Beto ke tuba ti malongi ya dibuundu ya beto "ya kuzabana" kele Biblia, kubanda Genèse tii Apocalypse. Nsamunu ya lukwikilu ya beto lenda vwanda na bunkufi mutindu yayi: Kledo yankaka ve kasi Klisto; musiku yankaka ve kasi zola; buku yankaka ve kasi Biblia.

Yinga! Miklisto fwana kukwikila na Ndinga nyonso ya Nzambi; ya kele samu na yina beto ke kwendaka na dibuundu mpe ke tangaka Babiblia ya beto. Samu na yinki nge ke kwikila kitini ya Biblia yina ke tuba ti Yesu kufwaka samu na masumu ya beno, mpe kuzaba ve mutindu disumu bandaka na disamba ya Eden?

Nzutu ya Klisto kele ve kinzambi-nzambi to denomination, mpe kondisyo mosi samu kukuma mambele kele kukwikila na Mfumu Yesu. Kukikwamisa ve na kuzwa buku ya dibuundu to kufulusa mikanda na bakuluntu ya mabuundu. Kwikila kaka Ndinga, mpe Mfumu ke tala yina yankaka.

Beto kele ve organisation ya dibuundu, kasi beto ke sadilaka mafunda ya mabuundu mpe mafuku ya bantu na yinza ya muvimba na kupesaka bawu bima ya nsambulu. Kisalu ya beto kele kupesa bantu ngolo ya kubelama na Mfumu Yesu na kukumisaka Nsangu ya Yandi ya mbote na bantu nyonso na zulu ya ntoto.

Kana nge kuzwa muntu ve na kubotika nge na Nkumbu ya Mfumu Yesu Klisto, tinda beto email na adresse ya nge mpe beto ke tinda nge liste ya mabuundu ya kizunga ya nge bayina lenda botika nge mbote. Bambuka moyo, landila Biblia, ya kele mfunu na kubotama na Nkumbu ya Yesu, mpe ve na bisalu ya Tata, Mwana, mpe Mpeve-Santu.

Mfumu Yesu tubaka: "Beno fundisa ve, samu ti beno kufundama ve." Muntu ve kele na bumfumu ya kufundisa mpulusu. Yesu tubaka mpe: "Yandi yina ke kwikila mpe ke botama ke vuuka, kasi yandi yina ke kwikila ve ke bedisama." Ata ti nge kele ya Katolika, ya Baptiste, to ya Pantekote; kana nge ke kwikilaka na Mfumu Yesu Klisto, nge ke vuuka.

Voice Of God Recordings, Inc. kele ministele samu na bantu nyonso, ya ke salaka kuzabana ya Nsangu ya Mfumu Yesu Klisto. Bima yina kaka beto ke kabulaka kele malongi ba bakaka na babande ya mufwa William Marrion Branham, profete ya Nzambi mpe mumwangisi-nsangu ya kuzabana na yinza. Bisalu ya beto kele kukabula ba-CD MP3, ba-DVD, bavideo, balogisyele, babuku, bamagazine, ba-tracte, bafoto, bazulunale ya mikanda, mpe basite Web.

Reverend Branham vwandaka mumwangisi-nsangu ya kuzabana na yinza ya muvimba, yandi kotaka na kisalu ya kumwangisa-nsangu kubanda pene ya mvula 1947 tii mvula 1965. Yandi twadisaka kaka ve mafuku ya bantu na Klisto, kasi Nzambi pesaka kimbangi ya ministele ya yandi na lutangu mingi ya bimangu. link yayi ke pesa nge nkotolo na ministele ya yandi.

Ya kele kyuvu ya mbote, ti beto zola kuyufula mabuundu nyonso ya ntama ya bubu yayi. Nzambi me tinda profete! Samu na yinki bantu nyonso ke zonzila ve na yawu? Bawu zolaka sala yawu.

Kaka mutindu Josué pesaka luvalu mingi na Moïse. Moïse vwandaka profete yina vwanda nata Nsangu ya Nzambi. Mpangi Branham me sala kima mutindu mosi.

Paul tubaka na I Corinthiens 11:15: "Kasi kana kento kele na nsuki ya yinda, ya kele nkembo samu na yandi: samu ti nsuki me pesama na yandi samu na kufuka." Paul tubaka mpe ti kento zolaka "lwata kilele ya kulunga…" mpe Moïse tubaka, ti, "Kento ke lwata ve yina kele ya bakala." Kana Biblia me tuba yawu, na yina Miklisto ya kieleka ke kwikila yawu.

Nge ke kuwza ba-site web yina ke teleminaka nyonso mpe mambu nyonso, mpe na Biblia. Beto ke lomba nge kaka, na kufundisa Nsangu yina beto me lakisa nge, landila Ndinga ya Nzambi, ve landila banzonzolo ya mpamba kaka, yina ba ke kuzwaka na internet. Bambuka moyo ti, ya kele ve na muntu yina ba zonzaka yimbi mingi kulutila Mfumu Yesu. Kana nge sala kima ya mbote, nge lenda vingila ba tonga nge.

Tala, ya kele ve na kisika na site web yayi kisika ya kusala dikabu. Ntangu kilumbu ke kwiza ti beto fwana lomba mbongo, kuna ntangu me kuma samu na ministele yayi na kusuka. Yayi kele ve samu na mbongo, ya kele samu na kuzwa myelo samu na Yesu Klisto.

Biblia ke tuba, "lukwikilu ke kwizaka na nzila ya kuwa," na yawu beto ke pesa nge ngolo na kulandila kuwa. Beto kele na malongi yina ba bakaka na babande kuluta 1200 ya kele ya mpamba na kubaka. Beto lenda tinda nge bima yango na mail kana nge ke na kuzwaka mpasi na kubaka bafisye electronique yayi.

www.branham.org ke samunaka konso kilumbu bansangu mpe bimbangi ya ministele ya beto. Beto ke lomba nge na kwizaka tala konso kilumbu mpe kutanga bimbangi ya mindimi ya yinza ya muvimba. Kukondwa ntembe nge ke yituka na kutala bima nyonso ya kulutila yina Mfumu Yesu ke na kusalaka bubu yayi, na ntangu ya beto yayi.