Bandinga ya nsuka yina ba sonikaka na kati ya Ngwisani ya Ntama pesaka nsilulu yayi: “Tala, mu ke tinda Elie profete na ntwala ya nkwizulu ya kilumbu ya nene mpe ya boma ya MFUMU: Mpe yandi ke vutula ntima ya batata na bana, mpe ntima ya bana na batata ya bawu, ti mu ke kwisa mpe ke bula ntoto na nsingulu.” (Mal 4:5-6)
Kilumbu ya nene mpe ya boma ya Mfumu me kwisa ntete ve, na yina beto fwana kieleka kuvingila profete Elie. Na kati ya Biblia, baprofete kwisaka ve na ntwala ya bantu nionso ya ba-organisation ya misambidi. Bawu kwisaka na mwa bantu fioti kaka. Beno banza kana profete ya Malachie 4 kwisaka, mpe ba kondwaka yandi. Yinki kana yandi kele mutindu baprofete ya ntama, mpe kaka mwa bantu fioti ke zaba yandi? Kana profete yayi ke vutuka na kilumbu ya nsuka, wapi mutindu beto ke zaba yandi? Mvutu me monisama pwelele na kati ya Masonuku. Yandi ke vwanda na nkadulu ya profete. Yandi ke zaba binsweki ya ntima. Yandi ke sala bimangu. Ba-organisation ya misambidi ke meka na kuvweza yandi. Kasi ya ke vwanda na mwa ndambu yina ba soolaka yina ke zaba yandi mutindu munati-nsangu yina ba silaka samu na kilumbu.
Wapi mutindu beto ke zaba ntangu Elie ke vutuka? Yinki bankadulu yandi ke talisa ti beto lendaka zaba yandi?
Elie vwandaka bakala ya ntoto ya kuyuma. Bidimbu ya nene mpe ya ngitukulu vwandaka landa ministele ya yandi. Yandi longaka na kuteleminaka bampeve ya yimbi ya kilumbu ya yandi. Yandi longaka mingi-mingi samu na kutelemina kukondwa bumuntu ya Ntinu Jézabel. Ntangu Elie zangukaka na Mazulu na kati ya pusu ya tiya, mpeve ya yandi kulumukaka na zulu ya Elisée. Bidimbu ya nene mpe ya ngitukulu talisamaka mpe na ministele ya Elisée, mpe yandi longaka diaka na kuteleminaka masumu ya yinza. Baprofete nionso zole teleminaka ba-organisation ya misambidi ya kilumbu yina. Bankama ya bamvula na manima, mpeve ya mutindu mosi vutukaka na zulu ya ntoto na kati ya Jean Baptiste. Profete Malachie zabisaka na ntwala ti Elie ke vutuka samu na kutalisa Mfumu: “Tala, mu ke tinda munati-nsangu ya munu, mpe yandi ke yidika nzila na ntwala ya munu…” (Malachie 3:1). Jean Baptiste vwandaka ya kwikama ntangu yandi bokilaka kubalula ntima na kati-kati ya bana ya Nzambi. Mutindu Elie, yandi longaka na kuteleminaka ntinu mpe ba-organisation ya misambidi ya kilumbu yina. Mfumu Yesu siamisaka ti Jean Baptiste vwandaka profete ya Malachie 3 na kati ya Buku ya Matthieu (11:10): “Samu ti yayi kele yandi, samu na yina ba sonikaka, Tala, mu ke tinda munati-nsangu ya munu na ntwala ya kizizi ya nge, yina ke yidika nzila ya nge na ntwala ya nge.” Luc 1:17 me tuba ti mpeve ya Elie (Elie) zolaka vwandaka na kati ya Jean Baptiste, “Mpe yandi ke kwenda na ntwala ya yandi na kati ya mpeve mpe ngolo ya Elie, samu na kuvutula bantima ya batata na bana.” Kasi beno tala ti kitini ya zole ya Malachie 4 me lungisama ntete ve: “…mpe ntima ya bana na batata ya bawu, ti mu ke kwisa mpe ke bula ntoto na nsingulu.” Kitini yayi ya Masonuku ke salama na ntwala ya Nkwizulu ya Zole ya Klisto.
Bamvula mafunda zole na manima ya Jean Baptiste, ya kele diaka ntangu samu na mpeve ya Elie kuvutuka na zulu ya ntoto.
Kilumbu yina me kwisa! Na kati ya nsungi yayi, beto me mona mpeve ya Elie kuvutuka. Yandi tulaka ntembe na sysiteme ya denomination ya kilumbu yina. Yandi teleminaka masumu ya yinza. Yandi talisaka bidimbu yina ba lendaka ve kutanga mpe mambu ya ngitukulu. Yandi longaka Biblia mpova na mpova kubanda na Genese tii na Apocalypse. Profete ya Malachie 4 kwisaka mutindu ba silaka, mpe yandi longaka Nsangu katuka na Kiti ya kimfumu ya Nzambi ya Ngolo nionso. Nkumbu ya profete yayi kele William Marrion Branham. Beto ke bokilaka yandi “Mpangi Branham.”
