Maalaki 4.1

Bwalu, monaayi, dituku dilwalwa, diikala mwa kwosha bu cikutu cya kapya…


Maalaki 4.5-6

Monaayi, nênnùtùmìnè Eliya muprofeta kumpala kwa dilwa dya dituku dinene dya mukalenge didi dikwacisha bwôwà:
Nenku yêyè neakudimune myoyi ya baataatu bwa kuyitangija kudi bânà, ne myoyi ya bânà bwa kuyitangija kudi baataatu baabo, bwa ncilu kubutula buloba ku mulawu nansha.


Mukanda wa ndekeelu wa Dipungila Dikulukulu udi ulaya kabutu kaa buloba. Kadi kumpala kwa nshiikidilu, mbadyanjile kwamba ne Eliya muprofeta udi ne cya kwalukila bwa kuleeja Maasiya. Bamwe bantu badi bamba ne Yone Mubatiiji ngudi muuje ciprofeta eci.

Kukaadi bidimu binunu bibidi, beena Yuda bavwa bindile dilwa dya Maasiya. Bavwa bamanye ne Maalaki uvwa mwambe ciprofeta ne muntu mwikale ne nyuma wa Eliya uvwa ulwa kubaleeja Maasiya awu. Kadi paakalwa Yone Mubatiiji, kavwa civwabo bôbò batekemene ne ke civwa Eliya mwa kwikala to. Paakeelabo Yesu lukonko lwa ne mbwa cinyi Eliya kavwa mulwe kumpala, Yêyè wakabambila bitooke tòò ne Yone uvwa dyula dya ciprofeta aci ne: “Nenku panwikala baswe kwitaba cyôcì aci, yêyè ewu ke Elias, uvwa ne cya kulwa.” (Elias mmushindu wa cyena Gelika wa dînà edi dya cyena Ebelu, Eliya.)

Anu kasumbu kakese ka bantu nkaakaakidila dibuulula edi. Bwa balombodi bààbûngì baa ntendeleelu, Yone uvwa anu muntu uvwa ne lukunukunu lubi bwa kudyula malongolodi abo. Kabaakapanga anu kujingulula nyuma wa Eliya to, civwa citambe bubi, baakapanga kumanya Dilwa dya Kilisto.

Pa nanku Yone Mubatiiji ngwâkuuja ciprofeta cya Maalaki anyi? Kî ncyônsò to.

Cya kumpalampala, buloba kî mbwanji “kwoshika bu cikutu cya kapya” to, pa nanku tudi tujingulula ne citupa cya Maalaki 4 cicilwalwa. Citupa cikwabo cya Mufundu ewu civwa Yone kayi muuje civwa ne, “kukudimuna myoyi ya bânà bwa kuyitangija kudi baataatu baabo.” Nenku, Yesu, Yêyè mwine, wakamba ciprofeta ne Eliya nealwe (mu cikondo cicivwa cilwa) ne neakajulule maalu ônsò. (Maat 17.11)

Ke bwa cinyi tudi ne cya kwindila Eliya kumpala kwa Dilwa Diibîdì dya Kilisto!

Mpindyewu, mu dituku dya bwena leelu edi, dîbà dyăkùmbanyi bwa Dilwa Diibîdì dya Mukalenge Yesu. Kabidi, mbatulaye ne nyuma wa Eliya ngwîkala mwa kuMuleeja kutudi bilondeshile Maalaki 4. Kadi nkasumbu kaayi kaa bantu kaajingulula Eliya paalwaye? Anu aba badi bamwindile.

Mêyì a Mukalenge ne Musungidi wetu aa adi atuvwila mu meeji patudi twela meeji ku ciprofeta cya Maalaki bwa mêbà a ndekeelu aa ne:

Kadi ndi nnwambila ne, Elias Awu ukaadi mumane kulwa, kadi kabaakamumanya to… Maataayi 17.12

Amba tŭng bu twêtù mwa kupanga kumanya dilwa edi dya Eliya? Nanku netupange kumanya Dilwa Diibîdì dya Kilisto, muvwa bafundi ne Bafaalesa bapange kumanya Dilwa Dyende dya Kumpala bwalu kabaakajingulula Yone Mubatiiji anyi?

