“Paakandelabo mu kazubu kakese kaa ku mikuna ya Kentucky mwamwa, Mwanjelo wa Nzambi wakabwelela ku dididiishi e kwimana mwaba awu. Ke Dikunji dya Kapya adi.”
Nsèsà ya kabundubundu icivwa anu ibangilaku ditubula mîdimà ya dyulu dya citaleela dya ngondo mwinâyì. Dididiishi dya mabaya dimwepele adi, kuunzulukadi bwa kubwejaku bukênkè bwa dinda mu kazubu kakesee kaa cibambalu cimwepele aku. Kanyuunyi kakunze mu cyâdì kàvwà kiikile ku luseke lwa dididiishi aku kwenzaku anu bu ne mbakasalule mu mushindu wa pa bwawu mu dinda diine adi ne kavwa kimba bisulusulu byamba kutaayika. Munda mwa kazubu amu, nsongalume Charles Branham kwelaye byanza mu cinsalabeeta cyende cipyacipya ne kupwekeshaye mêsù bwa kutangila mukajende wa bidimu 15. “Netumwinyike dînà ne William,” mwakamba taatu awu.
Ke Bukênkè butambe mfukilu kubwelelabu ku dididiishi aku. Bukênkè kusambuluka cibambalu e kulwa kulembelela kumutu kwa kalaalu kavwa mwânà uvwa ufuma ku dilediibwa awu. M’Bukênkè bumwebumwe abu bwakapatula bânà baa Izaleela mu Ejipitu. M’Bukênkè bumwebumwe abu bwakatuutakeena ne Pôlò mu njila pavwaye uya ku Damaseke. Ne Bwôbò ebu mbuvwa mwa kutungunuka bwa kulombola mwânà mukese wa mu diboko ewu bwa kubiikilaye Mukaji musela wa Kilisto bwa kupatuka mu baa pa buloba. Bukênkè abu kabuvwa cîngà cintu to anu Mwanjelo wa Mukalenge, Dikunji dya Kapya; nenku Dyakamwenekela bantu musangu ewu kabidi.
Nenku mwômò amu, mu kazubu kakese aka kaa mici, mu dinda adi dya matuku 6 a ngondo mwinâyì, muleleshi kuunzululaye dididiishi bwa bukênkè kutookeshabu munda amu bwa Maman ne Papa kumonabo mmwenekelu ûmvwà nende. Ke Bukênkè bwipacila musaamu ku bunene kubwelelabu ku dididiishi bwenda bunyunguluka. Kwenzabu cijengu mwaba ûmvwà awu, e kupwekabu pa kalaalu. Bantu ndambu baa ku mikuna bavwa biimanepu. Bavwa beela mbila mikole.
Nzubu mumweke wa bupwekele ewu uvwa mu mikuna ya ku sud wa Kentuky, pabwîpì ne kaacimenga kakese kaa Burkesville. Matuku a ngondo avwa 6 a ngondo mwinâyì, 1909. Mwânà ewu uvwa wa kumpala pa bânà dikumi bavwa ne cya kulediibwa kwa Charles ne Ella Branham.
Abidi mmale asatu mmîpì ke Mwanjelo wa Mukalenge kulwa kumwenekela cyakabidi William Branham.
Pacivwaye mwânà, Mwanjelo wakanji kwakula nende, wamba ne neikale ne cya kusòmbela pabwîpì ne cimenga civwa dînà ne New Albany. Kubwelaye mu nzubu e kwambilaye mamwěndè civwa cifuma ku dyenzeka. Anu mùtù maamu wetu yônsò ewu, kayi utuma meeji menemene ku bwalu bumulondela abu to kadi kumulaadikaye mu bulaalu bwa kumutuuyishaye cilunji cyende cya bwânà aci. Paanyima paa bidimu bibidi, dîkù dyabo kumwangala e kuya ku Jeffersonville, mu Indiana, ku ntanta wa kilomeeta mikese cyanaana ne cimenga cya New Albany civwa lwa ku sud wa Indiana.
Mwanjelo kwakula kabidi ne muprofeta wa kânàkânà ewu paanyima paa ndambu wa bidimu. Muvwa mmu dituku ditalale dya ngondo wa citeema kwikale muunya wosha bikole bu muvwa dîbà dituma nsèsà yadi mu mabeji makunzubile a muvù wa automne. Kansongalume aka kavwa kenda katebuka bu muvwako kambule tumbekeci twa mâyì kenda kapweka ne kajila. Uvwa muswike cizubu cya ditala mwinshi mwa mwânankàsà uvwa ne mputa bwa kumulama ku lupwishi. Ke kusòmbelaye panshi bwa kwikisha mu dileji dya muci muleemule wa cilombalomba. Binsonji bivwa bimutunkumuka mu mêsù bwalu uvwa udila mwadi bu muvwaye udimona bu mwena dyakabi: Balunda bende bavwa munkaci mwa dicyonkomoka ku dijiba dya mwaba mwine awu kuvwabo baloba mishipa, kadi yêyè pende bamulame anu bwa kusunyina papa wende mâyì. Dyakamwe, cipeepele kubanga kutuuta mu muci awu kuulu kwa mwaba uvwaye awu. Ukupula ku mêsù kadi kujuukilaye kuulu. Kuumvwaye cyona cya mabeji anyunga ku cipeepele aci… kadi kakuvwa cipeepele to. Wambulula mêsù nunku, pankacinkaci lwa muulu mwa muci wa cilomnbalomba awu, cintu kampanda ciikale cinyungisha mabeji mûme awu.
Dyakamwe Dîyì kwakuladi ne: “Kunu maala anyi mfwanka anyi kukooyishi mubidi webe mushindu kana wônsò to, nekwikale mudimu wa wêwè kwenza pawakola.” Kansongalume kaa bidimu mwandamutekete aku kakwacike bwôwà kulekelelaku tumbekeci ne kuvukuta lubilu too ne kuvwa mamwǎkù.
Anu muvwa muprofeta Samwele, Nzambi kwakula kabidi ne mwânà.
Kupita mbingu ndambu, uvwa munkaci mwa kunaya mààbî ne mwakunyende wa balume. Kudyumvwaye cintu kampanda cya pabwaci cimwikile. Utupula mêsù utangila ku Musulu wa Ohio e kumonaye cilamba cilenga cya dikema. Bantu dikumi ne basambombo kuponabo ne kufwabo paakasolola cilamba aci pa musulu awu. Muprofeta wa kânà ewu ke pamweneye cyende cikeena-kumona cya nzanzanza apu. Kucyambilaye mamwěndè, ke ewu yêyè kufundaye byakamulondelaye abi. Paakapita bidimu, bantu 16 kuponabo ne kufwabo pavwabo munkaci mwa kwibaka cilamba cya Second Street mu Louisville, Kentucky pa Musulu wa Ohio.
Mukalenge uvwa umuleeja bikeena-kumona bya matuku acivwa kumpala. Anu bu baprofeta baakamudyanjidila, bikeena-kumona abi kabyakapangilaku kacya to.