Ya bandaka na kukuma mudidi mingi na kati ya kivinga ya lupitalu, mutindu ti ya vwandaka na kati ya mfinda ya nene. Mu lendaka kuwa mupepe ke bula na kati ya matiti, kasi ya monanaka mutindu nzila ya nene na kati ya mfinda. Beno me kuwaka kubula ya mupepe kubula matiti, na kukwisaka pene-pene mpe pene-pene mingi na beno. Mu banzaka, “Mbote, yayi kele lufwa ke na kukwisa samu na kubaka munu.” Oh! Moyo ya munu zolaka kukutana na Nzambi, mu mekaka na kusambila kasi mu lendaka ve.
Pene-pene mupepe kwisaka, makelele mpe makelele mingi. Matiti vwandaka tekita mpe nionso na mbala mosi, mu vwandaka me kwenda.
Ya monanaka na ntangu yina ti mu vutukaka diaka mwa mwana ya bakala ya ntwenya na makulu mwasi, ya kutelama na nzila yina na yisi ya yinti yina. Mu kuwaka Ndinga yina mosi yina tubaka, “Kunwa malafu ata fioti ve to kunwa makaya ata fioti ve.” Mpe matiti yina mu kuwaka vwandaka yina mosi bulaka na kati ya yinti yina kilumbu yina.
Kasi na ntangu yayi Ndinga tubaka, “Mu bokilaka nge mpe nge zolaka ve kukwenda.” Ya vutukilaka mbala ya tatu.
Na yina mu tubaka, “Mfumu, kana ya kele Nge, bika mu kwenda diaka na zulu ya ntoto mpe mu ke longa Nsangu ya mbote ya Nge na bansongi ya yinzo mpe bansongi ya babala-bala. Mu ke tuba na muntu nionso samu na yawu!”
Ntangu vision yayi salamaka, mu monaka ti mu kuwaka ti mu vwandaka mbote mingi ve. Chirurgien ya munu vwandaka kaka na kati ya kivinga. Yandi kwisaka mpe talaka munu mpe yitukaka. Yandi monanaka ti yandi banzaka ti mu ke kufwa, na yina yandi tubaka, “Mu kele ve muntu yina ke kwendaka na dibuundu, kisalu ya munu kele nene mingi, kasi mu zaba ti Nzambi me kwisa tala mwana-bakala yayi.” na yina yandi tubaka ti, mu zaba ve. Ata muntu mosi ve me tuba na munu samu na yawu. Kana mu zabaka na ntangu yina yayi mu me zaba ntangu yayi, mu zolaka vumbuka na mbeto yina na kubokaka Lukumu na Nkumbu ya Yandi.
Na manima ya mwa bilumbu fioti ba pesaka munu muswa samu na kuvutuka na yinzo kasi mu vwandaka kaka ya kubela mpe ba tumaka munu na ngolo na kulwata maneti na meso ya munu samu na lubungi na meso. Yintu ya munu vwandaka ningana ntangu mu vwandaka tala kima mosi na mwa ntangu fioti.
Mu bandaka kuna na kusosa mpe kumona Nzambi. Mu kwendaka dibuundu na dibuundu, na kumekaka na kuzwa mwa bisika kisika ya vwandaka na lubokilu na autel ya ntangu ya ntama. Kitini ya mawa kele ti mu kuzwaka ata mosi ve.
Mu tubaka ti kana mu vwandaka ve Muklisto, mu zolaka kieleka kuvwanda mosi. Mulongi yina kuwaka munu kusala nsamunu yayi tubaka, “Ntangu yayi Billy ya ntwenya, nge ke kwenda na kati ya bufanatiki.” Mu tubaka ti kana mu kuzwaka nsambulu mosi ve, mu zolaka zaba yawu ntangu yawu kwisaka, kaka mutindu bilandi salaka.
Oh lukumu na Nkumbu ya Yandi. Mu kuzwaka nsambulu mosi na manima mpe mu kele diaka na yawu, mpe na lusalusu ya Yandi, mu ke landila yawu ntangu nionso.
Na nkokila mosi mu vwandaka na nzala mingi samu na Nzambi mpe nzingulu ya kieleka na yina mu lutaka ti mu kwendaka kuna na kati ya hangar mosi ya ntama kuna na manima ya yinzo mpe mu mekaka na kusambila. Mu zabaka ve wapi mutindu kusambila na ntangu yina ti mu bandaka kaka na kutuba na Yandi mutindu mu lendaka tuba na muntu nionso. Kaka na mbala mosi kwisaka Nsemo mosi na kati ya hangar mpe yawu salaka kulunsi mpe Ndinga na kati ya kulunsi tubaka na munu na ndinga yina mu lendaka ve kubakula. Yawu na manima kwendaka. Mu vwandaka na ngitukulu. Ntangu mu vutukaka diaka na munu mosi mu sambilaka, “Mfumu kana ya kele Nge, pardo kwisa mpe tuba na munu diaka.” Mu vwandaka kutanga Biblia ya munu kubanda mu vwandaka na yinzo katuka na lupitalu mpe mu tangaka na I Jean 4, “Bankundi ya luzolo, beno kwikila ve na bampeve nionso, kasi beno meka yawu kana ya kele ya Nzambi.”
