“Mohla ke ne ke tsoalloa Kentucky kahara motlotloana holimo mono, Lengeloi la Morena le kene ka fesetere la ema mono. Keha Topallo ea Mollo e eme mono.”
Mafube a ne a phunyeletsa a khaola lefifi la sepakapaka se pholileng sa ’Mesa. Fesetere e le ’ngoe, ea patsi keha e butsoe ho lumella leseli la hoseng ho chabela motlotloana oa phaposi e le ’ngoe. Hoseng hona keha maborokoane a luluetsa a tsorame mabapa le fesetere a bina ka bokhoni bohle ba matšoafo a hae. Ka hara motlotloana, Charles Branham e mocha a kenya matsoho a hae kahara para ea hae e ncha ea liofarolo a sheba mohatsae ea lilemo li 15. “Re tla mo rea William,” ntate a rialo.
Eaba sefesetereng ho kena Leseli le kaholima tlholeho. Leseli la parola phaposi la oka-oka holima moalo oo lesea le sa tsoa tsoalloa holima ’ona. E ne e le lona Leseli le ntšitseng bana ba Baheberu Egepeta. E ne e le lona Leseli le kopaneng le Pauluse tseleng ea hae e eang Damaseka. ’Me Le ne le tla tsoelapele ho etella lesea lena pele ho bitsa Monyaluoa oa Kreste lefatšeng. Leseli leo e ne e le Lengeloi la Morena, Topallo ea Mollo; ’me Le ne le boetse le itlhahisitse ho monna.
’Me ka mono, ka hara motlotloana ona oa lithupa, hoseng hoo ha ’Mesa oa la 6, ’melehisi a bula fesetere ho chabisa leseli hore Mama le Papa ba bone tšobotsi ea ka. Eaba Leseli le lekanang le mosamo le hōba le kena fesetereng. La likoloha moo ke neng ke le teng, la ntoo theohela liphateng. Batho ba ’maloa ba lithaba keha ba eme mono. Ba ntse ba lla.
Lehae le ithobileng le tholoa maralleng a Kentucky e ka boroa, pela motsana oa Burkesville. Mohla la ’Mesa 6, 1909. Lesea e ne e le letsibolo la bana ba leshome ba tsoalloang Charles le Ella Branham.
Haisa-isa eaba Lengeloi la Morena le boela le etela William Branham e mocha.
Bongoaneng ba hae, mohla Lengeloi le buang le eena la ho qala, le itse o tla phela bophelo ba hae pela motse o bitsoang New Albany. A kena ka tlung ho bolella ’mè oa hae se tsoa etsahala. Joaloka ’mè ofe le ofe, a se ke a natsa pale eo hakalo a mpa a mo robatsa liphateng ho thoba matsoalo a hae a ngoana. Lilemo tse peli hamorao, lelapa labo la fallela Jeffersonville, Indiana, limaele tse ’maloa ho tloha motseng o ka boroa oa Indiana oa New Albany.
Lengeloi la boela la bua le moporofeta e mocha lilemo tse ’maloa hamorao. Mohlang oo keha e le Loetse e khutsitseng ’me letsatsi le futhumetseng le chabile hara mahlaku a mebalabala a hoetla. Thaka lena keha le qhiletsa le jere linkho tse peli tsa metsi le theoha ka tselana. Seqo sa poone se ne se bofiloe tlasa monoana oa hae ho thibela lerole. A lula fatše ho phomola meriting oa sefate sa papoliri e telele. Likeleli li tšoloha mahlong a hae a itelela bomalimabe ba hae: Metsoalle ea hae keha e ithabisa khatamping e tšoasang lihlapi, athe eena a tlameha ho thotela ntatae metsi. Hang, moea oa qala oa fuluha o tsokotsa sefate kaholima hae. Eba o tlhlakola mahlo o ema ka maoto a hae. A utloa molumo oa mahlaku a tsokotsoang ke moea…empa moea o le sieo. A sheba holimo, ’me holimo ho ella nqa bohare ba sefate sa papoliri, keha ntho e tsokotsa e fehla mahlaku a omileng.
Eaba hang Lentsoe le a bua, “U se ke ua noa kapa ho tsuba kapa ho silafatsa ’mele oa hao, u emetsoe ke mosebetsi mohla u holang.” Moshanyana ea harohileng letsoalo oa lilemo tse supileng a lahla linkho tsa hae a mathela ho ’mè oa hae.
Joaleka moporofeta Samuele, Molimo o no o boetse o buile le ngoana.
Liveke tse ’maloa hamorao, ke mohla a ntseng a bapala limabole le moena’e. Eaba o arubetsoa ke maikutlo a makatsang. A sheba holima Noka ea Ohio ’me a bona borogo bo botle. Banna ba leshome le metso e tšelela ba oela nakong eo borogo bo parolang noka. Moporofeta e mocha o ne a bone pono ea hae ea pele. A bolella ’mè oa hae, eena a ngola pale ea hae. Lilemo hamorao, banna ba 16 ba oela ba eshoa ho ntse ho hahuoa borogo ba Seterata sa Bobeli mane Louisville, Kentucky bo parola Noka ea Ohio.
Morena o ne a mo bontša lipono tse tlang ho tla. ’Me joaloka baporofeta ba mo etileng pele, lipono ha li eso hlolehe le ka mohla.