“Loko ndzi tava ndzi tswariwile eka xikhukhwana xintsongo xa le Kentucky lahaya, Ntsumi ya Hosi yi tile efestereni yi fika yi yima kwalahaya. Akuri na Langavi ra Ndzilo.”
Ntsena vurhonga a byi sungula ku tlhava munyama wa xibakabaka xa ku hola ka Dzivamisoko. Leri ri nga rin’we, festere ra pulangi a ri tshama ri pfulekile leswaku ri kota ku pfumelela ku vonakala ka na mixo ku nghena eka xikamarana xin’we xa mukhukhu. Xinyenyana xa rhobin a xi yimile etlhelo ka festere swi tikomba tani hiloko xi ri na nyanyuko wa xipexali mixo lowu nakona a xi ri karhi xi yimbelela hi ku tlakuka lokukulu ka mahawu ya xona. Endzeni ka mukhukhu, Charles Branham wa muntshwa u tlhandlekile mavoko ya yena eka phere leyintshwa ya tiovharholo kutani a languta ehansi eka nsati wa yena wa malembe ya 15 hi vukhale. “Hi ta n’wi thya vito ra William,” kuvula tatana.
Efestereni ku tile Layiti leyi yi ngariki ya ntumbuluko. Layiti yi nghena yi famba-famba ekamareni yi fika yi rhendzela mubedwa laha n’wana a ha ku tswariwa kona. Layiti leyi ya hari yona leyi yi nga humesa vana va Vaheveru loko va huma eEgipta. Ya hari Layiti ya liya yi nga hlangana na Paul a ri endleleni yo ya eDamaska. Nakona Yi taya emahlweni ni ku rhangela xihlangi lexi loko a ya vitana Mutekiwa wa Kreste loyi a humaka emisaveni. Layiti yaleyo a hi swin’wana handle ka Ntsumi ya Hosi, yi nga Langavi ra Ndzilo; nakona Yi tlhele yi humelela nakambe eka munhu.
Nakona kwalahaya endzeni, eka xikhukhwana lexi xa timhandi, hi mixo walowo wa Dzivamisoko hi ti 6, sungukati u pfurile festere leswaku ku vonakala ku nga ha nghena ku pfumelela Manana na Papa ku vona leswaku ndzi njhani. Hiloko Layiti ya kwalomu ka sayizi ya xikhegelo yi nghena yi ri karhi yi rhendzeleka hi festere. Yi fika yi rhendzela laha a ndzi ri kona, kutani yi xikela ehansi emubedweni. Vanhu vo hlaya lava a va tshama atintshaveni a va yimile kwalahaya. Va ri karhi va rila.
Ximutani xo titsongahata lexi a xi ri eswigangeni swa le dzongeni wa Kentucky, ekusuhi na xidorobani xa Burkesville. Siku a kuri Dzivamisoko 6, 1909. N’wana a ri matevula eka khume ra vona lava a va ha ta tswariwa hi Charles na Ella Branham.
A swi tekanga nkarhi loko Ntsumi ya Hosi yi ta endzela William Branham lontsongo nakambe.
Loko a hari n’wana, Ntsumi yi sungule yi vulavula na yena, yi vula leswaku u ta hanya vutomi bya yena ekusuhi na doroba leri ri vitaniwaka New Albany. U yile endlwini a ya byela manana wa yena hi leswi swa ha ku humelelaka. Tani hi manana un’wana na un’wana, a nga ehleketanga ngopfu hi xitorhi xa yena kutani u lo n’wi lata emubedweni a miyeta ku chava ka yena ka vuhlangi. Endzhaku ka malembe mambirhi, ndyangu wa ka vona wu rhurhele eJeffersonville, Indiana, ntsena timayili tingari tingani kusuka exidorobanini xa le dzongeni xa Indiana xa le New Albany.
Nakambe Ntsumi yi tlhele yi vulavula na muprofeta lontsongo endzhaku ka malembe mantsongo. A ri ri siku leri nga miyela ra Ndzhati na ku kufumela ka masana lawa ya tlhaveke eka matluka yo pfumala muhlovo ya ximun’wana. Ndzumulo a yi ri karhi yi khwita-khwita tani hiloko a ha rhwarile mabakiti mambirhi ya mati exindledyanini. Tluka ra xifaki a ri bohiwile ehansi ka xikunwana lexi xi nga vaviseka leswaku xi nga ngheneli hi thyaka. U tshamile a ti wisela ehansi ka nsinya wo leha lowu tivekaka. Mihloti yi ri karhi yi xiririka kusuka emahlweni ya yena tani hilaha yena a nga vangiki na nkateko: Vanghana va yena a va ri eku tiphineni hi ku phasa tinhlampfi exidanwanini xa kwalaho, kutani yena a ha khomeletiwile hi ku rhwalela mati ya tatana wa yena. Hi xitshuketa, hiloko moya wu sungula ku hunga ensinyeni lowu a ri hansi ka wona. U surile mihloti a tlakuka a yima hi milenge. A twa mpfumawulo wa matluka wuri karhi wu hunga emoyeni…kambe kuri hava moya. U langutile ehenhla, nakona kwalomu ka hafu kuya ehenhla eka nsinya lowu wo tiveka swinene, swin’wana a swi ri karhi swi dzudza matluka lawa ya nga oma.
Xikan’we-kan’we hiloko Rito ri vulavula ri ku, “U nga tshuki u nwa kumbe u zaha kumbe u thyakisa mirhi wa wena hi ndlela yin’wana na yin’wana, hikuva ku na ntirho wa wena lowu u nga ta wu endla loko u tava u kurile.” Jaha leri nga khoma hi gwitsi ra nkombo wa malembe hi vukhale u cukumetile mabakiti ya yena a tsutsumela eka mana wa kwe.
Kukotisa muprofeta Samuel, Xikwembu nakambe xi vulavurile na n’wana.
Endzhaku ka malembe mantsongo, a ri karhi a tlanga timavula na vamakwavo va yena lava n’wi tlhandlamaka. Ku chava loku ku chavisaka ku ta eka yena. U langutile eNambyeni wa Ohio hiloko a vona biloho ro saseka. Vavanuna va khume ntsevu va wa va fa tani hiloko biloho ra ha tsemekanya nambu. Muprofeta lontsongo u vonile xivono xa yena xo sungula. U byerile manana wa yena, hiloko a xi tsala ehansi xitorhi xa yena. Endzhaku ka malembe yo hlaya, 16 wa vavanuna va wile va fa tani hiloko biloho ra Second Street ri wa a Louisville, Kentucky a ri akiwile ehenhla ka Nambu wa Ohio.
Hosi a yi ri karhi yi n’wi kombisa swivono leswi swa ha taka. Nakona kukotisa vaprofeta loko yena a nga se va kona, swivono a swi tsandzeki.