Kilumbu mosi mu bakaka lukanu ti mu ke kuzwa nzila samu na kukima lubokilu yayi. Mu vwandaka kwenda na wesete samu na kwenda kusala na kilanga mosi. Bankundi, Nzambi vwandaka kaka nene kuna mutindu Yandi kele bisika nionso. Bika beno kuzwa bweso na nzingulu ya munu. Ntangu Yandi ke bokila beno, beno pesa Yandi mvutu.
Na suka mosi ya Ngonda ya yivwa na mvula 1927, mu tubaka na mama ti mu ke kwenda na Nzietolo ya camp na Tunnel Mill, yina kele pene ya bakilometele kumi na zole na Jeffersonville kisika beto vwandaka zinga na ntangu yina. Mu kubikaka ntete nzietolo mosi na Arizona na mwa bankundi. Ntangu Mama kuwaka munu diaka, mu vwandaka ve na Tunnel Mill kasi na Phoenix, na Arizona, na kukimaka Nzambi ya Zola. Luzingu ya bilanga vwandaka mbote mingi samu na mwa ntangu fioti, kasi na nswalu nionso ya nunaka, mutindu nsatu nionso yankaka ya yinza. Kasi mu zola tuba awa, Lukumu na Nzambi, ti nzingulu na Yesu bandaka na kukuma ya lembami mpe lembami mingi ntangu nionso mpe nunaka ata fioti ve. Yesu ke pesaka ngemba ya kulunga mpe kikesa ntangu nionso.
Bantangu mingi mu me kuwaka ti mupepe ke na kubula na kati ya ba-pine ya nene. Ya monanaka mutindu kaka ti mu lendaka kuwa Ndinga ya Yandi ke bokila ntama kuna na kati ya mfinda, na kutubaka, “Adam, wapi nge kele?” Bambwetete monanaka pene-pene mingi ti beno lendaka baka yawu na maboko ya beno. Nzambi monanaka pene-pene mingi.
Kima mosi samu na kizunga yayi kele banzila na kati ya ntoto ya kuyuma. Kana beno me basikaka ntete na nzila, beno ke zimbana kukondwa mpasi. Bantangu mingi bizieti ke monaka mwa bafelele ya ntoto ya kuyuma mpe ke basikaka na bala-bala ya nene samu na kuzwa yawu. Bawu ke waya-waya na kati ya ntoto ya kuyuma mpe bawu ke zimbana mpe bantangu yankaka bawu ke kufwaka samu na mpwila. Na yina ya kele na nzila ya Buklisto–Nzambi kele na Nzila ya nene. Yandi ke tubila yawu na Esaie, na kapu ya 35. Ba ke bokilaka yawu “Nzila ya nene ya Busantu.” Bantangu mingi mwa bansatu ya yinza ke basisaka beno na nzila ya nene. Na yina beno me zimbisa nzingulu ya beno na Nzambi. Na ntangu beno me zimbana na kati ya ntoto ya kuyuma, kuna bantangu yankaka ke basikaka mirage. Samu na bantu yina ke kufwaka na mpwila ya masa, mirage ke vwanda nzadi to kiziba ya masa. Bantangu mingi bantu ke kimaka mbangu na yawu mpe ke kubwa na kati ya yawu mpe ba ke mona kaka ti bawu ke na kuyobila kaka na kati ya zelo ya tiya. Bantangu yankaka diabulu ke talisaka beno kima yina yandi ke tuba kele na ntangu ya mbote. Yina kele kaka kivudi ya nsemo; ya kele kima yina kele ve kieleka. Kana beno kuwa beno ke mona ti beno ke na kukutika bakyadi na zulu ya yintu ya beno. Beno kuwa yandi ve, nkundi mutangi. Beno kwikila Yesu yina ke pesaka beno masa ya moyo samu na bayina kele na nzala mpe na mpwila ya masa.
Kilumbu mosi mu kuzwaka mukanda mosi na yinzo na kutubaka na munu ti mosi ya bampangi ya munu ya bakala vwandaka ya kubela mingi. Ya vwandaka Edward, yina vwandaka na manima ya munu. Ya kieleka mu banzaka ti ya kele ve mpasi, na yina mu kwikilaka ti yandi ke beluka. Kasi na nkokila mosi na manima ya mwa bilumbu fioti ntangu mu vwandaka katuka na mbanza mutindu mu vwandaka luta na kati ya kisika ya madia ya kilanga, mu monaka zulunale mosi na zulu ya mesa. Mu bakaka yawu. Yawu tubaka, “Bill, basika na kilanga ya node. Ya kele mfunu mingi.” Na manima mu tangaka noti yango nkundi ya munu mpe munu basikaka na kilanga yango. Muntu ya ntete mu kutanaka na yandi vwandaka kiboba mosi ya mukengi ya Lone Star yina vwandaka tambula na kilanga. Nkumbu ya yandi vwandaka Durty, kasi beto vwandaka kubokila yandi “Papa.” Yandi vwandaka na nzonzolo ya mawa na zulu ya kizizi ya yandi na yina yandi tubaka, “Billy ntwenya ya bakala, mu me kuzwa nsangu ya yimbi samu na nge.” Na ntangu yina contremaitre kwisaka kuna. Bawu tubaka na munu telegramme me kwisa, na kutubaka na munu lufwa ya mpangi ya munu ya bakala.
Bankundi ya luzolo, na mwa ntangu fioti mu lendaka ve kutambula. Ya vwandaka lufwa ya ntete na kati ya dibuta ya munu. Kasi mu zola kutuba ti kima ya ntete yina mu banzaka vwandaka kana yandi kubamaka na kufwa. Mutindu mu balukaka kuna na nseke ya jaune, masa ya meso kulumukaka na matama ya munu. Mu me bambuka moyo wapi mutindu beto vwandaka nwana kintwadi ntangu beto vwandaka bana-babakala ya fioti mpe wapi mutindu ya vwandaka mpasi samu na beto.