 

 

 

 

Myaba ya kubala

2 Bakalenge 2.15

Nenku paakamumona bânà baa baprofeta bavwa batangilangane ne Yeleko, baakamba ne: Nyuma wa Eliya udi bushuwa pambidi pa Elisha. Nenku baakalwa bwa kusambakeena nende, ne baakiinamija mpala yabo panshi kumpala kwende.

Yeshaayi 40.3-4

Dîyì dya ewu udi wela lubila mu cipeela ne, Longololaayi njila wa MUKALENGE, nululamijile Nzambi wetu cibeeba mu cipeela.

Cibandabanda cyônsò necibandishiibwe, ne mukuna munene wônsò ne kakuna kakese nebibatamijiibwe, ne myaba mikonyangale neilulamijiibwe, ne myaba ya bimpòkòmpòkò neilandakajiibwe: [Yone Mubatiiji]

Maalaki 3.1

Monaayi, nêntumè musanjeela wanyi [Yone Mubatiiji], ne nealongolole njila kumpala kwanyi: nenku Mukalenge, unudi nukeba awu, nealwe dyakamwe mu ntempelo wende, musanjeela wa cipungidi mwine, unudi nusankila awu: monaayi, yêyè nealwe, mudi MUKALENGE wa bilwilu wamba.

Maalaki 4.1-6

Bwalu, monaayi, dituku dìlwalwa, dììkalà mwa kwosha bu cikutu cya kapya [aci kî ncyanji kwenzeka to]; nenku badisu bônsò, eyo, ne aba bônsò badi benza maalu ne lwonji nebiikale bisoosa byûmè; nenku dituku dìlwalwà adi nedìbŏshè dibashidishe, mudi MUKALENGE wa bilwilu wamba, ne kadyakubashiila nansha muji anyi ditamba.

Kadi bwenu nwênù badi baciina dînà dyanyi Dîbà dya bwakane nedinubandile diikale ne dyondopa mu mapwapwa ende; nenku nenupatuke, ne nenujuuke nwenda nutupika bu bânà baa ngombe baa mu cikumbi.

Ne nenudyatakaje beena lwonji ku makàsà, bwalu bôbò nebiikale butu mwinshi mwa bidyacilu bya makàsà enu mu dituku dîngènzà cyôcì eci, mudi MUKALENGE wa bilwilu wamba.

Nuvuluke mikenji ya Môsà musadidi wanyi, îngààkamutùminà dîyì mu Holeba bwa beena Izaleela bônsò, ne mêyì ne mikandu.

Monaayi, nênnùtùmìnè Eliya muprofeta kumpala kwa dilwa dya dituku dinene dya MUKALENGE didi dikwacisha bwôwà.

Nenku yêyè neakudimune myoyi ya baataatu bwa kuyitangija kudi bânà [Yone Mubatiiji], ne myoyi ya bânà bwa kuyitangija kudi baataatu baabo [Eliya wa leelu], bwa ncilu kubutula buloba ku mulawu nansha.

Maataayi 11.10

Bwalu nyêyè ewu, udibo bafunde ne: Monaayi, nêntumè musanjeela wanyi kumpala kwebe, wâlongolola njila kumpala kwebe. [Maalaki 3.1, Yone Mubatiiji]

Maataayi 11.14

Nenku panwikala baswe kwitaba cyôcì aci, yêyè ewu ke Elias, uvwa ne cya kulwa. [Yone Mubatiiji]

Maataayi 17.11-12

Nenku Yesu kwandamuna e kubambila ne: Ncya bushuwa ne Elias nealwe dyambedi, ne neakajulule maalu ônsò. [Eliya wa leelu]

Kadi ndi nnwambila ne, Elias awu ukaadi mumane kulwa, kadi kabaakamumanya to, kadi baakamwenzela byônsò bivwabo balongolole. [Yone Mubatiiji] Bya mwomumwe Mwânà wa muntu pende neakengeshiibwe kudibo.

Luuka 1.17

Nenku yêyè neaye kumpala kwende ne nyuma ne bukole bya Elias, bwa kukudimuna myoyi ya baataatu bwa kuyitangija kudi bânà, ne beena cishiku ku lungenyi lwa baakane; bwa kulongolwela Mukalenge cisamba cidi cidyăkàje. [Yone Mubatiiji]