Mpangi Branham mbala mingi ke talisaka Dikunzi ya Tiya yina siamisaka ministele ya yandi. Ya vwandaka kuna na mbutukulu ya yandi, mafunda monaka yawu kuna na kumu ya Nzadi Ohio, mpe ya monanaka ti ya vwandaka landa yandi bisika nionso ya vwandaka kwenda. Ya vwandaka na mvula 1950 ti Mfumu pesaka na bakwikidi mpe bantu ya kukondwa lukwikilu mutindu ya nsiamisa yina ke kubwaka ve ti Dikunzi yayi ya Tiya vwandaka na profete.
Nkokila vwandaka na mvwalangani na kati ya muvusu na Colisée ya Sam na Houston. Mpangi Branham vwandaka twadisa reveil mosi ya kubeluka ya nzutu yina vwandaka ningisa kizunga. Balusakumunu ya Mfumu Yesu vwandaka tiamuka mutindu mvula na zulu ya bilanga ya kimpeve ya ble. Kasi bidimbu ya nene mpe mambu ya ngitukulu kwisaka ve kukondwa masawula. Kaka mutindu na mumesanu, mbeni telemisaka munwanisi. Bangolo nionso zole kutanaka na Houston na Texas, mpe Wanzio ya Mfumu Yandi mosi kulumukaka samu na kunwana bitumba.
Mafunda vwandaka ntete kuna samu na kupesa kimbangi ya bimangu yina ba lendaka ve kutanga yina vwandaka landa bakala yayi ya Nzambi. Kilumbu mosi ntama mingi ve, kimvuka ya milongi awa tulaka ntembe na profete samu na kuswana na zulu ya kubeluka ya Kinzambi, kasi ntembe yango kubwaka na zulu ya nkundi ya kieleka ya kiboba ya profete, Reverend F.F. Bosworth. Bantu mingi ya ntembe ba nwaninaka bawu na mulongi ya Baptiste ya kizunga yina mpe nzonzi ya musawudi ya Kubeluka ya kinzambi. Ba tulaka kuswana yina vwandaka kwisa na bazulunale, yina na nswalu nionso samunaka yintu ya dilongi,
“Kazaka Ya Theologie Ke Pumbuka Na Ngunga Ya 7 Na Nkokila. Bubu Yayi Na Colisde Ya Sam Na Houston.”
Muntu ya ntembe futaka mbongo na photographe mosi ya lukumu, Ted Kipperman ya Studio Douglas, samu na kutula na mukanda kuswana yango. Na nkokila yina, ba bakaka bafoto na Mpangi Bosworth ya kutelama na luzitu na yina muntu ya ntembe telamaka na bantelamanu ya yandi ya ntitisa; na ntangu mosi na musapi ya yandi ya kuludika na kizizi ya kukikulumusa ya bakala ya kiboba.
Ntangu kuswana bandaka, Reverend Bosworth na nswalu nionso siamisaka bukieleka ya kubeluka ya Kinzambi na nsiamisa ya Masonuku mpe na manima, samu na kubika ata kyuvu mosi ve, yufulaka muntu nionso yina belukaka na bimbevo ya bawu na kutelama. Bantu mafunda telamaka. Na manima bayina belukaka vwandaka na bisika ya bawu, yandi yufulaka kana bayayi nionso belukaka na nzila ya kubeluka ya Kinzambi vwandaka bamambele ya kieleka ya denomination ya bakala yayi ti bawu telama. Bamambele ya dibuundu bankama tatu telemaka na lulendo samu na kutalisa kyadi yina Mfumu Yesu talisaka bawu.
Ntembe kwisaka ntangu yayi na muntu ya ntembe. “Bika ti munyakisi yina ya Kinzambi kukwisa. Bika ti yandi sala yawu.” Mpangi Bosworth samunaka yawu pwelele ti Yesu vwandaka Munyakisi mosi kaka ya Kinzambi, kasi muvusu landilaka na muntu ya ntembe. Na nsuka, Mpangi Bosworth bokilaka Mpangi Branham na estrade. Yandi ndimaka lubokilu na yisi ya makelele ya nsimbisi.
