Amashiwi yene aya kulekelesha ayalembwa mu Cipangano Cakale yapela ubu bulayo: “Moneni, Nkatuma kuli imwe Eliya kasesema ku kutangililo kwisa kwa bushiku bwakwa SHIKULU: Ubukulu kabili ubwa kutiinya, na o akabweseshe mitima ya bashibo pa bana, ne mitima ya bana pali bashibo, epali Naisaume calo ku citipu.” (Mal 4:5-6)
Ubushiku ubukulu kabili ubwakutinya ubwakwa Shikulu bucili buleisa, eico ifwe tufwile mucishinka ukufwaya kasesema Eliya. Muli Baibele, bakasesema tabaleisa kwi bumba likalamba ilya tubungwe twa bukapepa. Baleisa ku basalwa abanono. Elenganyeni ngacakuti kasesema wa Malaki 4 aishile, kabili bali mupushile. Nga ngacakuti wene ali nga bakasesema bakale, kabili bantu ba palupifye bamwishiba? Ngacakuti uyu kasesema afwile ukubwela mu bushiku bwa kulekelesha, tuka mwishiba shani? Ubwasuko bulifye pa mbilibili mu Malembo. Wene akaba ne mibele yakwa kasesema. Wene akeshiba inkama sha mu mutima. Akacite fisungusho. Utubungwe twa bukapepa tukesha uku musausha. Lelo kukaba abasalwa abanono abakamwishiba nge nkombe yalailwe iya ubo bushiku.
Tukeshiba shani lintu Eliya akesa? Mibele nshi wene akalanga pakuti tukamwishibe?
Eliya ali mwaume wa mumpanga. Ifishibilo fikalamba ne fisungusho fyakonkele ubupyungishi bwakwe. Wene ashimikile ukususha ububifi bwa bushiku bwakwe. Wene sana sana ashimikile ukusuusha ubuwelewele bwakwa Namfumu Yesebeli. Lintu Eliya asendelwe ku Muulu mwi celeta lya mulilo, umupashi wakwe wawilile pali Elisha. Ifishibilo ifikalamba ne fisungusho lyene fyakonkele ubupyungishi bwakwa Elisha, kabili na o ashimikile ukusuusha imembu she sonde. Bonse babili bakasesema baiminine beka ukupinkana no tubungwe twa bukapepa bwa bulya bushiku. Imyaka imyanda ne myanda panuma, umupashi umo wine wabwelele pe sonde muli Yohane Kabatisha. Kasesema Malaki aseseme ukuti Eliya ali no kubwela ku kwishibisha Shikulu: “Moneni, Nkatume nkombe yandi, ku kukungule nshila ku ntanshi yandi…” (Malaki 3:1). Yohane Kabatisha ali cine uwayana kufyo wene alebilisha ku kulapila pakati ka bana bakwa Lesa. Cimo nga Eliya, wene ashimikile ukusuusha imfumu no tubungwe twa mipepele ya nomba. Shikulu Yesu ashininkishe ukuti Yohane Kabatisha e kasesema wa Malaki 3 mwi Buku lya Mateo (11:10): “Pakuti uyu eo, uwalembelwe, Mona, Ndekutangishishe nkombe yandi, intu ikakuwamishe nshila kuntanshi yobe.” Luka 1:17 itila ukuti umupashi wakwa Eliya (Eliasi) wali nokuba muli Yohane Kabatisha, “Kabili wene akatangilila mu mupashi na maka ifya kwa Eliya, ku kupilibwile mitima yaba shibo ku bana.” Lelo moneni ukuti iciputulwa ca bubili ica kwa Malaki 4 cali tacilafikilishiwa: “…ne mitima ya bana pali bashibo, epali Naisaume calo ku citiipu.” Ico ciputulwa ca Malembo cili no kwisa citika intanshi ya Kwisa kwa Cibili ukwa kwa Kristu.
Imyaka amakana yabili panuma yakwa Yohane Kabatisha, cili nakabili ni nshita ya mupashi wakwa Eliya ukubwela pe sonde.
Ubo bushiku bwalifika! Muli ino nkulo, twalimona umupashi wakwa Eliya ukubwela. Wene atashiishe imibele ya filonganino fya nomba. Wene asuushishe ulubembu lwe sonde. Wene alangile imintapendwa ya fishibilo ne fisungusho. Ashimikile Baibele icebo pa cebo ukutula ku Ukutendeka ukufika ku Ukusokolola. Kasesema wa Malaki 4 aishile nga ifyo calailwe, kabili aletele Imbila ukufuma ku Cipuna ca bufumu ica kwa Lesa Impalume. Ishina lya kwa uyo kasesema ni William Marrion Branham. Ifwe tumwita “Munyina Branham.”
