Mwaneetu Branham utu misangu yàbûngì uumvwija Dikunji dya Kapya kampanda dya bwena ditu dishindike mudimu wende wa bwambi adi. Divwapu ku dilediibwa dyende, baakadimona kudi bantu binunu ku mwelelu wa Musulu wa Ohio, ne divwa dyenze bu divwa dyenda dimulonda kwônsò kuvwaye uya. Mu cidimu cya 1950 ke mwakapa Mukalenge beena kwitabuuja ne beena bupidya cileeji cya mwomumwe cya ne Dikunji dya Kapya divwa ne muprofeta.
Diloolo adi dikokangana dya ku luseke dyakenzeka mu Sam Houston Coliseum. Mwaneetu Branham uvwa ulombola ditabuluja dya dyondopa divwa ditangalake ditunga dijima. Mabenesha a Mukalenge Yesu avwa munkaci mwa kupongoloka cyenze bu mvula pa madimi a nyuma a blé. Kadi bimanyinu binene ne maalu a kukema kabyakalwa kakuyi kadyuwu to. Anu mutubi misangu yônsò, mwena lukuna e kujuulaye mulwishi. Makole abidi awu kutwilanganawu mu Houston mu Texas, ke Mwanjelo wa Mukalenge Yêyè mwine kudituulukilaye bwa kudilwila mvita ayi.
Binunu bya bantu bakaavwa bamane kwikalapu bwa kudimwena bishima bivwa bûngì kabuyi kubala bivwa byenda bilonda mulume wa Nzambi ewu. Dituku kumpala, kasumbu kaa bambi baa pa kaaba aku baakeela muprofeta kadyombo biikale balomba muyiiki wa dikokangana pa dyondopa dya kudi Nzambi, kadi kadyombo aku kuponaku mu byanza bya mwena dya muprofeta wa kale uvwa wamba maalu wambilamu, ke Révérend F.F. Bosworth. Beena mpatà bààbûngì ke kubatwabo nyama ku mikolo kudi mwambi kampanda wa ba-Baptistes wa pa kaaba aku uvwa mwikale mwena mpatà wa mukana mutupu pa bidi bitangila dyondopa dya kudi Nzambi. Dikokangana dìvwà dìlondà bôbò kuditangalaja mu bibejibeji ne lukasa lwônsò, byôbì kupatuka ne cyena bwalu eci ne: “Nekwikale Kafwafwayi Kaa Maalu A Nzambi Pa Dîbà 7 wa diloolo Leelu Mu Sam Houston Coliseum.”
Mwena mpatà awu kufutaye mukwaci wa fòtô, Ted Kipperman wa Studios Douglas, bwa kwikalaye ukwata fòtô dîbà dya dikokangana adi. Diloolo adi, baakakwata fòtô Mwaneetu Bosworth mwimane mu didipwekesha dyônsò pavwa mwena mpatà awu udya ma-pôzè mwenze bu udi ukwacishangana bwôwà; musangu mukwabo mwimane ne munu wende mufunkuna mwîsù mwa mukulumpe wa bupwekele awu.
Muyiiki wa dikokangana mmwenze anu ubanga, Révérend Bosworth kujaadikaye ne lukasa lwônsò bulelela bwa dyondopa dya kudi Nzambi ne bileeji bya mu Mifundu, ne bwa kubenga kushiya mpatà, kulombaye bônsò bakaavwaku bondopiibwe ku mateketa bwa bajuukile kuulu. Binunu bya bantu kujuukilabo kuulu. Paanyima paa bavwa bondopiibwe bamane kusomba mu nkwasa yabo, kulombaye bônsò baakondopiibwa ku dyondopa dya kudi Nzambi biikale bantu baa mushinga ne biikale bidimba bya dingumba dya mwine mulumyana awu bwa kujuukilabo kuulu. Bantu nkama isatu biikale bidimba bya ekeleeziya awu kujuukilabo kuulu bwa kuleeja patooke ne maleela ônsò luse luvwa Mukalenge Yesu muběnzèle.
Ke kadyombo kufuminaku mpindyewu kudi mwena mpatà awu. “Mwondopyanganyi mwine wa kwa Nzambi awu apatukile mwaba ewu tǔng. Alwe ěnzè tǔng.” Ke Mwaneetu Bosworth kutookeshaye bîmpè maalu wamba ne Yesu ke Mwondopi umwepele wa kudi Nzambi, kadi ngaakwilu wa dipota wa mwena mpatà awu kwenza anu mutungunuke. Bwa kumana kumana, ke Mwaneetu Bosworth kulomba Mwaneetu Branham bwa kubandaye pa cibumba apu. Yêyè kwitaba ku dibiikila adi munkaci mwa mbila ya dimutwa naayi nyama ku mikolo.