Beto vwandaka kwenda na lukolo na kudiaka na mpasi mingi. Beto vwandaka ve na basapatu ya kulwata na misapi ya makulu ya beto mpe beto vwandaka lwata bakazaka ya ntama ya kukanga tii na nkingu samu beto vwandaka ve na basimisi ya kulwata. Wapi mutindu mu bambukaka moyo diaka kilumbu mosi Mama vwandaka na mwa popcorn na kati ya mwa kantini samu na madia. Beto vwandaka ve kudia na bana yankaka. Beto lendaka ve kuzwa madia mutindu bawu vwandaka kuzwa. Beto vwandaka ntangu nionso kusielumuka na zulu ya mongo mpe kudia. Mu ke bambuka moyo kilumbu yina beto kuzwaka popcorn, beto banzaka ti ya vwandaka madia ya kulutila kitoko. Na yina samu na kuvwanda kieleka mu kuzwaka kitini ya munu na yawu, mu basikaka kuna na ntwala ya suka mpe mu bakaka ndambu ya mbote na ntwala mpangi ya munu ya bakala kubaka kitini ya yandi.
Na yina mu vwandaka ya kutelama kuna ke tala na nseke yina ya kuyuma mu vwandaka banza na bima yayi nionso mpe mu vwandaka kukiyufula kana Nzambi bakaka yandi na kisika ya mbote mingi. Na yina Nzambi bokilaka munu, kasi mutindu na mumesanu, mu mekaka na kunwanisa yawu.
Mu kubamaka samu na kukwisa na yinzo samu na matanga. Ntangu Reverend McKinny ya Dibuundu ya Port Fulton, bakala yina kele mutindu tata samu na munu, longaka na matanga ya yandi yandi tubaka ti, “Ya lendaka vwanda na bayankaka awa yina zaba ve Nzambi, kana ya kele mutindu yina, beno ndima Yandi ntangu yayi.” Oh wapi mutindu mu kangaka kiti ya munu, Nzambi vwandaka sala diaka. Nkundi mutangi, ntangu Yandi ke bokila, beno pesa Yandi mvutu.
Mu ke zimbana ata fioti ve wapi mutindu Tata mpe Mama ya mputu dilaka na manima ya matanga. Mu zolaka vutuka na wesete kasi Mama bondilaka munu mingi na kubikana ti na nsuka mu ndimaka na kubikana kana mu lendaka kuzwa kisalu. Na Nswalu mu kuzwaka kisalu na Public Service Company ya Indiana.
Pene ya bamvula zole na manima na yina mu vwandaka meka bametele na kati ya magazini ya ba bametele na Bisalu ya Gaz na New Albany, mu kubwaka na gaz mpe basabala mingi mu kuzwaka mpasi samu na yawu. Mu kwendaka na badokotolo nionso mu zabaka. Mu lendaka ve kuzwa lembami. Mu kuzwaka mpasi ya kifundu, samu na mpasi ya gaz. Ya kumaka mpasi kulutila mingi ntangu nionso. Ba nataka munu na ba-specialiste na Louisville, na Kentucky. Na nsuka bawu tubaka ti mu vwandaka na appendice mpe ba zolaka sala munu lipaso. Mu lendaka ve kukwikila yawu samu mu vwandaka ata fioti ve na mpasi na lweka ya munu. Badokotolo tubaka ti bawu lendaka diaka ve kusala kima mosi samu na munu tii kuna mu ke kuzwa lipaso. Na nsuka mu ndimaka ti bawu lendaka kusala yawu kasi mu tatamanaka ti bawu sadila anesthesie ya kisika mosi na mutindu ti mu lendaka kutala lipaso.
Oh, mu zolaka ti muntu mosi kutelama pene-pene ya munu yina zabaka Nzambi. Mu vwandaka kwikila na kisambu kasi mu lendaka ve kusambila. Na yina mulongi ya Dibuundu ya Ntete ya ba-Baptiste kwendaka na munu na kati ya kivinga ya lipaso.
Ntangu ba bakaka munu na mesa mpe nataka munu na mbeto ya munu, mu vwandaka kulemba mpe kulemba mingi ntangu nionso. Ntima ya munu vwandaka bula na mpasi. Mu kuwaka lufwa na zulu ya munu. Pema ya munu vwandaka kuma nkufi mingi ntangu nionso. Mu zabaka ti mu kumaka na nsuka ya nzila ya munu. Oh nkundi vingila beno kuma kuna na ntangu mosi, na yina beno ke banza na bima mingi yina beno salaka. Mu zabaka ti mu me kunwaka makaya ata fioti ve, mu me kunwaka malafu ata fioti ve to mu me kuzwaka ata fioti ve bankadulu ya mvindu kasi mu zabaka ti mu vwandaka ve ya kukubama samu na kukutana na Nzambi ya munu.
Nkundi ya munu kana beno kele kaka mambele ya dibuundu ya mambu ya ngaanda, beno ke zaba ntangu beno ke kuma na nsuka ti beno kele ve ya kukubama. Na yina kana yina kele nionso beno zaba samu na Nzambi ya munu, mu ke lomba beno kaka awa na kufukama mpe kulomba Yesu na kupesa beno nzingulu yina ya kubutuka mbala ya zole, mutindu Yandi tubaka na Nicodeme na Jean kapu ya 3, mpe oh wapi mutindu bangunga ya kiese ke bula. Lukumu na Nkumbu ya Yandi.