“William Branham, untu Natemenwe no kucetekela ukuba kasesema wakwa Lesa.”
Oral Roberts, kasabankanya waishibikwa nganshi mwi sonde kabili umwine wa Oral Roberts University.
“William Branham a twendele nga kasesema wakwa Lesa no kutulanga mu sencali yalenga twente bwino bwino fye ifintu fimo fine ifyalangilwe kuli ifwe mu Mbilansuma… Lesa alitandalila abantu Bakwe, pantu kasesema umukalamba naima pakati kesu.”
Dr. T.L. Osborn, kasabankanya wa Pentecosti kabili kalemba.
“Intanshi ya kupepela umulwele, wene alelondolola mukulungika fyonse pa bulwele bwa muntu, elyo kabili fyonse mu bumi bwabo - umusumba wabo, imilimo yabo, ificitwa - nangu fye kunuma mu bwaice bwabo. Branham tabalile nelyo limo ukupanga icilubo ku cebo ca kwishiba mu myaka yonse intu Nali pamo nankwe. Ico cilekuma, kuli ine, miku amakana na makana.”
Ern Baxter, kasabankanya, kangalila wa Branham Campaigns pa myaka cine lubali, kabili umo pa ntungulushi shantanshi isha British New Church Movement.
Takwatala akuba ukutula munshita Shikulu Yesu Kristu aendele pe sonde umuntu uku tensha isonde munshila iyashika. Ukutula ku ntendekelo yafye mu kayanda ka mbao aka muputule umo mu mpili sha Kentucky, ukufika ku Amarillo Texas uko Shikulu amusendele Ku mwakwe, ubumi bwakwe lyonse bwale konkwa nefyapulamo ifyalecitika. Ku kutungululwa na Malaika wakwa Shikulu mu 1946, ubupyungishi bwakwa Munyina Branham bwa ambwishe umulilo uwa tendeke inshita ya kupuputulwa kukalamba ukwa bundapishi ukwa cilingenye America no kushinguluka isonde. Ukufika na lelo, alisuminishiwa ku bena Kristu bakalemba we lyashi nga “shifwe” kabili “intungulushi” yakupuputulwa kwa bundapishi bwa muli ba 1950 ubwa alwile Ulukuta lwa Pentecosti kabili no kwimya ibumba lya Kalismatiki, ilyo lelo lile ongola pepi cila cilonganino caba Protestanti. Nalyo line, mu cine, ifilonganino fila susha ukufundisha kwakwe no kukana ukutumwa kwakwe.
Konse kuntu aleya, Lesa aleshininkisha ukuti Munyina Branham ni kasesema kuli ino nkulo. Nga Yobo, Shikulu asosele nankwe muli kankungwe. Nga Mose, Impinda ya Mulilo yali moneke ukula mutungulula. Nga Mikaya, alisulilwe kuli ba shimapepo. Nga Eliya, ali mwaume wa mu matololo. Nga Yeremia, alashikwe kuli Malaika. Nga Daniele, alemone fimonwa pa fya kuntanshi. Nga Shikulu Yesu, aleishiba inkama sha mu mutima. Kabili nga Paulo, aleundapa abalwele.
Shikulu nakabili alitandalila abantu Bakwe ukupitila muli kasesema. Mu nshita sha mfimfi nganshi mu lyashi lya kale, umo imibele yabwelela nganshi panshi icishatala acimonwa kabili ne fyanso fya bonaushi bukalamba fili pa nembe nembe ye sonde, umuntu uwaicefya atuminwe ukufuma ku cinso cakwa Lesa ku kwita umutundu wa muntu ku kulapila.
Uwatemwikwa umusambi Yohane alembele pa lwakwa Shikulu Yesu:
Lelo kuli nafimbi ifingi ifyo Yesu acitile, ifyo, afilembwa cimo cimo, Ndetila na pano isonde pene nga tapengaba na ncende ku mabuuku ayengalembwa. Ameni. (Yohane 21:25).
Cimo cine kuti ca soswa pa bumi bwakwa Munyina Branham. Kuli ukucila pali 1,200 imbila isha ambulwa pa tepu pamo na makana na makana ye lyashi palwa bumi bwa uyu mwaume impalume. Lelo tucili tule twalilila ukumfwa ubunte bupya ubwa wene ukukumya imyeo ya mintapendwa ya bantu. Aka katabo teti keshe nokwikata pa bwingi bwa maka yantu uyu mwaume wakwa Lesa akwete pe sonde.