M’bale Branham nyengo zinandi wakuliyowoya Laŵi la Moto ilo likakhozgera utumiki wakhe. Ili likaŵapo pa kubabika kwakhe, likawoneka na masauzandi mumphepete mwa Mronga Ohio, ndipo kukawoneka kuti likamurondezga iyo kulikose iyo wakaruta. Mukaŵa mu 1950 kuti Fumu yikapereka mwakuyana ku ŵakugomezga na ŵambura kugomezga chisimikizgo chakukwanira kuti Laŵi la Moto ili likaŵa na muprofeti.
Usiku ukazura na kukwesana pa Sam Houston Coliseum. M’bale Branham wakarongozganga chisisimuso cha machirisko icho chikafalikanga pa charu. Vitumbiko vya Fumu Yesu vikarokwanga waka ngati vura pa minda yauzimu ya tirigu. Kweni vimanyikwiro vikuru na vyakuziziswa ntha vikiza kwambura kususkika. Ngati nyengozose, murwani wakawuka ngati mususki. Nkhongono ziŵiri zikakumana mu Houston Texas, ndipo Mungelo wa Fumu Iyoyekha wakiza kuzakarwa nkhondo.
Masauzandi ŵakaŵa kuti ŵafika kale kuzakachitira ukaboni minthondwe yambura mapendeko iyo yikarondezga munthu uyu wa Chiuta. Mayiro ghakhe, gulu la ŵapharazgi kwenekula likalimbana na muprofeti pa kususkana za machirisko Ghauzimu, kweni kulimbana kukawira mubwezi wakale wakugomezgeka wa muprofeti, Mliska F.F. Bosworth. Ŵakukayika ŵanandi ŵakarongozgeka na mupharazgi wakwenekula wa Baptist na wankhayiko mukuru pa machirisko Ghauzimu. Mususko uwo ukaŵa pafupi kuchitika ukaphalirika ku bungwe lakulemba nkhani, leneilo mwaluŵiro likafumya mitu yankhani, “The Theological Fur Will Fly Pa 7 p.m. Muhanyauno Mu Sam Houston Coliseum.”
Wankhayiko wakachema nkhwantha pakujambura, Ted Kipperman wa Douglas Studios, kuti wazakalembe msuskano. Usiku ula, vithuzithuzi vikajambulika na M’bale Bosworth kuyimirira mwakujikhizga apo wankhayiko wakayimirira mu kayimiro kakofya; nyengo yimoza na njoŵe yakhe kujonkha ku maso kwa munthu mulara wakujikhiza.
Para msuskano ukati wayambika, Mliska Bosworth mwaluŵiro wakasimikizgira unenesko wa machirisko Ghauzimu na ukaboni wa m’Malemba ndipo pamanyuma, kuti ntha waleke kusida fumbo, wakafumba wose awo ŵakachizgika ku maurwari ghawo kuti ŵayimirire. Masauzandi ŵakayimirira pa marundi ghawo. Para iwo ŵara awo ŵakachizgika ŵakati ŵakhala pasi, iyo wakafumba usange wose awo ŵakachizgika mwa machirisko Ghauzimu kuti ŵakaŵa mamembara mu kuyima kuweme uko bungwe la munthu uyu likamanya kuyimira. Mamembara firi handiredi gha mpingo ŵakayimirira kuti mwakunyadira ŵawoneske lusungu ilo Fumu Yesu wakaŵarongora iwo.
Kususka pamanyuma kukiza kufuma kwa wankhayiko. “Lekani wamachirisko Ghauzimu uyo wafike kunthazi. Lekani iyo wachite.” M’bale Bosworth wakarongosora pakweru kuti Yesu pera ndiyo wakaŵa Muchiriski Wauzimu, kweni mukokomo kufuma ku wankhayiko ukarutirira. Paumaliro, M’bale Bosworth wakamuchemera M’bale Branham ku gome. Iyo wakazomera ntchemo mkatikati mu viwawa vyakuchemerera.
