MOmbibeli, Kalunga alushe okwa eta Etumwalaka Laye kovanhu vounyuni okupitila momuxunganeki wefimbo mudo. Ye okwa popya naMoses okupitila moshixwa tashi pi noku mu pa etumo okukufa mo Ovaheberi muEgipti. Oluudi lOmundilo liwetike nomadidiliko makwao okwa li a yandjwa okushilipaleka oshilonga shaye. Johannes Omushashi okwa eta Etumwalaka ta longekidile ounyuni euyo laMessias. Fimbo ta shashe Omwene Jesus mOmulonga Jordan, Ewi ladja Keulu ola koleka etumo laJohannes okushiivifa Odjona yaKalunga, “Ou Omona wange omuholike, omu Ame nda hokwa.” Konima yomido, Ewi lOmwene ola udika natango tali popi komuxunganeki eshi Ye a popya kuPaulus okupitila mOuyelele wepofipaleko, nokonima okwe mu pa etumo okutula eengeleka melandulafano. Mualishe Lipe nEtestamenti Likulu, Kalunga ina popya nande novanhu Vaye momukalo woukwaongalo ile ehangano loukwamhepo. Ye alushe okwa popya novanhu momunhu umwe: omuxunganeki Waye. Ndele Ye okwa kwashilipaleka ovaxunganeki ovo okupitila momadidiliko oshipwe.
Ashike oshike kombinga yonena? Kalunga natango oha holola Ondjovo Yaye kovaxunganeki? Ope na natango omadidiliko oshipwe? Kalunga ota dulu ku tuma omuxunganeki wefimbo lomoode mounyuni? Enyamukulo ola yela unene, “Eheno!”
Ashike ohatu shiiva ngahelipi ngeenge omuxunganeki a fikama? Ota monika afa shike? Ote lihumbata ngahelipi? Edidiliko lashike te tu pe? Omushangwa ulipipo ta wanifa?
Ovaxunganeki vonale ova li ovalumenhu eefule vaKalunga, ndele ka va li va tila okufikama omhinge omahangano oukwamhepo. Moshili, ova li konyala alushe va nyanwa kovahongi. Elia okwa lola omahangano oukwamhepo efimbo laye, eva pula nge Kalunga ota fimaneke eyambo lavo, ile laye. Ova ingida. Ova xunganeka. Ova nhukila kombada yoaltari. Ove lilengaula vovene neembele. Ashike Kalunga ine va uda. Elia okwa tala kEulu ndele ta ti, “Nashi shiivike nena kutya oove Kalunga muIsrael, nokutya ame omupiya woye, nokutya onda longa oinima aishe ei kondjovo yoye.” Ye okwa ifana hano omundilo okudja kEulu okuxwika po eyambo. Omuxunganeki Mika okwa fikama Ohamba yaIsrael, noukwapristeli aushe, eshi a hanyena Omupristeli Omukulunhu Sedekia molwa okuxunganeka oipupulu. Omupristeli Omukulunhu okwe mu denga moshipala nOhamba oye mu tula modolongo molwa okupopya oshili. Nokuli Omwene Jesus okwa li e tondike unene komahangano oukwamhepo efimbo Laye kutya ove Mu valela pokati kovakolokoshi. Nge ondjokonona oya diinina oshili, omuxunganeki oku na okutondika komukalo woukwaongalo womoode, nota kala a natekwa omufininiki, omuxunganeki omunaipupulu, ile shii. Ashike Kalunga ota fikama pomupiya Waye.
Nge opa li omuxunganeki mefimbo eli lomoode, ota tambulwa ngahelipi kOngeleka Katoolika? Ongelaka Obaptiste? Ongeleka Lutheri? Keshe oukwaongalo?
