Okwa tameka okulaula monduda yoshipange, onga sha li moixwa ihapu. Onda uda omhepo tai pepe okupitila momafo, natango otashi monika onga ondjila inene yauka mofuka. Owa uda kashiimba omufudo womhepo tai pepe omafo, tai ya popepi nopopepi naave. Onde lipula, “Iya, eli efyo tali ile nge po.” Akutu! omwenyo wange wa li u nokushakeneka Kalunga, onda kendabala okuilikana itandi dulu.
Popepi omhepo oye uya, mokule nomokule. Omafo okwa weelela ndele lumwe, onda ya.
Okwa li tashi monika hano kutya onda li nda aluka natango okamatyona kanini keemhadi kondje, ndi li ofika mondjila koshi yomuti welifa. Onda uda Ewi olo lelifa olo la ti, “Ino nwa nande oikolwifa ile u shile omakaya.” Nomafo oo nda uda okwa li elifa oo a pepwa momuti oo efiku olo.
Ashike oshikando eshi Ewi ola ti, “Onde ku ifana ndele ito i.” Ole lifola oshikando oshititatu.
Hano onda ti, “Omwene, nge Oove ngaho, pitika ndi shune kombada yedu ndele ohandi ka udifa Evaengeli Loye okudja keexulo domaumbo nomeekolonela domapandavanda. Ohandi ke shi lombwela keshe umwe!”
Eshi emoniko eli la pita po, onda mona kutya inandi tya po xwepo. Omutandi wange okwa li natango metungo. Ye okwe uya ndele ta tale kuame ndele okwa li a kumwa. Ye okwa tala onga e lipula nda kala nda fya, hano ye okwa ti, “Ame nghi fi omunhu omui-kongeleka, oshilonga shange osha kula unene, ashike ondi shii Kalunga okwa talela po okamatyona aka.” Omolwashike ye a tila ngaho, nghi shi shii. Kape na umwe a tya sha kombinga yasho. Nge onda shiiva eshi ndi shii paife, ngeno onda yambuka ko kombete oko handi ingida Hambelela kEdina Laye.
Konima yomafiku mashona onda pitikwa ndi shune keumbo ashike onda li handi vele natango nokwali nda fininikwa ndi djale omakende komesho ange molwa etwiyalo. Omutwe wange wa puka ngeenge nda tale sha oule wefimbo.
Onda tameka okukonga nokumona Kalunga. Onda ya kongeleka nongeleka, handi kendabala okumona onhele opo pa li eifano loaltari yoshikulu-shonale. Ombinga yoluhodi inandi mona nande imwe.
Onda ti kutya nge onda li Omukriste, ohandi kala umwe wolela. Omuhongi oo a uda nge eshi nda popya okwa ti, “Paife Billy mumati, oto i moifanakalo.” Onda ti kutya nge onda li neitavelo, onda hala oku li uda eshi tali ya, ngaashi ovalongwa va ninga.
Akutu hambelela Edina Laye. Onda mona eitavelo konima nondi li natango, nokekwafo Laye, ohandi li diinine alushe.
Oufiku umwe onda fila unene ondjala Kalunga neeshiivo lashili opo nda ya kelimba lakulupa konima yeumbo nokukendabala okwiilikana. Ngha li ndi shii nhumbi ndi na okwiilikana onghee hano onda hovele ashike okupopya naYe ngaashi handi popi nakeshe umwe elili. Poshikando opo ope uya Ouyelele melimba ndele tau ningi po omushiyakano ndele Ewi la dja momushiyakano ola popya naame melake itandi dulu ku udako. Owa dja po hano. Okwa li nda kanghwa. Eshi nda alukila kuamemwene natango onda ilikana, “Omwene nge Oove, alikana ila ndele to popi naame natango.” Onda kala nokulesha Ombibeli yange nghee nda kala meumbo okudja koshipangelo nonda lesha mu I Johannes 4, “Ovaholike, inamu itavela eemhepo adishe, ndele di yelekeni nge oda dja tuu muKalunga.”
Ondi shi shii kutya omhepo oya holokela nge naashi nda ilikana oya holokele natango. Hano kuame osha li tashi monika shafa kutya opa li eepounda eyovi da kufwa komwenyo wange. Onda nhuka pombada nokulotokela keumbo ndele osha li tashi monika onga nda li handi lotoka momhepo.
Meme okwa pula, “Bill, oshike sha ningwa po kuove?” Onda nyamukula, “Nghi shi shii ashike ondi udite shili nawa nondi mupu.” Inandi dula vali okukala meumbo. Ondi na okudja mo nokulotoka.
Ondi shi shii hano kutya nge Kalunga okwa hala ndi udife, Ye ota velula nge. Onghee onda ya kongeleka oyo ya itavela mokuvaeka nomaadi nonda li nda veluka efimbo olo. Onda mona hano kutya ovalongwa ova li ve na sha osho vahapu vomovahongi ve he shi na nena. Ovalongwa ova shashelwe nOmhepo Iyapuki nova dula yo okuvelula ovanaudu nokulonga oikumifilonga yeenghono mEdina Laye. Onghee onda hovela okwiilikanena eshasho lOmhepo Iyapuki noku li mona.
Efiku limwe hanga konima yeehani hamano, Kalunga okwa pa nge ehalo lomutima wange. Ye okwa popya naame mOuyele munene, ta lombwele nge ndi ka udife nokwiilikanena ovanaudu ndele Ye ote va velula shihena kutya oudu washike ve na. Onda tameka okuudifa nokulonga osho Ye a lombwela nge ndi ninge. Akutu kaume, itandi dulu ku hovela oku ku lombwela ashishe sha ningwa po: Omesho a twika okwa pashuka. Oingudu oya enda. Eekaangela oda veluka, nomaludi aeshe oikumifilonga okwa longwa.
Efiku limwe pedu lEpandavanda Spring, Jeffersonville, Indiana, konima yepapuduko loivike ivali, onda li handi shashe ovanhu 130. Osha li efiku lapupyala Auguste ndele opa li hanga ovanhu ve li po 3,000. Onda li hanga ndi shashe omunhu 17 eshi ombaadilila ashike nda uda engungilo olo, Ewi linini natango, ndele ola ti, “Tala pombada.” Evalelwa leulu ola li ngaashi oshivela shitwima mefiku olo lapupyala Auguste. Inatu mona nande odula yasha hanga oivike itatu. Onda uda Ewi natango, ndele hano natango oshikando oshititatu ola ti, “Tala pombada.”
Onda tala pombada ndele kevalelwa leulu okwa dja onyofi inene tai vema, oyo nda mona oikando ihapu nale ashike oyo inandi i mu lombwela. Oikando ihapu onda lombwela ovanhu kombinga hai holoka ndele ova yola ashike nokutya, “Bill, oto shi diladila ashike. Ile pamwe owa li to tu ondjodi.” Ashike hambelela Kalunga, efimbo eli Ye okwe li ulika Yemwene ta monika kuaveshe, molwaashi oye uya popepi naame unene inandi dula nokuli okupopya. Konima yeesekonde dishona dapita po onda kuwa novanhu vahapu ova tala pombada nokumona onyofi kombada yange. Vamwe ova ngabuka fimbo vakwao ova ingida navakwao ova faduka po. Hano onyofi oya shuna mevalelwa leulu nonhele opo ya dja oya li hanga eesikweela eemhadi omulongonanhano nonhele ei oya kala tai linyenge nokushika hanga ile ngaashi ngeno omakufikufi tae litumbu. Opa ningwa monhele ei oshilemo shitoka shinini nonyofi oya tambulwa pombada moshilemo eshi shinini.