Efiku limwe onda tokola onda mona omukalo okulikanyuna eifano olo. Onda li handi i kouninginino okulonga mofaalama. Kaume, Kalunga kwinya omunene ashike ngaashi Ye e li onhele keshe. Monamo sha meshiivo lange. Ngeenge Ye te ku ifana, Mu nyamukula.
Ongula imwe yaSeptemba momudo 1927, onda lombwela meme kutya ohandi i molweendo loku kaonga onhanda koTunnel Mill, osho shi li lwopeemaila omulongonanhe okudja koJeffersonville oko twa li hatu di pefimbo olo. Onda longekida nale olweendo lokoArizona nookaume vamwe. Eshi Meme a uda kuame natango, ngha li koTunnel Mill ashike omoPhoenix, Arizona, handi faduka po Kalunga kOhole. Onghalamwenyo yofaalama oya li iwa unene pokafimbo, ashike oya kulupa diva, ngaashi keshe ounyenye ukwao wounyuni. Ashike apa nandi tye, Hambelela Kalunga, kutya eshiivo naJesus ola kula linyenye nolinyenye efimbo alishe noi nali kulupa nande. Jesus oha yandje ombili ya wana nokuhekeleka alushe.
Omafimbo mahapu onda uda omhepo tai pepe okupitila momipine dile. Osha li tashi monika onga ndi udite Ewi Laye tali ifana kokule momufitu, tali ti, “Adam, ou li peni?” Eenyofi ota di monika dili popepi unene to dulu oku di toolola nomake oye. Kalunga ta monika e li popepi unene.
Oshinima shimwe kombinga yoshilongo osho eendjila mombuwa. Nge owa di ko kondjila, oto kana noupu. Onghee omafimbo mahapu ovatalelipo ohava mono oungala vanini vomombuwa nokudja ko koshitauwa shakula oku va toolola. Ohava elalela mombuwa ndele tava kana nomafimbo amwe tava fi kenota. Onghee osho shi li mondjila yOukriste - Kalunga oku na oshitauwa shakula. Ye ote shi popi muJesaja, ekapiteli 35. Ohashi ifanwa “Oshitauwa shakula shOuyapuki.” Omafimbo mahapu omaunyenye manini ounyuni ota e ku shiliko koshitauwa shakula. Hano owa kanifa eshiivo loye naKalunga. Mombuwa nge owa kana, oha pa holoka oshitandangole omafimbo amwe. Kovanhu ovo tava fi kenota, oshitandangole ohashi kala omulonga ile etale. Omafimbo mahapu ovanhu oha ve i lotokele nokuwila muyo ashike okulihanga kutya otave likosho meheke lipyu. Omafimbo amwe omunawii ote ku ulikile shimwe osho ye ta ti olo efimbo liwa. Osho oshitandangole ashike, oshi li shimwe shi he fi shoshili. Nge owa pwilikine oto ke li hanga ovemwene to ongele shike omaluhodi momutwe woye. Ino mu pupa, omuleshi omuholike. Itavela Jesus ou te ku pe omeva omwenyo kwaavo va fya ondjala nenota.
Efiku limwe onda mona onhumwafo ya dja keumbo tai lombwele nge kutya umwe womovamwatate vange okwa li ta vele unene. Okwa li oEdward, oo a shikula nge. Inandi shi lipula shelitula mo, onghee onda itavela ye ota kala nawa. Ashike onguloshi imwe konima yomafiku mashona eshi nda li handi di koshilando eshi nda pitila mosaala yonyata mofaalama, onda mona ombapila ili poshitaafula. Onde i kufa po. Otai leshwa, “Bill, ila koulifilo wokolundume. Shafimana unene.” Konima nda leshela kaume ombapila nonda ya koulifilo. Omunhu wotete nda shekeneka okwa li omukulupe omukalelipo woLone Star ou ha longo mofaalama. Edina laye la li Durfy, ashike ohatu mu ifana “Pop.” Ye okwa li noshipala shanyika oluhodi ngaashi ye a ti, “Billy mumati, ondi ku na onghundana ii.” Pefimbo olo folomana okwe uya po ta ende. Ova lombwela nge kutya ondelekelama opo ashike ya fiki, tai lombwele nge efyo lomumwatate wange.
Kaume omuholike, oule wefimbo inandi dula ku linyenga. Ola li efyo lotete mepata letu. Asike onda hala kutya oshinima shotete osho nde lipula osha li nge ye okwa li e lilongekidila okufya. Eshi nda punguluka nokutala omwiidi muhapu mushunga, omahodi okwa lotoka keemhanda dange. Nhumbi nda dimbuluka nhumbi twa kondja pamwe eshi twa li oumatyona nonhumbi sha kala she tu djuupalela.
