Mukwesu Branham kanji ula pandulula i Musumpululu wa Mulilo oyo waka simpikizya mulimo wakwe. Wa kaliko kucindi cakuzyalwa kwakwe, wa kabonwa abali zyuulu ku nkomwe ya Mulonga Ohio, alimwi waka boneka ku mutobela koonse ku masena nkwa kaunka. Mwakali mu 1950 kuteeti Mwami wakapa boonse basyomi a batasyomi bukozyenye bwa cizyibyo citakakilwi kuti oyo Musumpululu wa Mulilo wakali antomwe a musinsimi.
I busiku bwa kazwide mu kubuzyanya kubuleya ku Sam Houston Coliseum. Mukwesu Branham wakali kusololela lubukulusyo lwa kuponesegwa olo lwakali kufumpa nyika. I zileleko zya Mwami Jesu zyakali kucitika mbuli mvula aatala lya myuunda ya kumuuya ya maila. Pele zitondezyo a zigambyo zipati tii zyaka boola kakutakwe kujanwa butongo. Mbuli lyoonse, sinkondo ula busya mulwani. I nguzu zyobilo zyaka swaangana mu Houston Texas, elyo Angelo wa Mwami Mwini waka boola ansi kulwana nkondo.
Bali zyuulu bakaliko kale kupa bumboni ku maleele aatabaliki ayo aa katobela oyu muntu wa Leza. I buzuba kakutanaba, inkamu ya bakambausi bakazundikizya musinsimi kuti babe aa kubuzyanya kwa makani kuponesegwa kwa Buleza, pele kuzundikizya kwakawida sikubelekanyina mudaala uusyomeka wa musinsimi, Mufundisi F.F. Bosworth. Basikudoneeka banji baka imininwa a mukambausi wa Baptisti iwa mu busena a sikujana butongo uumvwigwa ku kuponesegwa kwa Buleza. I kubuzyanya ikwakali kuboola kucitika kwakabbuka ku mitende, eyo yaka fwambaana kulemba kubuleya mitwe ya makani mipati, “I Bbaki lyaboya lwa Lwiiyo lwa zyabukombi Liyo Wuluka Aa 7 p.m. Sunu I Mu Sam Houston Coliseum.”
Sikudoneeka wakaleta sikufotola syazibwene wa kubbadela mali, Ted Kipperman wa Douglas Studios, iwa kulemba bulunguluzi bwa kubuzyanya. Mangolezya ayo, zifoto zyaka kkopwa antoomwe a Mukwesu Bosworth kaimvwi cakutali lumbaizya mbuli sikudoneeka mbwa kaima mu ziimo zya kuyoosya; ciindi cimwi a munwe wakwe ku tondekede mu busyu bwa mwaalumi mudaala uubombede.
Cindi kubuzyanya nokwaka talika, Mufundisi Bosworth wakatondezya cakufwambaana kasimpe ka kuponesegwa kwa Buleza a bumboni bwa Magwalo alimwi mpawo, ku tasiya mubuzyo, wa kalomba boonse abo baka ponesegwa malwazi aabo kuti baime. Bali zyuulu baka buka ku matende abo. Nikwaka mana baabo baka ponesegwa kukkala mu zyuuno zyabo, wa kabuzya ikuti na boonse abo bakapona ku kuponesegwa kwa Buleza abo bakali mamembala mu kwiima kubotu kwa kabungwe ka muntu oyu inga baima. Mamembala aa mbungano aali myaanda yotatwe akaima kutondezya cakubotelwa luse olo Mwami Jesu ndwakaba tondeezya.
I kuzundikizya mpawo kwaboola kuzwa kuli sikudoneeka. “Amu muleke sikuponya wa Buleza alibonye. Amu muleke abeleke.” Mukwesu Bosworth waka cibamba antangalala kuti Jesu alikke ngu wakali Sikuponya wa Buleza, pele kuyobeka kwa kutongooka kwa kazwa kuli sikudoneeka caku zumanana. Kumalekelo, Mukwesu Bosworth waka tamba Mukwesu Branham ku cibumbili. Wa kazumina kutambwa mu kati ka koongolola kwa kwiiminina.
