya 1950 dyakashintulula Ekeleeziya wa cyena Mpenta ne dyakajuula nkwaka wa groupes Charismatiques mu mushindu mutumbuke menemene, udi leelu ewu mwikale ne bwenzeji pa dingumba ne dingumba dyônsò dya cyena Mishòònyì. Nansha nanku, anu bu muvwabi ne nebyenzeke mushindu awu, mangumba adi àkèèka malongesha ende ne abenga kwitaba mudimu wakamutumabo naawu.
Kwônsò kuvwaye uya, Nzambi uvwa ujaadika ne Mwaneetu Branham mmuprofeta mutumina lukongo elu. Anu muvwa Yobo, Mukalenge uvwa wakula nende mu mvunda. Anu muvwa Môsà, baakamona Dikunji dya Kapya dyenda dimulombola. Anu muvwa Miika, bavwa bamwamba mambavi kudi balombodi baa bitendeleedi. Anu muvwa Eliya, uvwa muntu wa myaba ya cipeela. Anu muvwa Yelemiya, wakatumiibwa ne mudimu kudi Mwanjelo. Anu muvwa Danyele, wakamona bikeena-kumona bya maalu acivwa alwa. Anu muvwa Mukalenge Yesu, uvwa umanya maalu masokome a mu myoyi. Ne anu muvwa Pôlò, uvwa wondopa babeedi.
Mukalenge mmulwe cyakabidi kusamba bantu Bende kupicila ku muprofeta. Mu cikondo cya maalu malonda cya mîdimà mitambe bukole, mudi nsòmbelu wa maalu mîmpè mushaale wa ciipanshi muye too ne mu ndondo mu mushindu wa katuyiku banji kumona kacya to ne bingoma bya kabutu byenda bitundubuka ku ntengu ya buloba, muntu wa bupwekele kutumiibwaye ufumina mu bwikadi bwa Nzambi bwa kubiikila cisa cidi cìpùnga ne lufu bwa kubafikisha ku kanyinganyinga.
Muyiidi munanga Yone ufundile bwa Mukalenge Yesu ne:
Nenku kudi kabidi bintu bikwabo byàbûngì bidi Yesu mwenze, biine abi, bu byôbì bikengela kubifunda ku cintu ku cintu, ndi ngela meeji ne nansha buloba bwine kabuvwa mwa kupeta mwaba wa kuteeka mikanda ivwa ne cya kwikala mifundiibwe nansha. Amen. (Yone 21.25)
Cintu cimwecimwe eci tudi mwa kucyamba bwa nsòmbelu wa Mwaneetu Branham. Kudi mayiisha makwata pa mikaba mapite pa 1.200 mwikale musanganyiibwa binunu bya maalu adibo balonde pa nsòmbelu wa muntu wa bukitu ewu. Nyewu tucidi anu batungunuke ne kuumvwa majaadiki a bwenzeji bwende pa nsòmbelu ya mìlìyô ne mìlìyô ya bantu. Kakanda aka kî nkafwanyineku nansha kufika ciibwîpì ne kwamba cikuma cidi muntu wa Nzambi ewu mwenze pa bantu baa pa buloba to.