Profete, ya kufuluka na Mpeve-Santu, pesaka mvutu yayi:
Mu lendaka ve kubelusa muntu mosi. Yawu yayi mu ke salaka. Ntangu mu vwandaka bebe yina butukaka na Kizunga ya Kentucky, landila mama ya munu ya luzolo, mpe siamisamaka na kati ya luzingu ya munu, ya vwandaka na Nsemo mosi kwisaka na kati ya kivinga ya mwa kimvuka yina ya ntama kuna, kisika ya vwandaka, ata pavement ve na kati ya yawu, ya vwandaka na nela ve, bawu vwandaka kaka na mwa kima mosi ya ntama samu na nela kuna, mutindu mwa kielo, mpe bawu pusaka yawu kaka samu na kuzibula yawu pene ya ngunga ya tanu na suka, mpe Nsemo yayi zungaka kaka na kati mutindu ya vwandaka kubasika ya mwini. Kubanda ntangu yina, Ya ke vwandaka na munu. Ya kele Wanzio ya Nzambi. Yandi kutanaka na muntu na kimuntu mwa bamvula fioti me luta. Kuna na kati ya luzingu ya munu, Yandi tubaka na munu mambu yina salamaka, mpe mu tubaka yawu kaka mutindu Yandi tubaka na munu. Mpe mu ke tula ntembe na muntu nionso na konso kisika yina, na kukwenda na mbanza yina kisika mu yelaka, to kisika yankaka, ti nsamunu mosi salamaka na Nkumbu ya Mfumu, kasi yina salamaka kaka kieleka mutindu ba tubaka ti ya ke vwanda.
Na manima yandi tubaka bandinga yayi, Mpeve-Santu kubwaka na zulu ya estrade, mpe photographe na luzatu kangaka foto mosi. Mpangi Branham katukaka na estrade na malembe, kasi na nsamunu ya profesi:
“Nzambi ke siamisa. Mu ke tuba diaka ve.”
Kimvuka ya tata Kipperman na nswalu nionso kwendaka kubasisa bafoto yango na zulunale na suka yina landaka. Yandi monaka kima mosi ya ngitukulu mutindu yandi basisaka foto ya ntete ya solution yina yandi vwandaka sala. Yawu, mutindu bafoto tanu yina landaka, vwandaka ndombe. Yandi simbaka ntima ya yandi mpe kubwaka na ntwala ntangu yandi bendaka foto ya nsuka na masini kuna na solution. Kuna, na zulu ya foto yina ya nsuka, vwandaka Dikunzi ya Tiya na mutindu yina lendaka monika na meso ya kutentika na zulu ya yintu ya profete ya Nzambi, William Marrion Branham.
Bana ya Israel pesaka kimbangi ya Dikunzi ya Tiya yina vwandaka twadisa Moise, mpe bantu ya bilumbu yayi me pesa kimbangi ya Dikunzi ya Tiya yayi ke na kutwadisaka profete yankaka.
Ba nataka na nswalu nionso foto yango na George J. Lacy, Mufyongonini ya Nene ya Mambu ya Mikanda ya F.B.I ya Etats-Unis, yina ndimaka foto yango na nsamunu ya yandi ya kulutila nene. Mukanda yina me ndimama na luyalu yina Tata Lacy kele na dititi yina ke landa.
Yayi vwandaka ntama kuna na ntwala ya ba-ordinateur to ba-camera digital, mpe ba lendaka ve kutendula yawu na nzila ya mayele yina me zabana na science, kulutila ti ya vwandaka na Nsemo ya kieleka na zulu ya yintu ya William Branham. Bubu yayi foto yina mosi lendaka monana na kati ya Bibliotheque Ya Congres na Etats-Unis, na kati ya yintu-mbanza, na Washington DC.