Otwa ya kofikola noudjuu opo tu lye sha wana. Ominwe oda li dapita mo meenghaku detu notwa li tu na okudjala eendjafa dakulupa dapatwa fiyo opofingo molwaashi ka twa li tu na eehema. Nhumbi handi dimbuluka yo efiku limwe Meme kwa li e na oupungu vakangwa mevela linini vomusha. Inatu lya nounona vakwao. Itatu dulu oikulya ngaashi vo ve i na. Ohatu livakele konima yoshikulundudu nokulya. Ohandi dimbuluka efiku tu na oupungu vakangwa, otwe lipula osha li eudifo lonawa. Onghee opo ndi likwashilipaleke ndi mone mo oshitopolwa shange, onda dja mo manga komatango nokukufa eke liyadi liwa manga omumwatate wange ina mona oshitopolwa shaye.
Hano nda fikama penya handi tale ketango olo tali kukutike omwiidi onde lipula oinima aishe oyo nokukumwa nge Kalunga okwe mu twala konhele ili xwepo. Hano natango Kalunga okwa ifana nge, ashike ngaashi shito, onda kendabala okushi lwifa.
Onde lilongekidila okuuya keumbo molwa epako. Eshi Omupriste McKinny wOngeleka Port Fulton, omulumenhu ou e li onga tate kuame, a udifa epako laye okwa tumbula ngaha, “Otashi dulika pe na umwe apa oo ehe shii Kalunga, nge osho, Mu tambula paife.” Akutu nhumbi nda damakatela oshipundi shange, Kalunga okwa li ta ungaunga natango. Omuleshi omuholike, ngeenge Ye ta ifana, Mu nyamukula.
Itandi dimbwa nande nhumbi Tate naMeme ovakulupe ovafyoona va lila konima yepako. Onda li nda hala ku shuna Ouninginino ashike Meme okwa indila nge neenghono unene ndi kalepo opo lwaxuuninwa onda itavela okukala po nge ohandi dulu ku konga oilonga. Onda mona oilonga diva nEhangano Leyakulo Lopashiwana laIndiana.
Lwo pomido mbali konima fimbo handi yeleke oiyelekifo mofitola kokuyeleka kOilonga Yoxaasa moNew Albany, onda li nda uvilwa koxaasa noule woivike onda hepekwa kuyo. Onda ya keendokotola adishe nda li ndi shii. Inandi mona exwepopalo. Onda hepekwa koululu wedimo, waetifwa keehameko loxaasa. Owa kula wanaipala efimbo alishe. Onda twalwa kovakonakoni moLouisville, Kentucky. Lwaxuuninwa ova ti osha li ondjadjona yange nokutya ondi na okumona etando. Inandi shi itavela osheshi kombinga yange inandi kala nale noululume. Eendokotola oda ti itadi dulu ku ningila nge sha vali nafiyo nda mona etando. Lwaxuuninwa onda itavela li ningwe ashike onda indila opo va longife omuti wokukofifa opo ndi dule okutala etando.
Akutu, onda halele umwe a fikame puame oo e shii Kalunga. Onda itavela momailikano ashike inandi dula okwilikana. Onghee omulongi a dja kOngeleka Yotete Obaptiste okwa ya naame konduda yokutandela.
Eshi va kufa nge koshiitaafula okuya kombete yange, onde liuda amemwene handi pu eenghono nokupwa eenghono efimbo alishe. Omutima wange owa li tau denge noudjuu. Onda uda efyo kombada yange. Omufudo wange owa li tau xupipala efimbo alishe. Ondi shi shii onda hanga exulilo londjila yange. Akutu kaume teelela fiyo wa fika ko lumwe, ndele to ke lipula oinima ihapu wa ninga. Onda li ndi shi shii inandi shila nale omakaya, okukolwa ile ndi na omikalo inadi yela ashike onda li ndi shi shii ngha li nde lilongekidila okushakeneka Kalunga kange.
Kaume kange nge ove oshilyo ashike shongeleka sha talala, oto ka shiiva ngeenge wa hange exulilo kutya ove ino lilongekida. Onghee nge osho ashike u shii osho kombinga yaKalunga kange, ohandi ku pula apa okuya keengolo doye nokupula Jesus e ku pe eshiivo olo lokudalululwa, ngaashi Ye a lombwela Nikodemus muJohannes ekapiteli 3, ndele akutu ehafo ngahelipi eengedjo tadi ka denga. Hambelela Edina Laye.