Mansweki Yina Me Monisama

Na ntwala na ministele ya Mpangi Branham ya bandaka pwelele ti sysiteme ya denomination tungamaka samu na ntomoso ya ba-organisation ya misambidi, mpe ve samu na Nsangu ya mbote ya kieleka. Mpangi Branham vwandaka kwikila Biblia Mpova na Mpova, mpe lendaka ve kukakula, ata ti ya zolaka kutuba kukabwana na bankundi ya yandi ya kisalu, bankundi, to dibuta.

Na yina na kuvwandaka diaka mambele ya Dibuundu ya ba-Missionnaire Baptiste, ba tubaka na yandi na kutumbika milongi ya bakento. Mpamba ve, yandi zabaka Masonuku nionso kulutila mbote. I Timothée 2:12 pwelele ke tuba, “Kasi mu ke pesa ve muswa na bakento na kulonga, to na kuyala na zulu ya bakala, kasi na kuvwanda swi,” mpe I Corinthiens 14:34 ke tuba, “Bika ti bakento ya beno kuvwanda swi na kati ya mabuundu: samu ba me pesa bawu ve muswa ya kutuba…” Yayi vwandaka kima ve samu na kutelemina bakento, kasi Biblia vwandaka pwelele na zulu ya diambu yango. Ntangu ba pesaka ntumunu, yandi lendaka ve kukakula ti yandi bikaka dibuundu yango.

Yayi vwandaka ve Disonuku mosi kaka yina vwandaka ya muvimba ya kuzimbana na ba-denomination. Mfumu talisaka kieleka na zulu ya mbotika na Mpangi Branham. Wapi mutindu Yesu tumaka “Beno kwenda bisika nionso, mpe beno longa na bayinsi nionso, na kubotikaka bawu na nkumbu ya Tata, mpe ya Mwana, mpe ya Mpeve-Santu,” kasi mbotika nionso yina ba sonikaka na kati ya Biblia vwandaka na Nkumbu ya Yesu? Ntumwa Pierre tumaka na Actes 2:38 na kubalula bantima mpe kubaka mbotika na Nkumbu ya Yesu Klisto. Masonuku ke salaka na ngwisani ya kulunga, kasi ya lombaka profete samu na kutalisa kinsweki yayi: “Tata” kele ve nkumbu, “Mwana” kele ve nkumbu, mpe “Mpeve-Santu” kele ve nkumbu. Kaka mutindu bakala mosi kele tata ya bana ya yandi, mwana ya bibuti ya yandi, mpe mpangi ya bakala samu na bampangi ya yandi ya babakala mpe ya bakento, kasi nkumbu ya yandi kele ve “tata,” “mwana,” to “mpangi ya bakala.” Tata, Mwana, mpe Mpeve-Santu kele bisalu samu na Nkumbu ya Yesu Klisto. Matthieu 28:19 mpe Actes 2:38 me kwisa na kati ya ndonga ya kulunga.

Mpe disumu ya kisina na kati ya Disamba ya Eden talisamaka, ve mutindu kudia kitini ya mbuma, kasi kima mosi ya kulutila yimbi. Wapi mutindu ti kudia kitini ya mbuma ya lendaka talisa mbala mosi na Adam mpe Eve ti bawu vwandaka kinkonga? Ya zolaka ve kaka kuvwanda na mfunu. Yinki mbuma fwana kusala na kuvwanda kinkonga? Profete ya Nzambi talisaka pwelele kinsweki yayi.

Nani vwandaka bawanzio yina ba me tubila na Apocalypse kapu 2 mpe 3? Bankumbu ya bawu lendaka wakana yina me zabana.

Nani kele minati-mpunda ya mansweki ya Apocalypse kapu 6? Bawu kele na kima mosi ya kulutila mfunu na kimvuka.

Ba me tubila Etats-Unis na kati ya Buku ya Apocalypse?

Nani kele 144.000 yina kuzwaka mpulusu na kapu 7?

Nani kele kento ya kindumba ya nene ya kapu 17? Nkumbu ya yandi mpe binsweki yayi nionso talisamaka na kati ya Nsangu ya profete yayi ya ngolo yina Nzambi tindaka.

Ve kaka bimangu yina ba lendaka ve kutanga landaka bakala yayi, kasi mansweki yina bumbamaka na kati ya Biblia na kati ya bansungi talisamaka diaka na ministele ya yandi. Yawu kumaka pwelele ti profete yayi lungisaka Masonuku mingi kulutila Malachie 4.

Apocalypse 10:7: Kasi na bilumbu ya ndinga ya wanzio ya sambwadi, ntangu yandi ke banda na kubula muningu, mansweki ya Nzambi ke kuma na nsuka, mutindu yandi tubaka na bisadi ya yandi baprofete.