Mu zabaka ti mpeve mosi me monika na munu mpe mutindu mu sambilaka yawu monikaka diaka. Na yina ya monanaka samu na munu ti ya vwandaka na bankama yiya na tatu ya bakilo katukaka na moyo ya munu. Mu kimaka mbangu mpe kwendaka mbangu na yinzo mpe ya monanaka ti mu vwandaka kima mbangu na zulu ya mupepe.
Mama yufulaka, “Bill, yinki me salama na nge?” Mu vutulaka mvutu, “Mu zaba ve kasi ya kieleka mu me kuwa mbote mpe pepele.” Mu zolaka diaka ve kubikana na yinzo ntangu ya yinda. Mu zolaka kubasika mpe kukima mbangu.
Mu zabaka na ntangu yina ti kana Nzambi zolaka munu kulonga, Yandi ke zola kubelusa munu. Na yina mu kwendaka na dibuundu yina vwandaka kwikila na kupakula ya mafuta mpe mu belukaka na mbala mosi. Mu monaka na ntangu yina ti bilandi vwandaka na kima yina milongi mingi kele na yawu ve bubu yayi. Bilandi botamaka na Mpeve-Santu mpe na yina bawu lendaka belusa bambevo mpe kusala bimangu ya ngolo na Nkumbu ya Yandi. Na yina mu bandaka na kusambila samu na mbotika ya Mpeve-Santu mpe mu kuzwaka yawu.
Kilumbu mosi pene ya bangonda sambanu na manima, Nzambi pesaka munu nsatu ya ntima ya munu. Yandi tubaka na munu na kati ya Nsemo ya nene, na kutubaka na munu na kukwenda kulonga mpe kusambila samu na bambevo mpe Yandi ke belusa bawu kukondwa kutala kimbevo yina bawu kuzwaka. Mu bandaka na kulonga mpe kusala yina Yandi tubaka na munu na kusala. Oh nkundi, mu lendaka ve kubanda na kutuba na beno nionso yina salamaka: Meso ya bampofo zibukaka. Bikata tambulaka. Ba-cancer belukaka, mpe bimangu ya mutindu nionso salamaka.
Kilumbu mosi na makulu ya Spring Street, na Jeffersonville, na Indiana, na manima ya reveil ya basabala zole, mu vwandaka botika bantu 130. Ya vwandaka na kilumbu ya mwini ya Ngonga ya nana mpe ya vwandaka na bantu pene ya 3.000 kuna. Mu vwandaka pene ya kubotika muntu ya 17 ntangu na mbala mosi mu kuwaka yina diaka, mwa Ndinga ya fioti diaka mpe yawu tubaka, “Tala na mazulu.” Matuti vwandaka mutindu kisengo na kilumbu yina ya mwini ya Ngonda ya nana. Beto kuzwaka ve ata mvula mosi pene ya basabala tatu. Mu kuwaka diaka Ndinga, mpe na manima diaka mbala ya tatu yawu tubaka “Tala na mazulu.”
Mu talaka na mazulu mpe kuna kwisaka na matuti mbwetete ya nene ke lezima, yina mu monaka bambala mingi na ntwala kasi ti mu me tubaka yawu ve na beno samu na yawu. Bambala mingi mu vwandaka tuba na bantu samu na yawu ti yawu monikaka mpe bawu vwandaka kaka kuseka munu mpe vwandaka tuba, “Bill, nge ke na kubanza kaka na yawu. To ntangu yankaka nge vwandaka lota.” Kasi lukumu na Nzambi, mbala yayi Yandi kukitalisaka Yandi mosi pwelele na ntwala ya bantu nionso, samu yawu kwisaka pene-pene ya mingi na munu ti mu lendaka ve kutuba. Na manima ya mwa basekonde fioti lutaka mu bokaka mpe bantu mingi talaka na mazulu mpe monaka mbwetete kaka na zulu ya munu. Bantu yankaka kubwaka ngambu na yina bantu yankaka vwandaka boka mpe bantu yankaka kimaka mbangu. Na manima mbwetete vutukaka na kati ya matuti mpe kisika yina ya katukaka vwandaka pene ya bametele kale yiya mpe kisika yayi landilaka na kuningana mpe vwandaka ningana ngolo mingi pene to mutindu bitembo vwandaka baluka. Ya salaka na kisika yayi mwa dituti ya fioti ya mpembe mpe mbwetete vwandaka kuzwa na zulu na kati ya mwa dituti yayi.