I musinsimi, kazwide a Muuya Uusalala, wakapa kuvwiila ku tobela:
Ta ndikonzyi kuponya muntu naba omwe. Eci Nda amba. Cindi ni Nda kali muvwanda wazyalilwa kutala mu Cisi ca Kentucky, kweendelanya kuli baama bangu beni bayandwa, alimwi eco caka tondezegwa kwiinda mu buumi bwangu, kwakali Mumuni waka njila mu kaanda ako ka cilawo ca bantu abo basyoonto bakaindi kuya, oko nkoca kabede, kacitakwe cibuye muli ncico, tii kakajisi akwalo mpulungwido, baka jisi buyo cintu cakaindi ciniini kuba mpulungwido kuya, mbuli citendele ciniini, elyo bakacitonta kujula kutandila faivi okkuloko kuseeni, elyo Mumuni oyu waka zungulika kunjila mukati mbuli mbo kwakali kutalika kuca kwa buzuba. Kuzwa ciindi eco, Uli aa ndime. Ngu Angelo wa Leza. Wa kandi swaanganya ilwangu mu myaka misyoonto yakinda. Mu ciindi ca buumi bwangu, Wa ka ndaambila zintu ezyo zyaka citika, alimwi Nda kazyaamba mbuli buyo Mbwa ka ndaambila. Elyo Nda zundikizya kufumbwa muntu ku busena buli boonse, kwiinka ku dolopo oko nko Nda ka komenena, na ku busena buli boonse bumbi, kuti kaambo ikaka bambwa lyoonse mu Zina lya Mwami, pele ako ka kaboola mbubonya biyo nzila mbo ka kaambwa kuti inga ciyooba.
Nakamana kwaamba majwi aya, Muuya Uusalala waka wida aa cibumbili, elyo sikufotola waka boteledwe waka kkopa cifoto. Mukwesu Branham wakazwa aa cibumbili a kaambo, kateteete pesi ika cisinsime: “Leza uyo lungulula. Ta ndi caambi limbi.”
Sikubeleka nyina wa Ba. Kipperman wakainka cakufwambaana kuyo beleka kusanzya zifoto zya makani aa cifumo cicilila. Wa kabona cintu cimwi cigambya mbuli mbwa kagwisya cifotolo kuzwa ku maanzi amusamu wakusanzya. Ca, mbuli zifotolo zicilila zili musanu, taakwe cakaliko. Wa jatilisisya moyo wakwe a kuwida kumbele cindi nakasomona cifwanikiso camamanino kuzwa ku maanzi amusamu. Mpaawo, aa cifotolo eco camamanino, kwakali Musumpululu wa Mulilo mu ciimo ciboneka kuukkede atala lya musinsimi wa Leza, William Marrion Branham.
I bana ba Israyeli bakapa bumboni ku Musumpululu wa Mulilo kusololela Musa, elyo bantu ba ciindi casunu bapa bumboni kuti Musumpululu wa Mulilo nguonya kusololela musinsimi uumbi.
I cifotolo cakapegwa cakufwambaana kuli George J. Lacy, Sikulangalanga Uzyibwene wa Mapepa aa makani Aabuzigwa wa U.S. F.B.I., oyo wakatondezya cifoto kuba bwini a muzeezo wakwe wa bupampu. I pepa lya makani lyamulao ilyaka bambwa a Ba. Lacy lili aa peegi icilila.
Oku lyakali kaindi maningi kakutanaba ma kkompyuta na makkamera aa digito, alimwi tii caka konzya kupandululwa a nzila zili zyoonse zizizyilwe ku sayansi, kunze lyakuti kwakali Mumuni wini aatala lya William Branham. Sunu nciconya cifotolo eco inga cabonwa mu United States Library Of Congress, mu dolopo pati lya cisi, Washington DC.