Ndinga mosi ke na kuboka kuna na yinza samu na kubasika na ba-denomination mpe kuvutuka na Ndinga ya kisina ya Nzambi. Beto nionso me kuzwa bweso ya mutindu mosi na Pierre, Jacques, mpe Jean kuzwaka. Beto me kuzwa bweso ya kutangama mwa nkonga ya fioti ya Nzambi yina ke fukama ve na ntwala ya ba-organisation ya misambidi ya bubu yayi.

Masonuku ya Santu ke zonzila baluzingu mpe bisalu ya bantu yina tambulaka na Nzambi mpe vwandaka ya kupakulama mingi na Mpeve ya Yandi ti bawu vwandaka tuba MUTINDU ME TUBA MFUMU, mpe bandinga ya bawu siamisamaka na nzila ya bidimbu yina ke kubwaka ve mpe mambu ya ngitukulu. Bawu vwandaka baprofete ya Nzambi, mpe Ndinga ya Nzambi samu na nsungi ya bawu.

Bantangu kele ya kuswaswana ntangu yayi na yina bawu vwandaka ntangu Yesu vwandaka awa? Ya vwandaka bantwadisi ya misambidi yina komaka Yandi na kulunsi. Bilandi vwandaka mwa nkonga ya fiotyi na kati ya sysiteme ya nene ya misambidi. Bawu mangaka bawu, ba sekaka bawu, mpe diaka ba kufwaka bawu samu bawu teleminaka sysiteme ya nene ya denomination. Ba lendaka ve kufwa beto samu na bakundima ya beto bubu yayi, kasi kieleka ba ke talisaka beto mpasi. Mutindu ba-Pharisien mpe ba-Saducéen, bawu lendaka ve kumanga bimangu yina landaka ministele ya Mpangi Branham na yina bawu ke lemuka na bakunwanisa yankaka. Beno lendaka kuwa ti yandi vwandaka profete ya luvunu, ntwadisi ya nsambulu mosi, to ya kulutila yimbi. Na kieleka, yandi vwandaka bakala ya kukikulumusa ya Nzambi yina teleminaka na ngolo nionso luyalu yina ke ninganaka ve yina ba-denomination mpe bansambulu kuzwaka na zulu ya bantu ya Nzambi. Bawu nwanisaka Yesu na mutindu mosi ntangu Yandi teleminaka ba-dogme ya bawu mpe binkulu.

Nzambi zitisaka luzolo ya Mpangi Branham samu na kukwikila Ndinga nionso na kati ya Biblia, mpe Yandi ke na kusadila ministele ya yandi samu na kutwadisa mafuku ya mioyo na Yesu Klisto. Bubu yayi, Ndinga ya Wanzio ya Sambwadi ke na kuboka ngolo mutindu Yawu salaka ntete. Pene ya bantu mafuku zole na yinza ya muvimba ke kwikila Nsangu ya Mpangi Branham. Yayi lendaka vwanda mwa nkonga ya fioti na kati ya bakiasa zole yina ke ndimaka Buklisto, kasi wapi ntangu bantu ya Nzambi vwandaka ve na kati ya nkonga ya fioti?

Beto kele na malongi yina ba me kanga na bande kulutila 1.200 yina kele na Ndinga yina pesaka profesi samu na kukwisa na Apocalypse 10:7. Malongi yayi nionso ke talisa mansweki ya kulutila ya Nzambi. Ndinga yayi kele ya kukubama samu na beno kana beno zola kuwa Yawu.

Ata mbala mosi ve mu me longaka nsangu mosi na bantu ti bawu lendaka kulanda munu, to kukota na dibuundu ya munu, to kubanda mwa mbundana mpe organization. Mu me salaka yawu ata fioti ve mpe mu ke sala yawu ve ntangu yayi. Mu kele ve na nsatu ya bima yina, kasi mu kele na nsatu na bima ya Nzambi mpe bantu, mpe kana mu lendaka lungisa kaka kima mosi mu ke sepela. Ti mu ke mona kima mosi ti kumona me salama ngwisani ya kieleka kati-kati ya Nzambi mpe bantu, kisika wapi babakala me kuma bivangu ya malu-malu kati na Klisto, ya kufuluka na Mpeve ya Yandi mpe yina ke zinga landila Ndinga ya Yandi. Mu ke bokila, ke dodokila mpe ke kebisa bantu nionso na kuwa ndinga ya Yandi na ntangu yayi, mpe kupesa baluzingu ya beno ya muvimba na Yandi, mpe mutindu mu ke tula kivuvu na kati ya ntima ya munu ti mu me pesa nionso ya munu na Yandi. Nzambi sakumuna beno, mpe bika ti nkwizulu ya Yandi kusepelisa ntima ya beno.

Reverend William Marrion Branham