Muprofeta, mûle tente ne Nyuma Mwîmpè, kufilaye dyandamuna didi dilonda edi ne:
Mêmè ncyêna mwa kwondopa muntu nansha umwe to. Cîndì ngamba nshindika ncyeci. Pâmvwà mwânà wa mu diboko mulela mu Ditunga dya Kentucky mwamwa, bilondeshile bidi wanyi maamu munanga mulonde, ne bidi bishindikiibwe mu nsòmbelu wanyi mujima, kwakalwa Bukênkè kampanda mu cibambalu cya kazubu kaa kabutabuta kaa kale aku, mwaba uvwaku awu, kakayi nansha ne nshaamenda panshi, kakayi nansha ne dididiishi diine, bavwa anu ne kaacintu kakwabo kaa kale bu dididiishi kaaba aku, kenze bu kaaciibi kakese, ke kukunzululabo bu pa dîbà itaanu wa dinda, ke Bukênkè ebu kubwelabu bwenze cijengu anu pakaavwa bufuku bwamba kucya apu. Kubangila anu pa diine dîbà adi, Budi naanyi. M’Mwanjelo wa Nzambi. Mmusambakeene naanyi yêyè mwine kukaadi ndambu wa bidimu. Mu nsòmbelu wanyi mujima, Yêyè ukaadi mungambile maalu akaadi menzekenzeke, ne mêmè ewu nkaadi mualondelangane anu mutuYe muangambile. Nenku ndi ngela muntu yônsò kadyombo nansha bamwamba ne nganyi nansha yêyè mwikale penyi, bwa kuyaye mu cimenga mûntù mukolele amu, anyi mwaba mukwabo wônsò, bwa ne dîyì dikaadiku dyambiibwe mu Dînà dya Mukalenge, ne kaditu dikumbane anu patapata mushindu utudi dyambe ne nebyenzeke.
Paanyima paa yêyè mumane kwamba mêyì awu, Nyuma Mwîmpè kwicikila pa cibumba cya cyambilu, nenku mukwaci wa fòtô musaluke kadi kukwataye fòtô. Mwaneetu Branham kuumukaye pa cibumba cya cyambilu apu mwikale wamba dîyì dipeepele edi, kadi diikale dya ciprofeta ne: “Nzambi ke wafila bujaadiki. Mêmè ncyakwambaku dîyì dikwabo to.”
Àsòsà wa Mukalenge Kipperman kuyaye ne lukasa lwônsò bwa kasukula fòtô ayi bwa nguumu ya dinda divwa dilonda. Ke yêyè kumona kaacintu kaa pabwaku paaluye kupatula fòtô wa kumpala mu bwanga. Yêyè awu, anu muvwa mikwabo itaanu yavu kulonda, uvwa munda mutupu. Kadi kudikwataye cyanza pa mwoyi ne kuponaye mutwe cyâdì panshi paaluye kupatula dibeji dya ndekeelu mu bwanga. Mwômò amu, pa fòtô wa ndekeelu awu, pavwa Dikunji dya Kapya mu mushindu wa dimweneke ne mêsù diikadile lwa pamutu paa muprofeta wa Nzambi, William Marrion Branham.
Bânà baa Izaleela baakadimwena Dikunji dya Kapya dyenda dilombola Môsà, ne bantu baa dituku dya cyena leelu edi mbadimwene Dikunji dya Kapya dimwedimwe adi diikale dilombola muprofeta mukwabo.
Kutumabo lukasalukasa fòtô awu kudi George J. Lacy, Mukenkeci Mupiluluke wa Documents idibo beela Mpatà bwa F.B.I. wa États-Unis, yêyè kujaadika ne fòtô awu mmulelela ku mmwenenu wende wa muntu mupiluluke. Document udi mbulamatadi mwitabe udibo bapatule kudi Mukalenge Lacy mupatule nyêyè ewu pa dibeji didi dilonda edi.
Eci nkumpala menemene kwa bidikalwila anyi byamu bya fòtô bya ditwa minu kwikalabi kwǒkò, ne kacivwa mwa kupeta dyumvwija dya ku mishindu kana yônsò idi mimanyike kudi mamanya eyi to, pa kuumusha ne kuvwa Bukênkè bulelela pamutu paa William Branham. Leelu wa Ndaaya ewu fòtô umweumwe ewu badi mwa kumumona mu Nzubu wa Dibadila Mikanda wa Congrès wa États-Unis, mu cimenga cikulu cya ditunga, Washington DC.