Ka Beibeleng, Modimo ka mehla o be a tliša Molaetša wa Gagwe go batho ba lefase ka moporofeta wa lebaka. O boletše le Moshe ka sethokgwa se tukago gomme a mo fa thomo go hlahlela Baheberu go tšwa ka Egepeta. Pilara ya Mollo ya go bonala le maswao a mangwe a be a filwe go hlatsetša bodiredi bja gagwe. Johane Mokolobetši o tiišitše Molaetša go lokišetša lefase go tla ga Mesia. Ge a be a sa kolobetša Morena Jesu ka Nokeng ya Jorodane, Lentšu go tšwa Legodimong le ile la tiišetša thomo ya Johane go tsebiša Kwana ya Modimo, “Yo ke Morwa moratwa wa ka, yo Ke kgahlwago ke yena.” Mengwaga ye e latelago, Lentšu la Morena le ile la kwewa gape le bolela le moporofeta ge A be a bolela le Paulo ka Seetša seo se foufatšago, gomme ka morago la mo fa thomo go bea dikereke ka lenaneo. Go kgabaganya Ditastamente ye Mpsha le ye Tala, Modimo ga se a ke a bolela le batho ba Gagwe ka lenaneo la dikereke tša maina goba mokgatlo wa bodumedi. Ka mehla o be a bolela le batho ka monna yo motee: moporofeta wa Gagwe. Gomme O be a hlatsetša baporofeta ba ka maswao a ka godimo ga tlhago.

Eupša go reng ka lehono? Modimo o sa utolla Lentšu la Gagwe go baporofeta? A fao go na le maswao a ka godimo ga tlhago? A Modimo a ka romela moporofeta wa letšatši la sebjalebjale lefaseng? Karabo ke ya maleba kudukudukudu, “Eye!”

Eupša re ya go tseba bjang ge moporofeta a tsoga? O tla lebelelega bjang? O tla dira bjang? Ke leswao lefe le a tla re fago lona? O tla phethagatša Mangwalo afe?

Baporofeta ba kgale e be e le banna ba bogale ba Modimo, gomme ba be ba sa boife go ema kgahlanong le mekgatlo ya bodumedi. Gabotse, ba be gabotse ka mehla ba kgehlemanywa ke baruti. Eliya o ile a hlohla mekgatlo ya bodumedi ya letšatši la gagwe, a ba botšiša ge eba Modimo o be a tla hlompha moneelo wa bona, goba wa gagwe. Ba goelela. Ba porofeta. Ba tabogela ka godimo ga aletara. Ba itshega ka dithipa. Eupša Modimo ga se a ke a ba kwa. Eliya a lebelela godimo Legodimong a re, “A nke go tsebje letšatši le gore ke wena Modimo ka go Israele, le gore ke nna mohlanka wa gago, le gore ke dirile ka moka dilo tše ka lentšu la gago.” A nape a bitša mollo go theoga go tšwa Legodimong wa tšhuma moneelo. Mika moporofeta o ile a emelana le Kgoši ya Israele, le boprista ka moka, ge a sola Moprista yo Mogolo Zedekia ge a porofetile maaka. Moprista yo Mogolo a mo ratha sefahlegong gomme Kgoši a mo golegela go bolela therešo. Le Morena Jesu o be a hloilwe kudu ke mekgatlo ya bodumedi ya letšatši la Gagwe go fihla ge ba Mmapola mmogo go bapela le dikebekwa tše šorošorošoro. Ge historie e swere therešo, moporofeta o hloiwa ke tshepediši ya sebjalebjale ya dikereke tša maina, gomme o tla bitšwa lehlanya, moporofeta wa maaka, goba go befa kudukudukudu. Eupša Modimo o tla ema kgauswi le mohlanka wa Gagwe.

Ge e ba fao go na le moporofeta mo letšatšing la sebjalebjale, a ka amogelwa bjang ke Kereke ya Katoliki? Kereke ya Baptist? Kereke ya Luthere? Kereke efe kapa efe ya leina?

