Ba-vision landilaka. Ba tubaka na yandi na bankundi ya yandi ya dibuundu ti ba-vision ya yandi vwandaka ve ya Nzambi. Ba vwandaka tuba na yandi ti mpeve ya yimbi simbaka yandi. Yayi yangisaka yandi mingi. Kizitu kumaka mingi na kunata, na yina yandi kwendaka na ntoto ya kuyuma samu na kuzwa Luzolo ya Nzambi. Yandi bakaka lukanu ya nene ti yandi salaka nsilulu ti yandi ke vutuka ve kukondwa mvutu. Ya vwandaka kuna, na kati ya mwa yinzo ya mitambu, ti Wanzio ya Mfumu pesaka yandi lutumu ya yandi. Na kati ya bima yankaka, Wanzio tubaka na yandi yayi: “Kana nge nata bantu na kukwikila na nge, mpe nge ke vwanda ya kieleka ntangu nge ke sambila, kima mosi ve ke telama na ntwala ya bisambu ya nge, ata cancer ve.”
Bantembe nionso kwendaka. Yandi kuzwaka ntangu yayi lutumu mpe kwendaka na ntwala na kikesa. Reveil ya kubeluka ya nzutu bandaka.
Bankama ya mafunda vwandaka kwisa na ba-campagne ya Branham. Mafunda belukaka na Nkumbu ya Mfumu Yesu Klisto. Ba-evangeliste yankaka mutindu Oral Roberts, T.L. Osborn, mpe A.A. Allen na mbala mosi landaka Mpangi Branham mpe bandaka ba-reveil ya bawu ya kubeluka ya nzutu. Mfumu nokisaka balusakumunu ya Yandi mutindu ata mbala mosi ve na ntwala. Diboko yina ke belukaka ya Yesu Klisto simbaka mbala mosi diaka bantu ya Yandi.
“Mu dilaka mbala mingi samu na kiese na zulu ya dikabu ya malu-malu ya Nzambi samu na dibuundu ya mpangi ya beto ya luzolo, William Branham, na dikabu ya yandi ya kitoko ya kubeluka ya nzutu. Yayi kele diambu ya Nzambi ke na kusalaka kulutila mingi na zulu ya nionso ti beto lendaka kulomba to kubanza (Eph. 3:20), samu mu me monaka ata fioti ve to mu me tangaka ata fioti ve kima mosi mutindu kubeluka ya nzutu ya ministele ya William Branham.”
Rev. F.F. Bosworth, evangeliste yina me zabana mingi na yinza mpe mosi ya batata ya mbandukulu ya denomination ya ba-Assemblée de Dieu mouvement ya ba-Pentecotiste ya bilumbu yayi.
“Na mbala mosi, beto talaka mutindu yandi vwandaka tuba na bakala mosi ya kulala na zulu ya mbeto ya camp. Ntete ya vwandaka ve na kidimbu ya mvutu ya mayele na bakala yango. Ntendulu kwisaka na manima na kento mosi vwandaka ya kutelama na lweka, ti bakala yango vwandaka kaka kufwa ve na cancer, kasi yandi vwandaka kifwa-makutu mpe lendaka ve kuwa yina ba vwandaka kutuba.
Mpangi Branham na manima tubaka ti ya ke vwanda mfunu samu na bakala yango na kuyamba kuwa ya yandi na yina yandi lendaka tuba na yandi samu na kubeluka ya cancer ya yandi. Ya vwandaka na mwa ntangu ya kubeluka. Na mbala mosi bakala yango lendaka kuwa! Masa ya meso ya nene bandaka na kukulumuka na matama ya bakala yango yina kizizi vwandaka na bankokila nionso ya mawa mpe swi. Yandi kuwaka bukebi ya nene na yina ba tubaka na yandi samu na kubeluka ya yandi na cancer.”
Rev. Gordon Lindsay, nsoniki ya kulunga, mulongi, and mubandisi ya Christ For The Nations Institute.
“Mpangi Branham tubaka, ‘Kimonikisi me beluka.’ Ntima ya munu dumukaka. Mu basikaka kuna mpe ndimaka Mfumu mutindu Munyakisi ya munu. Mu tulaka na lweka ba-bequille ya munu…mpe yisi ya Mazulu kubwaka!”
William D. Upshaw, Senateur ya Etats-Unis (1919-1927), candidat President ya Etats-Unis na 1932. Kikata kubanda yandi kubwaka mpe bukanaka mukongo ya yandi mutindu mwana. Yandi vwandaka na bamvula 84 ntangu yandi belukaka ya muvimba na kisambu ya Mpangi Branham, na manima ya kuvwanda kikata bamvula 66. Yandi vwandaka ata fioti ve na nsatu ya kiti ya bambevo to ba-bequille samu na luzingu ya yandi ya muvimba.
“Mu vwandaka ya kulala na mukongo ya munu bamvula nana na bangonda yivwa na Tuberculose mpe badokotolo yambulaka munu. Na mpasi mu vwandaka na bakilo makumi zole na zole mpe ya monanaka ti kivuvu nionso vwandaka me kwenda. Na yina katuka na Jeffersonville, Indiana, kwisaka Reverend WM Branham na nzila ya vision yina yandi monaka samu na mwana-dimeme yina vwandaka ya kukanga na kati ya ntoto ya kuyuma mpe vwandaka boka ‘Milltown,’ yina kele kisika mu ke zingaka. Mpangi Branham me vwandaka ata fioti ve awa to zabaka ata muntu mosi ve awa. Ntangu yandi kwisaka, yandi tentikaka maboko na zulu ya munu mpe sambilaka, na kubokilaka na zulu ya munu Nkumbu ya Mfumu ya beto ya luzolo Yesu. Kima mosi monanaka ti ya kangaka munu mpe na mbala mosi mu telemaka na kutondaka Nzambi samu na ngolo ya Yandi samu na kubeluka. Mu kele ntangu yayi pianiste na kati ya dibuundu ya ba-Baptiste awa.”
Georgia Carter, na Milltown Indiana, belukaka na Tuberculose na kitezo ya nsuka na mvula 1940 mpe belaka ata fioti diaka ve kimbevo yina kilumbu yankaka na luzingu ya yandi. Yandi me talisaka makumi ya mafunda ya bantu yina belukaka na nzila ya ministele ya yandi mpe ke na kubelukaka diaka bubu yayi.