Misambu 96.13

Kumpala kwa MUKALENGE: bwalu yêyè ulwalwa, bwalu ulwalwa bwa kulumbulwisha buloba: nealumbulwishe baa pa buloba ne bwakane, ne bantu ne bulelela bwende.

Kudi binunu bya mangumba mashiileshiilangane pa buloba leelu ewu. Ntendeleelu yônsò udi anu upiisha ntendeleelu mukwabo, cibì yônsò idi ilaya lupandu kupicila ku dingumba dyabo bôbò. Mmunyi mutwamanya dya kusungula?

Twêtù basungule ekeleeziya wa Katolike, nanku’s twitabuuji ditwakwila dya bansantu, dya bwalu didi anu disambila dya mpingu. Bible udi wamba ne: “Bwalu kudi Nzambi umwepele, ne mutwangaji umwepele pankaci paa Nzambi ne bantu, muntu ewu Kilisto Yesu.” (I Tim 2.5). Badi babiikila nsaserdose ne “Taatu” ciine cyakakandikabo kudi Yesu mu Maat. 23.9 ne: “Ne kanubiikidi muntu nansha umwe pa buloba ne taatu nansha: bwalu umwepele ngudi Taatu wenu, udi mu dyulu awu.” Beena Assemblées de Dieu badi batwambila ne kwakula kwa mu myakulu ke cileeji cya nzanzanza cya Nyuma Mwîmpè, padi Pôlò mwambe ne: “Nansha mêmè ngakula mu myakulu ya bantu ne ya banjelo, kadi nciyi ne luse to, ndi mulwe bu cyamu cidi cyenza mutooyi, anyi cyamu cya kukumakaja cidi cidila.” (I Kol. 13.1)

Mangumba pabwîpì ne ônsò atu anu lukasa bwa kutwambila ne bintu byàbûngì mu Bible mbabyŭmvwìje bibi, bijimine pa dîbà dya kubikudimuna, anyi kabyena bikumbana bwa bantu baa leelu. Pa nanku, citudi ne cya kwitabuuja m’Bible anyi mmalongesha a cyena mangumba? Nzambi neěnzè mudimu ne cinyi bu cipimu bwa dilumbulwisha?

Mêmè mwa kukonka beena Katolike apa diloolo edi ne: “Nudi nwela meeji ne Nzambi nealumbulwishe baa pa buloba ne cinyi ?” Beena Katolike nebămbè ne: “Ne Ekeleeziya wa Katolike.” Eyo, mpindyewu ng’Ekeleeziya wa Katolike kaayi? Mpindyewu nyawu badi ne wa cyena Loomo, Orthodoxe wa cyena Gelika, ne mikwabo bûngì cyakaa. Ncifwanyine kwikala Ekeleeziya wa Katolike kaayi? Ba-Luthériens badi bamba ne: “Ne twêtù,” mwaba awu’s nwênù ba-Baptistes nwashaadi ku luseke. Nenku pashiishe twêtù mwa kwamba ne: “Ne ba-Baptistes,” mwaba awu’s nwênù beena Mpenta nwashaadi ku luseke. Pa nanku nkufwanyine kwenzeka cibwejakaji cya dikema, muntu nansha umwe kayi umanya cya dyenza to; pa nanku Yêyè katu mulaye bwa kulumbulwisha baa pa buloba ku ekeleeziya to.

Yêyè mmulaye bwa kulumbulwisha baa pa buloba ku Kilisto, ne Kilisto n’Dîyì. Nenku Bible ke wâlumbulwisha baa pa buloba, yêyè udi Yesu Kilisto umweumwe awu makeelela, leelu, too ne kashidi.

Myaba ya kubala

Yone 1.1

Ku cibangidilu kwakadi Dîyì, ne Dîyì dyakadi ne Nzambi, ne Dîyì dyakadi Nzambi.

Yone 1.14

Ne Dîyì dyakandamuka mubidi, ne dyakasomba munkaci mwetu, (ne twâkamòna butumbi bwende, butumbi bu bwa mwânà wa balume mulela umwepele wa Taatu,) mûle tente ne ngâsà ne bulelela.

Yone 5.22

Bwalu Taatu kêna ulumbulwisha muntu nansha umwe to, kadi mmufile dilumbulwisha dyônsò kudi Mwânà.

Yone 12.48

Ewu udi umbenga mêmè, ne kayi wakidila mêyì aanyi, udi ne umwepele udi umulumbulwisha: dîyì dîngămbì edi, dyôdì dimwedimwe edi ke dyamulumbulwisha ku dituku dya ndekeelu.

Efeso 1.5-7

Mumane kudyanjila kutulongolola bwende yêyè mwine ku diteekiibwa dya bânà ku Yesu Kilisto, bilondeshile ku budiswile bwa diswa dyende,

Ku difila dya butumbi bwa ngâsà wende, mudiye mutwěnzè baanyishiibwe mu munanga wende.

Mu yêyè mmutudi ne bupikudi ku mashi ende, difwidiibwa dya luse ku mpekaatu, bilondeshile bubanji bwa ngâsà wende;

Efeso 2.5-8

Nansha patucivwa bafwe mu mpekaatu, mmutuvwije ne mwoyi pamwe ne Kilisto (ku ngâsà nkunudi basungidiibwe;)

Ne mutubiishe ku lufu pamwe, ne mutusombeshe pamwe mu myaba ya mu dyulu mu Kilisto Yesu,

Bwa mu bikondo bicilwalwa wamona mwa kuleeja bubanji butambidile bwa ngâsà wende mu bwîmpè bwende kutudi mu Kilisto Yesu.

Bwalu ku ngâsà nkunudi basungidiibwe ku diitabuuja; ne ciine aci kaciyi cifumina kunudi nwênù biine to, ndipà dya Nzambi.

I Yone 1.7

Kadi twêtù twendela mu bukênkè, bu mudiye yêyè mu bukênkè, tudi mu bwobumwe munkaci mwetu, ne mashi a Yesu Kilisto Mwanende adi atukezula ku mpekaatu yônsò.

Bwakabuulwibwa 22.18-19

Bwalu ndi njaadikila muntu yônsò udi uumvwa mêyì a ciprofeta cya mukanda ewu ne: Muntu yêyè mudidinge musakidile ku maalu aa, Nzambi neamusakidile bipupu bidibo bafunde mu mukanda ewu;

Ne muntu yêyè mudidinge muumushile ku mêyì a mukanda ewu wa ciprofeta, Nzambi neumushile cyende citupa ku mukanda wa mwoyi, ne ku cimenga cya cijila, ne ku bintu bidibo bafunde mu mukanda ewu.