Diphiri Tše Di Utolotšwego

Peleng ka bodireding bja Ngwanešu Branham go bile molaleng gore lenaneo la kereke tša maina le agilwe go godiša mekgatlo ya bodumedi, gomme e sego Ebangedi ya therešo. Ngwanešu Branham o be a dumela Beibele Lentšu ka Lentšu, gomme o be a sa khomphoromaese, le ge go be go e ra gore a ngalwe ke badirišane mmogo, bagwera, goba moloko.

Ge e be e sa le leloko la Kereke ya Baptist ya Baromiwa, o ile a botšwa gore a hlomamiše badiredi ba basadi. Go le bjalo, o be a tseba Mangwalo ka moka gabotse kudu. I Timothi 2:12 pepeneneng e re, “Eupša ga ke dumelele mosadi go ruta, le go tšea taolo godimo ga monna, eupša a ba homole,” le I Bakorinthe 14:34 e re, “A basadi ba lena ba homole ka dikerekeng: ka gore ga ba dumelelwa go bolela…” Se e be e se selo kgahlanong le basadi, eupša Beibele e be e le ka boso le bošweu ka thuto. Ge taelo e filwe, o ile a seke a khomphoromaesa ka fao a tlogela kereke.

Leo e be e se Lengwalo le nnoši leo ka go felela le bego le sa šetšwe ke dikereke tša maina ka go felela. Morena o utolotše therešo ka kolobetšo go Ngwanešu Branham. Jesu a ka kgona bjang go laela, “Eyang ka gona, gomme le rute ditšhaba ka moka, ka go ba kolobetša leineng la Tate, le la Morwa, le la Moya wo Mokgethwa,” go le bjalo kolobetšo ye nngwe le ye nngwe yeo e ngwadilwego ka Beibeleng e bile go la Jesu Leina? Moapostola Petro o laetše ka go Ditiro 2:38 go sokologa le go kolobetšwa Leineng la Jesu Kriste. Mangwalo a šoma ka botee bjo bo phethagetšego, eupša go tšere moporofeta go utolla sephiri se: “Tate” ga se leina, “Morwa” ga se leina, le “Moya wo Mokgethwa” ga se leina. Go no swana feela monna yo motee ke tatago bana ba gagwe, morwa wa batswadi ba gagwe, le ngwanešu go bana babo, go le bjalo leina la gagwe ga se “tate,” “morwa,” goba “ngwanešu.” Tate, Morwa, le Moya wo Mokgethwa ke dithaetlele tša Leina la Jesu Kriste. Mateo 28:19 le Ditiro 2:38 di tlile ka peakanyong ya go phethagala.

Le sebe sa setlogo ka Tšhemong ya Edene se ile sa utollwa, e sego go ja kenywa, eupša selo se sengwe sa go senya go fetiša kudu. Go ja seripana sa kenywa go be go kgona bjang go utolla ka pela go Adama le Efa gore ba be ba ponoka? Ga bonolo ga e dire kgopolo. Apola e na le eng go dira le go ponoka? Moporofeta wa Modimo ka go bea pepeneneng o utolotše sephiri se.

Ke bo mang barongwa ba ba bolelwago ka go Kutollo tema ya 2 le 3? Maina a bona a ka no kwagala a tlwaelegile.

Ke bo mang banamedi ba dipere ba sephiri ba Kutollo 6? Ba na le selo se setee se se bohlokwa kudu sa go swana.

A United States e a bolelwa ka Pukung ya Kutollo?

144, 000 ke bo mang bao ba go phološwa ka go tema ya 7?

Ke mang seotswa se segolo sa tema ya 17? Boitsebišo bja gagwe le ka moka diphiri tše di utolotšwe ka Molaetšeng wa moporofeta yo maatla yo a romilwego go tšwa go Modimo.

E sego feela gore mehlolo ya go se balege e latela monna yo, eupša diphiri tše di bego di utilwe ka Beibeleng go kgabola mabaka le tšona di ile tša utollwa ka bodireding bja gagwe. Go tlile gwa ba molaleng gore moporofeta yo o phethagaditše Mangwalo a mantšintši go feta Maleaki 4.

Kutollo 10:7: Eupša matšatšing a morongwa wa bošupa, ge a tla thoma go letša, sephiri sa Modimo se tla be se fedile, bjalo ka ge a se boditše bahlanka ba gagwe baporofeta.