Omwene Jesus okwa tuma aveshe ovo ve Mu itavela: “Noilongadidiliko ei tai shikula ovo va itavela; Medina lange tava te mo eendemoni; otava popi omalaka mape; Otava kwata omayoka; nonge tava nu oudiyo, itau va ningi sha; otava tenheke omake kovanaudu, notava veluka.” (Markus 16:17-18). Omushangwa ou owoshili nena? Nge kau fi woshili, onaini Eendjovo dOmwene da ngushuluka? Ombibeli aishe, ovaxunganeki ova dula okuvelula ovanaudu, okuta mo eendemoni, nokulonga oikumifilonga. Moses okwa tula eyoka loshivela shitwima moipafi yovanhu vaIsrael oku va velula kokulika komayoka oudiyo (Numeri 21:9). Naeman, Omusiria omunaenghono, okwe uya kuElisa okuvelulwa koshilundu (II Eehamba 5:9). Eshi omulumenhu omunyasha a wila kefyo laye okudja pekende lopombada, omuyapostoli Paulus okwe mu papatela nokualulila omwenyo molutu lafya (Oilonga Yovayapostoli 20:10). Otu na ashike omushangwa womido 3½ donghalamwenyo yOmwene wetu Jesus, ashike momido odo dishona, Ye okwa twikila okuvelula ovanaudu. Ovapofi ova twikululwa. Ovanashilundu ova veluka. Ovafitamatwi ova tambula okuuda ko kwavo. Oingudu oya enda. Keshe oungone woudu owa veluka (Mat 4:23).
Kalunga okwa kwashilipaleka yo ovaxunganeki vaye momikalo dikwao ponho yomaveluko. Nokuli oiholekwa lela yomoule womutima oya shiivika kovalumenhu vaKalunga. Ohamba Nebukadnesar okwa li nondjodi ipiyaneki, ashike ye ina dimbuluka osho ya li tai ti. Omuxunganeki Daniel okwa lombwela ohamba odjodi aishe nexunganeko olo lashikula (Dan 2:28). Kape na shimwe sha holekwa Salomo eshi Ohamba omukainhu yokuSheba ye uya moipafi yaye. Ye okwa li a yadifwa unene nOmhepo opo ye e mu lombwela omapulo omutima waye manga ye ine a pula (I Eehamba 10:3). Elisa okwa lombwela Ohamba yaIsrael eemhangela adishe dOhamba yaSiria, nokuli eendjovo domeholeko da popiwa momutala waye (II Eehamba 6:12).
Okupitila momalihumbato Aye mwene, Omwne Jesus luhapu okwa ulika kutya Omhepo ei yokukonakona oyo Omhepo yaKristus. Ye okwa konakona oushitwe waNatanael eshi Ye a ti, “Tala Omuisrael washili, ou muye muhe nonyango!” Ndele Jesus okwa ya oku ka lombwela Natanael apa a li eshi Filippus e mu lombwela kombinga yaMessias (Johannes 1:48). Eshi Natanael a mona kutya Jesus oku shii omutima waye, ye okwe Mu dimbulula meendelelo onga Kristus. Efimbo lotete Jesus a mona Petrus, Ye okwe mu lombwela edina laxe, Jona (Johannes 1:42). Petrus okwa fiya po aishe nokushikula Jesus onghalamwenyo yaye aishe. Jesus okwa shakeneka omukainhu Omusamaria pondungu noku mu lombwela oulunde waye wapiti. Oitya yaye yotete oya li, “Omufimanekwa, ondi wete kutya oove omuxunganeki” (Johannes 4:19). Aveshe vatatu vovanhu ava ova li kokweenda kwonghalamwenyo kwa yooloka, natango ova dimbulula meendelelo Jesus eshi Ye a ulika oshali shokukonakona.
Oshiyandjiwa eshi osha kana po eshi epandja laxuuninwa lOmbibeli la nyolwa? Nge oikumifilonga ei oya shangwa ya yela unene mOmbibeli, oili peni nena? Omuxunganeki wefimbo-lomoode ota kala lela a kwashilipalekwa koikumifilonga.
Hano Kalunga okwa dimbwa ovanhu Vaye? Ye oku li natango ta dulu okuvelula ovanaudu? Ye natano oha popi nafye okupitila movaxunganeki Vaye? Umwe womovaxunganeki okwa mona efimbo eli?
Ope na omaxunganeko oo e na natango okukala a wanifwapo?