Gwa thoma go gola leswiswiswiswi ka kamoreng ya sepetlele, mo o ka rego e be e le ka dithokgweng tše kgolo. Ke be ke kgona go kwa phefo e tšutla go kgabola matlakala, go le bjalo go be go bonagala e le tsela ye kgolo kgole go tloga sethokgweng. Go molaleng gore o ile wa kwa modumo wa phefo ge e tšutla matlakala, e etla kgauswiuswi le kgauswiuswi le wena. Ka gopola, “Go lokile, le ke lehu le tla go ntšea.” Oo! soulo ya ka e be e swanetše go kopana le Modimo, ka leka go rapela eupša ka seke ka kgona.
Kgauswiuswi phefo e be e etla, kudukudu le kudukudu. Matlakala a phaphasela gomme gatee ka moka, ke be ke ile.
Gwa bonala nako yeo gore ke be ke le morago gape mošemane yo monnyane wa maoto a go se rwale, ke eme ka mothalong ka tlase ga mohlare wo o swanago. Ka kwa Lentšu lela le swanago lela la gore, “O seke wa tsoge wa nwa goba go kgoga.” Gomme matlakala a ke a kwelego e be e le a a swanago ao a go foka ka mohlareng wola letšatši lela.
Eupša ka ye nako Lentšu la re, “Ke go beditše gomme ga se wa ke o e ya.” Le ile la bušeletša lekga la boraro.
Ka gona ka re, “Morena, ge yo e le Wena, ntumelele ke ye morago gape lefaseng gomme ke tla rera Ebangedi ya Gago go tšwa dintlhoraneng tša ntlo le dikhoneng tša diterata. Ke tla botša yo mongwe le yo mongwe ka yona!”
Ge pono ye e fetile, ka hwetša gore ga se kake ka ikwa bokaonekaone. Mmui wa ka o be a sa le ka moagong. O ile a tla gomme a lebelela go nna gomme o be a maketše. O be a lebelelega mo o karego o be a gopola gore ke be ke tla be ke hwile, ka gona a re, “Nna ga ke monna wa go ya kerekeng, mošomo wa ka ke o mogolo kudu, eupša ke a tseba Modimo o etetše mošemane yo.” Ke lebaka la eng a bolela seo, ga ke tsebe. Ga go le yo motee a ilego a bolela eng kapa eng ka yona. Ge nkabe ke be ke tseba nako yeo seo ke se tsebago bjale, nkabe ke ile ka tsoga go tšwa mpeteng wola gomme ka goelela Tumišang Leina la Gagwe.
Ka morago ga matšatši e se makae ke ile ka dumelelwa go boela gae eupša ke be ke sa babja gomme ke be ke gapeletšega go rwala digalase mahlong a ka ka baka la ditlogelwa ke ophareišene. Hlogo ya ka e be e šišinyega ge ke lebelela eng kapa eng lebakanyana.
Ke ile ka thoma go ya ntle go nyaka le go hwetša Modimo. Ke ile ka ya go tloga kerekeng go ya kerekeng, ke leka go hwetša lefelo le le itšego fao go bego go na le pitšo aletareng ya fešene ya kgale. Karolo ya manyami e bile gore ga se kake ke hwetša le le letee.
Ke ile ka bolela gore ge nkile ka ba Mokriste, ke nnete ke tla ba yo motee. Modiredi yo a go nkwa ke dira tshwao yeo o ile a re, “Bjale Billy mošemane, o ya phapogong ya bohlanya.” Ke ile ka bolela gore ge nkile ka hwetša bodumedi, ke be ke nyaka go ikwela bjona ge bo be bo etla, feela bjale ka ge barutiwa ba dirile.
Oo tumišang Leina la Gagwe. Ke ile ka hwetša bodumedi ka morago gomme ke sa na le bjona, gomme ka thušo ya Gagwe, ke tla bo boloka ka mehla.
Bošegong bjo bongwe ke ile ka swarelwa Modimo ke tlala gomme boitemogelo bja nnete bjo ke ilego ka ya ka ntle go mokutwana wa kgale ka morago ga ngwako gomme ka leka go rapela. Ke be ke sa tsebe gore nka rapela bjang ka gona ka fao ke ile ka no thoma go bolela le Yena go swana le ge ke be ke dira yo mongwe le yo mongwe gape. Ka moka gatee fao go ile gwa tla Seetša ka mokutwaneng gomme sa dira sefapano gomme Lentšu go tšwa sefapanong la bolela le nna ka leleme leo ke bego ke sa kgonego go le kwišiša. Ka nako yeo sa ya go tloga. Ke be ke gogegile maikutlo. Ge ke boile go bonna gape ka rapela, “Morena, ge yeo e le Wena, ka kgopelo etla o bolele le nna gape.” Ke be ke bala Beibele ya ka e sa le mola ke be ke le gae go tšwa sepetlele gomme ke be ke badile ka go I Johane 4, “Baratwa, le seke la dumela meoya ka moka, eupša e lekeng ge eba ke ya Modimo.”