Lentšu le goellela ntle go ya lefaseng gore le tšwele ka ntle ga dikereke tša maina le go boela morago go Lentšu la Modimo la setlogo. Yo mongwe le yo mongwe wa rena o na le sebakabotse se se swanago seo Petro, Jakobo, le Johane ba bilego naso. Re na le sebaka sa go balwa le bahlaolwa ba Modimo ba e sego ba kae bao ba ka se khunamelego mekgatlo ya bodumedi ya letšatši.

Lengwalo le Lekgethwa le bega maphelo le ditiro tša banna bao ba ilego ba sepela le Modimo gomme ba be ba tloditšwe kudu ke Moya wa Gagwe go fihla ba bolela GO RIALO MORENA, gomme mantšu a bona a ile a tiišetšwa ka maswao ao a sa wego le dimaka. Ba be ba le baporofeta ba Modimo, le Lentšu la Modimo go moloko wa bona.

A dinako di a fapana bjale go feta ka fao di bego di le ka gona ge Jesu a be a le fa? E bile baetapele ba bodumedi ba ba go Mmapola. Barutiwa e be e le ba sego nene ba bannyane magareng ga tshephedišo ye kgolo ya bodumedi. Ba ile ba ngwalwa, ba kwerwa, gomme morago ba bolaelwa go tšea leemo kgahlanong le moelamogolo wa tshepedišo ya bodumedi. Re ka no se bolaelwe ditumelo tša rena lehono, eupša ka nnete re a tlaišwa. Bjalo ka Bafarasei le Basadutsei, ga ba kgone go gana mehlolo yeo e bego e latela bodiredi bja Ngwanešu Branham ka fao ba retologela go ditlhaselo tše dingwe. Le ka no kwa gore e be e le moporofeta wa maaka, moetapele wa bodumedi bja motho, goba mo go be kudukudu. Ka nnete, e be e le monna wa go kokobela wa Modimo yo a bego a eme ka go tia kgahlanong le taolo ya go se ineele yeo dikereke tša maina le ditumelo tša batho di nago le yona godimo ga batho ba Modimo. Ba ile ba hlasela Jesu ka tsela ye e swanago ge A be a eme kgahlanong le dithutotayo tša bona le ditšo.

Modimo o ile a hlompha go ikgafa ga Ngwanešu Branham go dumela Lentšu le lengwe le le lengwe ka Beibeleng, gomme O šomiša bodiredi bja gagwe go etapele disoulo tše dimilione go tla go Jesu Kriste. Lehono, Lentšu la Morongwa wa Bošupa le kwagala ntle kudu ka fao Le bego le dira. E ka ba dimilione tše pedi tša batho lefaseng ka bophara ba dumela Molaetša wa Ngwanešu Branham. Ye e ka no ba ba ba sego nene ba bannyane go ba dipilione tše pedi ba ba tleleimago Bokriste, eupša ke neg fao batho ba Modimo ba sego ba ke ba ba ka bonnyaneng ka palo?

Re na le dithero tša go feta 1,200 tšeo di gatišitšwego di swerego Lentšu leo le porofetilwego go tla ka go Kutollo 10:7. Ye nngwe le ye nngwe ya dithuto tše e notlolla diphiri tše di fetišago tša Modimo. Lentšu leo le gona go wena ge o rata go Le kwa.

Ga go nako le e tee fao ke tlišitšego molaetša go batho gore ba ntatele, goba ba tšoene kereke ya ka, goba ba thome kopanelo ye e itšego le mokgatlo. Ga se kake ka dira seo gomme nka se dire seo bjale. Ga ke na le kganyogo ka dilong tšeo, eupša ke na le kganyogo ka dilong tša Modimo le batho, gomme ge nka kgona go phethagatša selo se setee feela ke tla kgotsofala. Selo se setee seo ke go hloma tswalano ya therešo ya semoya gare ga Modimo le batho, fao batho ba tlago go ba dibopiwa tše mpsha ka go Kriste, ba tlatšwa ka Moya wa Gagwe gomme ba phela go ya ka Lentšu la Gagwe. Ke be ke tla laletša, go kgopela le go sebotša ka moka go kwa lentšu la Gagwe nakong ye, gomme le neele maphelo a lena ka go felela go Yena, bjalo ka ge ke tshepha ka pelong ya ka gore ke neetše tša ka ka moka go Yena. Modimo a le šegofatše, gomme a nke go tla ga Gagwe go thabiše pelo ya gago.

Mor. William Marrion Branham