Morena Jesu o romile bohle ba Mo dumelago: “Gomme maswao a a tla latela bao ba dumelago; Ka leineng la ka ba tla rakela bodiabolo ntle; ba tla bolela ka maleme a maswa; Ba tla tšeela diserpente godimo; gomme ge ba ka nwa selo sefe goba sefe se se bolayago, se ka seke sa ba gobatša; ba tla bea diatla godimo ga balwetši, gomme ba tla fola.” (Mareka 16:17-18) A Lengwalo le ke therešo lehono? Ge e se therešo, Mantšu a Morena a moyafetše neng? Go kgabola Beibele, baporofeta ba be ba kgona go fodiša balwetši, ba rakela bodiabolo ntle, gomme ba dira mehlolo. Moshe o ile a bea serpente ya mphiri pele ga batho ba Israele go ba fodiša go tšwa go longweng ke dinoga tša mpholo (Numeru 21:9). Naamane, Mosiria wa maatla, o ile a tla go Elisa go tla go fodišwa lephera (II Dikgoši 5:9). Ge monna yo moswa a wela lehu la gagwe go tšwa lefasetereng la godimogodimo, moapostola Paulo o ile a mo gokarela gomme a tliša bophelo morago ka mmeleng wa gagwe wa go hwa (Ditiro 20:10). Re na le feela rekhote ya e ka ba 3½ ya mengwaga ya bophelo bja Morena wa rena Jesu, eupša lebakeng la mengwaga yeo e sego mekae, O tšwetše pele a fodiša balwetši. Difofu di be di dirwa gore di bone. Balephera ba be ba fodišwa. Difowa di ile tša amogela go kwa ga tšona. Digole tša sepela. Mohuta wo mongwe le wo mongwe wa bolwetši o ile wa fodišwa (Mat 4:23).

Modimo gape o hlatsetše baporofeta ba gagwe ka ditsela tše dingwe ntle le diphodišo. Le diphiri tše di bego di šireleditšwe kudukudukudu tša pelo di ile tša dirwa gore di tsebje go banna ba ba Modimo. Kgoši Nebukadenetsara o bile le toro ya go fa mathata, eupša ga se a ke a kgona go elelwa gore e be e le ka eng. Moporofeta Daniele o ile a botša kgoši mmogo toro le seporofeto seo se bego se tla latela (Dan 2:28). Ga go selo se se bego se utagetše go Solomone ge Mohumagadi wa Sheba a etla pele ga gagwe. O be a tletše kudu ka Moya go fihla ge a mmotša dipotšišo tša pelo ya gagwe pele a ka di botšiša (I Dikgoši 10:3). Elisa o boditše Kgoši ya Israele dipolane ka moka tša Kgoši ya Syria, le mantšu a ka sephiring ao a boletšwego ka kamoreng ya marobalo (II Dikgoši 6:12).

Ka ditiro tša Gagwe mong, Morena Jesu o be a fela a laetša gore Moya wo wa go fenyeka ke Moya wa Kriste. O ile a fenyeka tlhago ya Nathaniele ge A rile, “Bonang Moisraele wa nnete, yo ka go yena go se nago bomenetša!” Gomme Jesu a tšwela pele a botša Nathaniele fao a bego a le gona ge Filipi a be a mmotša ka Mesia (Johane 1:48). Ge Nathaniele a bone gore Jesu o be a tseba pelo ya gagwe, ka pela a Mo lemoga bjalo ka Kriste. Nako ya mathomo Jesu ge a bona Petro, O ile a mmotša leina la tatagwe, Jona (Johane 1:42). Petro ka gona a napa a tlogela tšohle gomme a latela Jesu bophelo bja gagwe ka moka. Jesu o ile a kopana le mosadi wa Samaria sedibeng gomme a mmotša dibe tša gagwe tše di fetilego. Mantšu a gagwe a mathomo e bile, “Mohlomphegi, ke a bona gore o moporofeta” (Johane 4:19). Ka moka batho ba bararo ba ba be ba etšwa mesepelong ya go fapana ya bophelo, go le bjalo ka pela ba lemoga Jesu ge A be a laetša mpho ya phenyeko.

A mpho ye ile ya timelela ge letlaka la mafelelo la Beibele le ngwalwa? Ge mehlolo ye e ngwadilwe pepeneneng ka Beibeleng, e kae lehono? Moporofeta wa letšatši la sebjalebjale ka nnete o tla bonagatšwa ka mehlolo.

A na Modimo o lebetše batho ba Gagwe? A O sa kgona go fodiša balwetši? A O sa bolela le rena ka baporofeta ba Gagwe? A yo mongwe wa baporofeta o bonetše letšatši le pele?

A fao go na le diporofeto tšeo di swanetšego go phethagatšwa?