Mapisarema 96:13
Pamberi paJEHOVHA: nokuti anouya, nokuti anouya kuzotonga pasi: achatonga nyika zvakarurama, nendudzi nokutendeka kwake.
Pane zviuru zvemasangano akasiyana munyika nhasi. Chinamato chega-chega chinopomera chimwe, asi vachivimbisa ruponeso kubudikidza nemusangano ravo. Tingaziva sei ratingasarudza?
Kana tikasarudza chechi yeKatorike, zvino tinogamuchira kurevererwa nevasande, zvisina kumbosiyana nekunamata zvifananidzo. Bhaibheri rinoti, “Nekuti kunongova naMwari mumwe chete, nemurevereri mumwe chetewo pakati pavanhu naMwari, ndiye munhu Kristu Jesu;” (I Tim 2:5). Muprisita anodanwa kunzi “Baba” zvinova zvakarambidzwa naJesu muna Mateo 23:9: “Musadaidza munhu ari panyika kuti baba venyu: nekuti mumwe chete ndiBaba venyu, ivo vari kudenga.” VeAssemblies of God vanotiudza kuti kutaura nendimi ndicho chiratidzo chekutanga cheMweya Mutsvene, iye Pauro akati, “Kunyange ndikataura nendimi dzevanhu nedzevatumwa, ndisina rudo, ndava sendarira dzinorira, kana nedare rinongoti ngwere-ngwere.” (I VaKorinte 13:1)
Potse masangano ese anokurumidza kutiudza kuti zvinhu zvakawanda zviri muBhaibheri hazvina kuturikirwa kwazvo, zvakarasika mududziro, kana kuti hazvisi maererano nenyika yanhasi. Saka, tinofanira here kutenda Bhaibheri kana dzidziso dzemasangano? Mwari achashandisei sechiero chekutonga?
Dai ndaibvunza weChikatorike pano manheru ano, “Chii chaunofunga kuti Mwari achatonga nyika nacho?” Mukatorike anoti, “NeChechi yeKatorike.” Zvakanaka, zvino ipi Chechi yeKatorike? Zvino vane yeRoma, Greek Orthodox, nemamwe akawanda. Ingava Chechi ipi yeKatorike? VeRutherani vanoti, “Nesu,” zvino imi veBaptisti muri kunze. Uye kana tikati, “NeveBaptisti,” zvino imi vePentecosti mave kunze. Saka paizova nenyonganyonga yekuti, hapana aizoziva zvekuita; saka iYe haana kuvimbisa kutonga nyika nekereke.
Akavimbisa kutonga nyika naKristu, uye Kristu iShoko. Zvino Bhaibheri ndiro richatonga nyika, rinova Jesu Kristu mumwe chete zuro, nhasi, nekusingaperi.
Tsigiro
Johane 1:1
Pakutanga Shoko rakanga riripo, Shoko rakanga riri kuna Mwari, Shoko rakanga riri Mwari.
Johane 1:14
Shoko rakazova nyama, rikagara pakati pedu (tikaona kubwinya kwake, kubwinya sekwewakaberekwa mumwe chete waBaba,) azere nyasha nezvokwadi.
Johane 5:22
Nokuti Baba havatongi munhu, asi vakapa Mwanakomana kutonga kwese:
Johane 12:48
Unondiramba, asingagamuchiri mashoko angu, ane mumwe anomutonga: shoko randakareva, ndiro richamutonga nezuva rekupedzisira.
VaEfeso 1:5-7
Akatitemera kare kuti naJesu Kristu tiitwe vana vake, sezvaakafadzwa pakuda kwake,
Kuti kunaka kukuru kwenyasha dzake, dzaakangotipa hake mumudikanwa wake kurumbidzwe.
Uyo watine dzikinuro maari neropa rake, iko kukanganwirwa kwekudarika kwedu, nokuwanda kwenyasha dzake;
VaEfeso 2:5-8
Kunyange takanga takafa mukudarika kwedu, wakatiraramisa pamwe chete naKristu, (makaponeswa nenyasha;)
Akatimutsa pamwe chete naye, akatigarisa kudenga pamwe chete naye muna Kristu Jesu:
Kuti nenguva dzinouya aratidze pfuma huru-huru yenyasha dzake paunyoro hwake kwatiri muna Kristu Jesu.
Nokuti makaponeswa nenyasha kubudikidza nekutenda; izvo zvisingabvi kwamuri: asi chipo chaMwari:
I Johane 1:7
Asi kana tichifamba muchiedza, saiye ari pachiedza, tinoyanana isu, neropa raJesu Kristu Mwanakomana wake rinotinatsa pazvivi zvose.
Zvakazarurwa 22:18-19
Ndinopupurira mumwe nomumwe unonzwa mashoko okuporofita kwebhuku iyi, Kana munhu akawedzera pazvinhu izvi, Mwari achawedzera kwaari madambuziko akanyorwa mubhuku iyi:
Kana munhu akabvisa mashoko ebhuku yekuporofita uku, Mwari achabvisa mugove wake mubhuku reupenyu, nemuguta dzvene, napazvinhu zvakanyorwa mubhuku iyi.