Mazgu gheneghara ghaumaliro ghakulembeka mu Chipangano Chakale ghakupereka phangano ili: “Wonani, Ine ndimutumireninge imwe Elija muprofeti pambere lindize zuŵa likuru na lakofya la YEHOVA: Ndipo iyo wazamuzgora mtima wa ŵawiskewo ku ŵana, na mtima wa ŵana ku ŵawiskewo, mzire Ine ndize na kutimba charu na nthembo.” (Malaki 4:5-6)
Zuŵa likuru na lakofya la Fumu lichali kuti lifike, ntheura ise mwakufwirirapo tikwenera kuti tipenjenge muprofeti Elija. Mu Baibolo, ŵaprofeti ntha ŵakizira ku mabungwe ghakuru ghasopisopi. Iwo ŵakiza ku ŵachoko ŵakusoreka. Ghanaghanani usange muprofeti wa Malaki 4 wakiza, ndipo ŵakamuphonya iyo. Uli usange iyo wangaŵa nga ndi ŵaprofeti ŵakale, ndipo kagulu kachoko waka ka ŵanthu kamumanya iyo? Usange muprofeti uyu wizenge mu nyengo yaumaliro, kasi ise tizakumumanya uli iyo? Zgoro likuwoneka pakweru mu Malemba. Iyo wazamkuŵa na kaŵiro ka muprofeti. Iyo wazamumanya visisi vya mtima. Iyo wazamuchita minthondwe. Mabungwe ghasopisopi ghazamuyezga kumuyuyura iyo. Kweni ŵazamuŵako ŵachoko ŵakusoreka awo ŵazakumumanya iyo nga ndi thenga lakulayizgika mu nyengo iyi.
Kasi ise tizamumanya uli para Elija wafika? Kasi iyo wazamurongora nkharo uli mwakuti ise timumanye iyo?
Elija wakaŵa munthu wa m’mapopa. Vimanyikwiro vikuru na vyakuziziswa vikarondezga utumiki wakhe. Iyo wakapharazga kususka mauheni gha nyengo yakhe. Iyo chomenechomene wakapharazga kususka uzaghali wa Fumukazi Jezebel. Para Elija wakati watorekera Kuchanya mu gareta la moto, mzimu wakhe ukawa pa Elisha. Vimanyikwiro vikuru na vyakuziziswa vikarondezga utumiki wa Elisha, ndipo iyo nayo wakapharazga kususka zakwananga za charu. Ŵaprofeti wose ŵaŵiri ŵakayimirira paŵekha kususka mabungwe ghasopisopi gha nyengo yira. Virimika mahandiredi pamanyuma, mzimu weneula ukiza pa charu mwa Yohane Mubapatizi. Muprofeti Malaki wakaroskera kuti Elija wazamkwiza kuzakarongora Fumu: “Wonani, Ine ndimutumireninge imwe thenga, ndipo iyo wazamunozgera nthowa panthazi pane…” (Malaki 3:1). Yohane Mubapatizi wakaŵa muneneska ku kawonekero umo iyo wakapharazgira ching’anamuka pakati pa ŵana ŵa Chiuta. Nga ndi Elija, iyo wakapharazga kususka fumu na mabungwe ghasopisopi ghasono. Fumu Yesu wakakhozgera kuti Yohane Mubapatizi wakaŵa muprofeti wa Malaki 3 mu Buku la Mateyu (11:10): “Pakuti uyu ndi iyo, za mweneuyo kuli kulembeka, Wonani, Ine nkhutuma thenga lane panthazi zane, uyo wazamkunozga nthowa yane panthazi zane.” Luka 1:17 wakuyowoya kuti mzimu wa Elija (Elias) ukayenera kuŵa mwa Yohane Mubapatizi, “Ndipo iyo wazamuyenda panthazi pakhe mu mzimu na nkhongono za Elija, kuti wakang’anamure mitima ya ŵawiskewo ku ŵana.” Kweni wonani kuti chigaŵa chachiŵiri cha Malaki 4 chikaŵa chindakwaniriskike: “…na mtima wa ŵana ku ŵawiskewo, mzire Ine ndize na kutimba charu na nthembo.” Chigaŵa icho cha Lemba chizamkukwaniriskika pambere kundachitike Kwiza Kwachiŵiri kwa Khristu.
Virimika thu sauzandi Yohane Mubapatizi wakati waruta, ndi nyengo yakuti mzimu wa Elija kuti wizeso pa charu.
Zuŵa lira lafika! Mu muwiro uwu, ise tawuwona mzimu wa Elija wizaso. Iyo wakasuska dongosolo lasono la bungwe. Iyo wakasuska zakwananga za charu. Iyo wakarongora vimanyikwiro vyambura mapendeko na vyakuziziswa. Iyo wakapharazga Baibolo lizgu-pa-lizgu kufuma Genesis kufika Chivumbuzi. Muprofeti wa Malaki 4 wakiza umo kukalayizgikira, ndipo iyo wakiza na Uthenga kufuma ku Chizumbe cha Chiuta Mwenenkhongono. Zina la muprofeti uyo ndi William Marrion Branham. Ise tikumuchema iyo “M’bale Branham.”