Ke be ke tseba gore moya o ile wa tšwelela go nna gomme ge ke be ke rapela o ile wa tšwelela gape. Ka gona go ile gwa bonala go nna o ka re fao dikete tša diponto di be di kukilwe go tloga soulong ya ka. Ke ile ka tabogela godimo gomme ka kitimela ntlong gomme go be go bonala mo o ka rego ke be ke kitima lefaufaung.
Mme a botšiša, “Bill, go diregile eng go wena?” Ke ile ka fetola, “Ga ke tsebe eupša ka nnete ke ikwela gabotse le go ba bohwefo.” Ke be ke se sa kgona go dula ka ntlong botelele bjo bo itšego. Ke be ke swanelwa ke go ya ka ntle gomme ke kitime.
Ke ile ka tseba nako yeo gore ge Modimo a be a nyaka ke rera, O be a tla mphodiša. Ka fao ke ile ka ya kerekeng yeo e bego e dumela go tlotšo ka oli gomme ka fodišwa ka bjako. Ke ile ka bona nakong yeo gore barutiwa ba be ba na le selo se sengwe se bontšintšintši bja badiredi ba se nago naso lehono. Barutiwa ba ile ba kolobetšwa ka Moya wo Mokgethwa gomme ba kgona go fodiša balwetši gomme ba dira mehlolo ye maatla Leineng la Gagwe. Ka fao ke ile ka thoma go rapelela kolobetšo ya Moya wo Mokgethwa gomme ka o hwetša.
Letšatši le lengwe e ka ba dikgwedi tše tshela ka morago, Modimo o ile a mpha tumo ya pelo ya ka. O ile a bolela le nna ka Seetšeng se segolo, a mpotša gore ke ye ke rere gomme ke rapelele balwetši gomme O be a tla ba fodiša go sa kgathale gore ke bolwetši mang ba bego ba na le bjona. Ke ile ka thoma go rera le go dira seo A mpoditšego go se dira. Oo mogwera, nka se kgone go thoma go le botša ka moka tše tša go direga: Mahlo ao a bego a foufaditšwe a ile a bulega. Digole di ile tša sepela. Dikankere di ile tša fodišwa, gomme ka moka mehuta ya mehlolo e ile ya dirwa.
Letšatši le lengwe ka leotong la Spring Street, Jeffersonville, Indiana, ka morago ga tsošeletšo ya dibeke tše pedi, ke be ke kolobetša batho ba 130. E be e le letšatši la go fiša la Agosetose gomme fao go be go le e ka bago 3,000 ya batho ba le gona. Ke be ke swanelwa ke go kolobetša motho wa bo 17 ge ka moka ka pela ke ekwa lela la go homola, le lennyane Lentšu gape gomme la re, “Lebelela godimo.” Lefaufau le be le swana le mphiri ka letšatši leo la Agosetose la go fiša. Re be re se ra ke ra ba le pula ye e itšego mo e ka bago dibeke tše tharo. Ke ile ka kwa Lentšu gape, gomme ka gona gape lekga la boraro la re “Lebelela godimo.”
Ka lebelela godimo gomme kua gwa tla go tšwa lefaufaung naledi ye kgolo ya go phadima, yeo ke ilego ka e bona dinako tše ntši pele eupša yeo ke sego kake ke le botša ka yona. Dinako tše ntši ke boditše batho ka yona e tšwelela gomme ba be ba no sega gomme ba re, “Bill, o no ba feela o eleletša seo. Goba mohlomongwe o be o lora.” Eupša tumišang Modimo, ka ye nako O itaeditše ka Boyena ka go bonagala go bohle, ka baka la gore e tlile kgauswi kudu le nna ka se kgone le go bolela. Ka morago ga ge metsotswana e se mekae e fetile ke ile ka goelela gomme batho ba bantši ba lebelela godimo gomme ba bona naledi feela ka godimo ga ka. Bangwe ba ile ba idibala mola ba bangwe ba goelela gomme ba bangwe ba tšhabela go tloga. Ka gona naledi e ile ya bowa morago ka lefaufaung gomme lefelo leo ya go tloga go lona e be e ka ba disekwere tša dikgato tše lesometlhano gomme lefelo la tšwela pele le sepela gomme le dubagana go rarela goba mo o ka rego maphotho a be a dikologa. Fao go ile gwa bopega ka lefelong le leru le lennyane le lešweu gomme naledi ya amogelwa godimo ka lerung le lennyane le.