“Ntangu mu butukaka na yinzo ya fioti ya Kentucky na zulu kuna, Wanzio ya Mfumu kwisaka na nela mpe telemaka kuna. Ya vwandaka Dikunzi ya Tiya.”
Nsemo ya suka bandaka na kukota na kati ya mudidi ya matuti ya madidi ya Ngonda ya yiya. Nela mosi kaka, ya dibaya vwandaka zibuka samu na kukotisa nsemo ya suka na kati ya mwa yinzo ya fioti ya kivinga mosi. Rouge-gorge mosi telemaka na lweka ya nela ya monanaka ti ya vwandaka ya kuzatuka na suka yina mpe vwandaka yimbila na nsongi ya mazafu ya yandi. Na kati ya mwa yinzo ya yandi, Charles Branham mosi ya ntwenya tulaka maboko ya yandi na kati ya salopette ya yandi ya malu-malu mpe talaka kento ya yandi ya bamvula 15. “Beto ke bokila nkumbu ya yandi William,” tubaka tata.
Na kati ya nela kwisaka Nsemo ya kimpeve. Nsemo tambulaka na kati ya kivinga mpe kwisaka telama na zulu ya mbeto kisika bebe yango butukaka. Yayi vwandaka Nsemo mosi yina basisaka bana ya ba-Hebreux na ngaanda ya Egypte. Ya vwandaka Nsemo mosi yina kutanaka na Paul na nzila ya yandi ya Damas. Mpe Yawu ke landila samu na kutwadisa mwa bebe yayi samu na kubokila Kento ya makwela ya Klisto na ngaanda ya yinza. Nsemo yina vwandaka kima yankaka ve kasi Wanzio ya Mfumu, Dikunzi ya Tiya; mpe Yawu monikaka mbala mosi diaka na bantu.
Mpe kuna na kati, na kati ya mwa yinzo yayi ya mabaya, na suka yina na kilumbu ya 6 ya Ngonda ya yiya, sage-femme zibulaka nela ti nsemo lendaka sema na kati samu kubika Mama mpe Papa kumona wapi mutindu mu vwandaka. Na yina Nsemo mosi pene ya yinda ya kuse kwisaka na kubalukaka na kati ya nela. Yawu zungaka kisika mu vwandaka, mpe ya kwendaka kuna na zulu ya mbeto. Mingi ya bantu ya myongo vwandaka ya kutelama kuna, Bawu vwandaka kuboka.
Mwa yinzo ya fioti vwandaka na kati ya myongo ya Kentucky ya sude, pene ya mwa mbanza ya Burkesville. Kilumbu yango vwandaka na kilumbu ya 6 ya Ngonda ya yiya, 1909. Bebe yango vwandaka ya ntete na kati ya bana kumi yina butukaka na Charles mpe Ella Branham.
Ya vwandaka ntama mingi ve na ntwala Wanzio ya Mfumu kwisaka kutala William Branham diaka.
Ntangu yandi vwandaka mwana, Wanzio tubaka na yandi, na kutubaka ti yandi ke zinga luzingu ya yandi pene ya mbanza yina ba ke bokilaka New Albany. Yandi kotaka na yinzo mpe tubaka na mama ya yandi yina salamaka. Mutindu mama nionso, yandi banzaka mingi ve samu na disolo mpe tulaka yandi na mbeto samu na kulembika mwa misisa ya yandi ya ntwenya. Bamvula zole na manima, dibuta ya yandi kwendaka na Jeffersonville, Indiana, kaka na mwa kilometele fioti na mbanza ya Indiana na sude ya New Albany.
Wanzio tubaka diaka na profete ya ntwenya mwa bamvula fioti na manima. Ya vwandaka na kilumbu ya Ngonda ya yivwa na mwini ya tiya yina vwandaka sema na kati ya matiti ya ntinta ya automne. Mwana-bakala vwandaka tenguna ntangu yandi vwandaka nata bakantini zole ya masa na mwa nzila ya fioti. Mususu ya disangu vwandaka ya kukanga na musapi ya yandi ya dikulu ya kulwala samu na kukeba yawu na mvindu. Yandi vwandaka samu na kupema na kivudi ya peuplier mosi ya nene. Masa ya meso vwandaka kulumuka na meso ya yandi mutindu yandi vwandaka dila samu na mpasi ya yandi: bankundi ya yandi vwandaka sepela bawu mosi kuna na kati ya dibulu mosi ya mumesanu ya kuloba-mbisi, mpe yandi vwandaka ya kukangama samu na kunata masa samu na tata ya yandi. Na mbala mosi, mupepe bandaka na kubaluka na kati ya yinti na zulu ya yandi. Yandi kusunaka masa ya meso ya yandi mpe yandi telemaka. Yandi waka muningu ya matiti ke bula na kati ya mupepe…kasi ya vwandaka ve na mupepe. Yandi talaka na zulu, mpe pene ya kati-kati ya yinti ya peuplier, kima mosi vwandaka balula matiti ya kuyuma mutindu kitembo.
Na mbala mosi Ndinga mosi tubaka, “Kunwa malafu ve to kunwa makaya ve to kutula ve mvindu na nzutu ya nge ata fioti ve, ya ke vwanda na kisalu nge ke sala ntangu nge ke kuma mbuta.” Mwana-bakala ya bamvula sambwadi yambulaka bakantini ya yandi mpe kimaka mbangu na mama ya yandi.
Mutindu profete Samuel, Nzambi me tuba diaka na mwana mosi.
Mwa basabala fioti na manima, yandi vwandaka sala nsaka ya ba-billes na leke ya yandi ya bakala. Nsatu mosi ya ngitukulu kwisaka na zulu ya yandi. Yandi talaka kuna na zulu ya Nzadi Ohio mpe monaka kyamvu mosi ya kitoko. Babakala kumi na sambanu kubwaka mpe kufwaka na yina kyamvu vwandaka zabuka nzadi. Profete ya ntwenya monaka vision ya yandi ya ntete. Yandi tubaka na mama ya yandi, mpe yandi sonikaka disolo ya yandi. Bamvula na manima, babakala 16 kubwaka mpe kufwaka na yina ba vwandaka tunga kyamvu ya Bala-bala ya Zole na Louisville, ba Vwandaka tunga na Kentucky kuna na zulu ya Nzadi Ohio.
Mfumu vwandaka talisa na yandi ba-visions ya bilumbu ke kwisa na ntwala. Mpe mutindu baprofete na ntwala ya yandi, ba-vision kondwaka ata fioti ve.