“William Branham, mweneuyo ine nkhamutemwa na kugomezga kuŵa muprofeti wa Chiuta.”
Oral Roberts, muneni wakumanyikwa charu chose ndipo mwati wa Oral Roberts University.
“William Branham wakiza kwa ise nga ndi muprofeti wa Chiuta ndipo wakatirongora ise pakweru mu virimika twente handiredi vinthu vyenevira ivyo vikarongoreka kwa ise mu ma Ivangeli…Chiuta wali kuŵayendera ŵanthu Ŵakhe, pakuti muprofeti mukuru wali kuwoneka pakati pithu.”
Dr. T.L. Osborn, muneni wa Pentekoste na mwati mufiski.
“Pambere wandarombere munthu, iyo wakarongosoranga fundo zeneko kwakulingana na urwari wa munthu, kweniso fundo za maumoyo ghawo - tawuni ŵakababikirako, zintchito, milimo – nanga ndi kunyuma nkhanira mu wanichi wawo. Branham ntha wakanangiskapo kamoza na mazgu gha kumanya mu virimika vyose ine nkhaŵa na iyo. Icho chikuphalaso, mu kumanya kwane, masauzandi gha viyerezgero.”
Ern Baxter, muneni, manejara wa Maungano Ghavisokole gha Branham pa virimika seveni, ndipo yumoza wa ŵarongozgi ŵapakudanga ŵa British New Church Movement.
Ntha kufumira apo Fumu Yesu Khristu wakayenda pa charu chapasi munthu wali kugwedezga charu mu nthowa yikuru yantheura. Kufuma ku chiyambi chakuyuyuka kufuma mu kanyumba kamakuni kachipinda chimoza mu tumapiri twa Kentucky, kufika ku Amarillo, Texas, uko Fumu yikamutorera iyo Kukaya, umoyo wakhe rutaruta ukarondezgana na vyakuchitika vyauzimu. Pa kurongozgeka na Mungelo wa Fumu mu 1946, utumiki wa M’bale Branham ukapanga chikoka icho chikayambiska nyengo yikuru ya visisimuso vyamachirisko ivyo vikachitika America yose na charu zingirizge. Kufika ku zuŵa ili, iyo wakumanyikwa na ŵamidauko Ŵakhristu ngati “dada” na “murongozgi” wa chisisimuso cha machirisko cha m’ma 1950 icho chikasintha Mpingo wa Pentekoste ndipo mwakufikapo chikapereka kuyambika kwa kachitiro ka Charismatic, ako muhanyauno kakukhuchizga pafupifupi bungwe lirilose la Protestant. Ndipouli, unenesko mu kawonekero, mabungwe ghakupepura visambizgo vyakhe na kukana ntchito yakhe.
Kulikose iyo wakaruta, Chiuta wakasimikizgira kuti M’bale Branham ndi muprofeti ku muwiro uwu. Ngati Job, Yehova wakayowoya kwa iyo mu kavuluvulu. Ngati Moses, Laŵi la Moto likawoneka likumurongozga iyo. Ngati Mikaya, iyo wakayuyurika na ŵaliska. Ngati Elija, iyo wakaŵa munthu wa m’mapopa. Ngati Yeremiya, iyo wakatumika na Mungelo. Ngati Daniel, iyo wakawona mboniwoni za vyakunthazi. Ngati Fumu Yesu, iyo wakamanya visisi vya mtima. Ndipo ngati Paulos, iyo wakachizga ŵarwari.
Yehova waŵayenderaso ŵanthu Ŵakhe kwizira mwa muprofeti. Mu nyengo ya mdima ukuru chomene mu mudauko, apo uzaghali wafika pa kununkha chomene icho ntha chikawonekapo kale ndipo virwero vyakofya vikuwoneka pa charu, munthu wakujikhizga wakatumika kufuma panthazi pa Chiuta kuzakachemera mtundu wakufwa ku kurapa.
Musambiri wakutemweka Yohane wakalemba za Fumu Yesu:
Ndipo viriposo vinthu vinyakhe vinandi ivyo Yesu wakachita, vyeneivyo, usange ivi vingalembeka chimozachimoza, ine nkhusachizga kuti nanga ndi charu ichochene ntha chingakwaniska kusunga mabuku agho ghangalembeka. Amen. (Yohane 21:25).
Chantheuraso chingamanya kuyowoyeka na za umoyo wa M’bale Branham. Kuli maupharazgi ghakujamburika kujumpha 1,200 na masauzandi gha nkhani za umoyo wa munthu uyu wachikanga. Kweni ise tikurutirira kupulika maukaboni ghaphya gha chikoka chakhe pa maumoyo gha mamiliyoni gha ŵanthu. Kabuku aka ntha kangamanya kukonkhoska kukhuza kwa munthu uyu wa Chiuta wakaŵa nako pa charu.