“William Branham, yina mu zolaka mpe kwikilaka ti yandi vwandaka profete ya Nzambi.”
Oral Roberts, evangeliste yina me zabana na yinza mpe mubandisi ya Oral Roberts University.
“William Branham kwisaka na beto mutindu profete ya Nzambi mpe talisaka beto na nsungi ya makumi zole kieleka mambu ya mutindu mosi yina ba talisaka beto na kati ya bansangu ya mbote…. Nzambi me kwisa kutala bantu ya Yandi, samu profete ya nene me telema na kati-kati ya beto.”
Dr. T.L. Osborn, evangeliste ya Pentecotiste mpe nsoniki ya kulunga.
“Na ntwala ya kusambila samu na muntu mosi, yandi vwandaka pesa mambu ya kieleka mosi na mosi samu na madia ya muntu, mpe diaka samu mambu mosi na mosi ya baluzingu ya bawu-bambanza ya bawu, yina bawu ke salaka, bisalu ya bawu-mpe ke vutuka tii na bumwana ya bawu. Branham me salaka kifu ata mbala mosi ve na ndinga ya luzabu na kati ya bamvula nionso mu vwandaka na yandi. Yina ke fika, samu na munu, mafunda ya bambandu.”
Ern Baxter, evangeliste, muyidiki ya ba-campagne ya Branham samu na bamvula sambwadi, mpe mosi ya bantwadisi ya British New Church Movement.
Ve kubanda Mfumu Yesu Klisto tambulaka na zulu ya ntoto ti muntu me tulaka yinza na nzila ya nene ya mutindu yayi. Kubanda na mwa mbandukulu ya fioti na kati ya yinza ya kivinga mosi na kati ya myongo ya Kentucky, na Amarillo, Texas kisika Mfumu nataka yandi na Yinzo, luzingu ya yandi vwandaka ntangu nionso me talisama na mambu ya kimpeve. Na lutwadusu ya Wanzio ya Mfumu na 1946, ministele ya Mpangi Branham talisaka munzenzi yina bandisaka ntangu ya ba-reveil ya bakubeluka ya nene yina panzanaka na Amerika mpe na yinza ya muvimba. Samu na bubu yayi, yandi me zabana na bantu ya masolo ya Buklisto mutindu “tata” mpe “ntwadisi” ya reveil ya kubeluka ya nzutu na bamvula 1950 yina sobaka Dibuundu ya ba-Pentecotiste mpe na mbala mosi pesaka ntomoso na mouvement Charismatique, yina bubu yayi ke na kubendaka mingi denomination ya ba-Protestant. Mpamba ve, ya kwikama, ba-denomination vwezaka malongi ya yandi mpe mangaka lutumu ya yandi.
Bisika nionso yandi vwandaka kwenda, Nzambi siamisaka ti Mpangi Branham kele profete samu na nsungi yayi. Mutindu Job, Mfumu tubaka na yandi na kati ya kitembo. Mutindu Moise, Dikunzi ya tiya monikaka ke twadisa yandi. Mutindu Michée, kimvuka ya dibuundu vwezaka yandi. Mutindu Elie, yandi vwandaka bakala ya ntoto ya kuyuma. Mutindu Jérémie, ba tumaka yandi na Wanzio. Mutindu Daniel, yandi monaka ba-vision ya bilumbu ke kwisa na ntwala. Mutindu Mfumu Yesu, yandi zabaka binsweki ya ntima. Mpe mutindu Paul, yandi belusaka bambevo.
Mfumu me kwisa tala diaka bantu ya Yandi na nzila ya profete. Na kati ya ntangu ya kulutila mudidi na kati ya masolo, kisika bumuntu me dinda na kati ya mudindu ata fioti ve ba me monaka yawu na ntwala mpe minduki yina ke bebisaka bantu mingi ke na kutambula na mipepe, bakala mosi ya kukikulumusa yina ba me tinda na mvwandulu ya Nzambi samu na kubokila dikanda ya bantu yina ke na kufwa na kubalula ntima.
Kilandi ya luzolo Jean sonikaka samu na Mfumu Yesu:
Mpe ya kele diaka na bima mingi yankaka yina Yesu salaka, na yina, kana bawu zolaka sonika nionso, mu banza ti yinza yawu mosi lendaka vwanda ve na babuku yina ba zolaka sonika. Amen. (Jean 21:25).
Diambu ya mutindu mosi lendaka tubama samu na luzingu ya Mpangi Branham. Ya kele kulutila malongi 1.200 yina ba kangaka na ba-bande na mafunda ya masolo samu na luzingu ya bakala yayi ya kikesa. Kasi beto ke kuwaka ntangu nionso bimbangi ya malu-malu ya kubendama ya yandi na zulu ya baluzingu ya mafuku ya bantu. Mwa buku yayi lendaka ata fioti ve kusimba nsongi ya kisalu ya muntu yayi ya Nzambi kuzwaka na yinza.