Muprofeti, wakuzuzgika na Mzimu Mutuŵa, wakapereka zgoro ili:
Ine ntha ningachizga waliyose. Ichi ine nkhuyowoya. Para ine nkhaŵa bonda kubabikira kumtunda mu Charu cha Kentucky, kwakulingana na amama ŵane ŵakutemweka, na icho chiri kukhozgeka mu umoyo wane wose, kukaŵa Kuŵara kukiza mu chipinda mu kufyenyekezgana pachoko mula, uko ichi chikaŵa, ntha mukakuruŵika mu ichi, ntha chikaŵa nanga ndi windo, iwo ŵakaŵa waka na kanthu kachoko kakale nga ndi windo mula, ngati kachijaro kachoko, ndipo iwo ŵakakajura aka pakunji fayivi koloko mlenji, ndipo Kuŵara uku kukazungulira mkati apo marazi ghakafumanga waka. Kufuma nyengo yira, Ili liri kuŵa na ine. Ndi Mungelo wa Chiuta. Iyo wakakumana nane mu umunthu virimika vichoko vyajumpha. Kwamba mu umoyo wane, Iyo wakandiphalira ine vinthu ivyo vikachitika, ndipo ine ndiri kuviyowoya ivi umo Iyo wakandiphalirira ine. Ndipo ine nkhwimikana na waliyose pa malo ghalighose, kuti warute ku msumba uko ine nkhalerekera, panji kunyakhe kulikose, kuti mazgu ghakayowoyeka mu Zina la Fumu, kweni icho chikachitika ndendende umo ichi chikayowoyera ichi chiŵirenge.
Para iyo wakati wayowoya mazgu ghara, Mzimu Mutuŵa ukafika pa gome, ndipo wakujambura wachimwemwe wakajambura chithuzithuzi. M’bale Branham wakafumapo pa gome na ghapusu, kweni mazgu ghauchimi: “Chiuta wachitirenge ukaboni. Ine ndiyowoyengeso chara.”
Munyakhe wa Mr. Kipperman mwaluŵiro wakaruta ku ntchito kukachapa vithuzithuzi vya nkhani za mlenji wakurondezgana. Iyo wakawona chinyakhe chachilendo apo iyo wakafumyanga chithuzithuzi chakudanga mu mankhwala ghakuchapira. Ichi, nga ndi vithuzithuzi vinyakhe vinkhonde vyakurondezgana, vikaŵavye kalikose. Iyo wakakora mtima wakhe ndipo wakawa kavunama para iyo wakafumya chithuzithuzi chaumaliro kufuma mu mankhwala ghakuchapira. Kula, pa chithuzithuzi chaumaliro chira, pakaŵa Laŵi la Moto lakuwoneka layimirira pachanya pa mutu wa muprofeti wa Chiuta, William Marrion Branham.
Ŵana ŵa Israyeli ŵakaliwona Laŵi la Moto likumurongozga Moses, ndipo ŵanthu ŵa nyengo yasono iyi ŵali kuliwona Laŵi la Moto lenelira likumurongozga muprofeti munyakhe.
Chithuzithuzi mwaluŵiro chikatumika kwa George J. Lacy, Nkhwantha Wakuyezga Vyakulembeka Vyakukayikiska wa U.S. F.B.I., uyo wakakhozgera chithuzithuzi ichi na lingaliro lakhe lapadera. Chikalata chakuzomerezgeka chakulembeka na Mr. Lacy chiri pa peji lakurondezgana.
Ichi chikaŵako kale pambere makompyuta panji makamera gha digital, ndipo ntha chikamanya kurongosoreka na nthowa zinyakhe zakumanyikwa ku sayansi, padera pakuti pakaŵa nadi Kuŵara pachanya pa mutu wa William Branham. Muhanyauno chithuzithuzi chenechira chingamanya kuwoneka mu United States Library Of Congress, mu likuru la charu, Washington DC.