“Eshi nda dalelwa mokalili kanini moKentucky kwinya, Omwengeli wOmwene okwe uya mekende nokufikama opo. Opa li Oluudi lOmundilo.”
Poshi opa li ashike tapa tameke okutwa omilaulu doutalala mevalelwa leulu lApilili. Alike, ekende loshiti layeuluka lapatuluka okupitila ouyelele wongula u uye mokalili kanini konduda-imwe. Okarobin oka fikama ponghulo nekende shafa okukala shihafifa unene ongula ei noka li taka imbi pombada yomapunga ako. Meni lokalili, omunyasha Charles Branham okwa tula omake aye mekalanyana laye lipe-lela nokutala komwalikadi waye womido 15. “Ohatu ifana edina laye William,” tate a ti.
Mekende omwe uya Ouyelele woshipwe. Ouyelele owe lihanena onduda aishe noku ya popepi nombete opo okahanana ka li ashike ka dalwa. Ou owa li Ouyelele welifa oo wa kufa mo ounona Ouheberi muEgipti. Owa li Ouyelele welifa oo Paulus a shakeneka mondjila yaye kuDamascus. Ndele Owa twikila okuwilika okahanana aka kanini ka ifane mo Omufuko waKristus mounyuni. Ouyelele oo ka wa li sha shikwao shi he fi Omwengeli wOmwene, Oluudi lOmundilo; ndele Owa li lumwe natango wa holokela kovanhu.
Naamu apa, mokalili aka kanini kendangalati, ongula oyo me6 Apilili, omudalifi okwa yeulula ekende opo ouyelele u dule ku minikila mo okupitika Meme naTate va mone osho handi monika ndi li. Hano Ouyelele hanga pondodo yoshiwilo owe uya taufudaele okupitila mekende. Owa dingilila opo nda li, nokuya kombete. Ovanhu vahapu vokeemhunda ova li po ofika. Ova li tava lili.
Eumbo lelininipika ola li moikulundudu yokolukadi Kentucky, popepi nodoolopa inini yaBurkesville. Efiku ola li 6 Apilili, 1909. Okahanana oka li kotete kounona omulongo ovo va dalwa kuCharles naElla Branham.
Kasha li olule manga Omwengeli wOmwene a talela po William Branham natango.
Eshi ye a li okaana, Omwengeli tete okwa popya naye, a ti kutya ye ota ka kala onghalamwenyo yaye popepi noshilando sha ifanwa New Albany. Ye okwa ya meumbo nokulombwela ina osho ashike sha ningwa po. Ngaashi keshe ina, ye ine lipula shihapu kombinga yehokololo noku mu tula kombete a ngungumaneke omadiladilo aye manyasha. Omido mbali komesho, epata laye ola tembukila koJeffersonville, Indiana, eemaila ashike dishona okudja kolukadi loshilando Indiana shaNew Albany.
Omwengeli natango okwa popya komuxunganeki omunyasha omido dishona komesho. Osha li efiku lamwena Septemba netango lipyu tali minikile okupitila momafo e noluvala okulombo. Omukainhu okwa li ta shongoloka ngaashi ye a humbata omavela avali omeva kokatemba. Oshiti shepungu osha li sha mangelwa koshi yomunwe wokomhadi waye wa lemana oku u kaleka kokule nondova. Ye okwa kala omutumba okufuwa po momudile womuti mule wopoplar. Omahodi okwa li taa tondoka okudja momesho aye ngaashi ta lili kombinga yomupya waye: Ookaume kaye ova li tave lityapula vovene koshilambo shokukwata eeshi shopashiwana, ndele ye okwa li ta teke omeva axe. Ombaadilila, omhepo oya hovela okufudaela momuti pombada yaye. Ye okwa pushula omesho aye nokufikama keemhadi daye. Ye okwa uda ondaka yomafo taa pepe momhepo…ashike kapa li omhepo. Ye okwa tala pombada, nokonyala ondjilaki pombada yomuti wopoplar, shimwe osha li tashi fudaele omafo makukutu.
Ombaadilila Ewi ola popya, “Ino nwa oikolwifa ile u shile omakaya ile u nyateke olutu loye momukalo wonumba, ope na oshilonga shoye okulonga ngeenge wa kulu.” Okamati komido heyali ka mbadapalifwa oka ndwangula po evela lako nokulotokela kuina.
Naashi omuxunganeki Samuel, Kalunga okwa popya natango kokaana.
Oivike ishona komesho, ye okwa li ta danauka okamanya nokamwainamati kanini. Eliudo lilimbiliki ole uya kombada yaye. Ye okwa tala kOmulonga Ohio nokumona onhopa iwa. Ovalumenhu omulongonavahamano va wila kefyo lavo ngaashi onhopa ya pata omulonga. Omuxunganeki omunyasha okwa mona emoniko laye lotete. Ye okwa lombwela ina, ndele ye okwa shanga ondjokonona yaye. Omido komesho, ovalumenhu 16 va wila kefyo lavo ngaashi Epandavanda Etivali onhopa moLouisville, Kentucky ya li tai tungwa kombada yOmulonga Ohio.
Omwene okwa li te mu ulikile omamoniko omonakuiwa. Ndele ngaashi ovaxunganeki ve mu tetekela, omamoniko inaa dopa.