Vyamchindindi Vyavumbukwa

Ku uyambiriro mu utumiki wa M’bale Branham kukamanyikwa pakweru kuti fundo za bungwe zikakhazikiskika kuti zikuzge mabungwe ghasopisopi, ndipo ntha Ivangeli leneko. M’bale Branham wakagomezga Mazgu gha Baibolo kuŵa Mazgu, ndipo ntha wakanyengereranga, nanga kuti ichi chikang’anamura kumusezga pa ŵanyakhe, ŵabwezi, panji banja.

Apo wakaŵa wachali membara wa Mpingo wa Missionary Baptist, iyo wakaphalirika kuti wakhozge ŵapharazgi ŵanakazi. Kweni, iyo wakaghamanya Malemba makora chomene. I Timote 2:12 wakuyowoya pakweru, “Kweni ine ntha nkhuzomerezga mwanakazi kuti wasambizge, nesi kuŵa na mazaza pa mwanarumi, kweni kuŵa mu chisisi,” ndipo I Ŵakorinte 14:34 wakuti, “Lekani ŵanakazi ŵinu ŵakhale chete mu mipingo: pakuti ntha kukuzomerezgeka kwa iwo kuti ŵayowoye…” Ichi ntha chikaŵa chinyakhe chakutinkha ŵanakazi, kweni Baibolo likayowoya waka unenesko pa chisambizgo. Para ntchichizgo yikati yaperekeka, iyo ntha wakanyengerera ntheura iyo wakafumamo mu mpingo.

Lira ntha likaŵa Lemba lenelira pera ilo likazerezgekanga na mabungwe. Fumu yikavumbura unenesko pa ubapatizo kwa M’bale Branham. Kasi Yesu wakarangurirachi, “Ntheura imwe rutani, ndipo mukasambizge mitundu yose, kuŵabapatizanga iwo mu zina la Dada, na la Mwana, na la Mzimu Mutuŵa,” kweni ubapatizo uliwose ukalembeka mu Baibolo ukaŵa mu Zina la Yesu? Mupostole Paulos wakarangura mu Milimo 2:38 kuti rapani ndipo mubapatizike mu Zina la Yesu Khristu. Malemba ghakukoleranako mu umoza wakufikapo, kweni ichi chikatorera muprofeti kuti wavumbure chisisi ichi: “Dada” ndi zina yayi, “Mwana” ndi zina yayi, ndipo “Mzimu Mutuŵa” ndi zina yayi. Nga ndiumo mwanarumi yumoza waliri dada wa ŵana ŵakhe, mwana mwanarumi wa ŵapapi ŵakhe, ndipo mukuru wa ŵanung’una ŵakhe, kweni zina lakhe ntha ndi “dada,” “mwana,” panji “mukuru.” Dada, Mwana, na Mzimu Mutuŵa ndi maudindo gha Zina la Yesu Khristu. Mateyu 28:19 na Milimo 2:38 ŵakiza mu mzere umoza wakunyoroka.

Nanga ndi kwananga kwapakudanga mu Munda wa Eden kukavumbukwa, ntha nga nkhurya chipaso, kweni chinthu chinyakhe chiheni chomene. Kasi kurya chibanthu cha chipaso nthena mwaluŵiro kukavumbura uli kwa Adam na Eva kuti iwo ŵakaŵa nkhuli? Ichi mwakuphweka ntha chikuwoneka chazeru. Kasi apulo liri na chakuchita uli na kuŵa nkhuli? Muprofeti wa Chiuta wakavumbura pakweru chisisi ichi.

Kasi ŵakaŵa ŵangelo mba ŵakuyowoyeka mu Chivumbuzi chipatulo 2 na 3? Mazina ghawo panji ghangapulikikwa mwakuyana.

Kasi mbanjani ŵakweri kavalo ŵamchindindi ŵa Chivumbuzi chipatulo 6? Iwo ŵali na chinthu chimoza pera chakuzirwa ŵakusanganapo.

Kasi United States wakuzunurika mu Buku la Chivumbuzi?

Kasi mbanjani 144,000 awo ŵakaponoskeka mu chipatulo 7?

Kasi ndinjani muzaghali mukuru mu chipatulo 17? Zina lakhe na visisi vyose ivi vikavumbukwa mu Uthenga wa muprofeti mukuru uyu wakutumika kufuma kwa Chiuta.

Ntha ndi minthondwe pera yambura mapendeko yikamurondezga munthu uyu, kweni vyamchindindi vyakubisika mu Baibolo mu miwiro navyoso vikavumbukwa mu utumiki wakhe. Chikamanyikwa pakweru kuti muprofeti uyu wakakwaniriska Malemba ghanyakhe ghanandi padera pa Malaki 4.

Chivumbuzi 10:7: Kweni mu mazuŵa gha lizgu la mungelo wa nambala seveni, para iyo wazamkuyamba kubangura, chamchindindi cha Chiuta chikwenera kufiskika, umo iyo wali kuyowoyera ku ŵateŵeti ŵakhe ŵaprofeti.

Lizgu likuchemerezga ku charu kuti fumaniko ku mabungwe ndipo muwerere ku Mazgu ghapakudanga gha Chiuta. Waliyose wa ise wali na mwaŵi weneula uwo Petros, Yakobe, na Yohane ŵakaŵa nawo. Ise tiri nawo mwaŵi wakuti tingaŵerengekera pamoza na ŵachoko ŵakusoreka ŵa Chiuta awo ntha ŵakamanya kugwadira ku mabungwe ghasopisopi gha nyengo iyi.

Lemba Lituŵa likuyowoya za maumoyo na milimo ya ŵanthu awo ŵakayenda na Chiuta ndipo ŵakaphakazgika chomene na Mzimu Wakhe kuti iwo ŵakayowoya NTHEURA YIKUTI FUMU, ndipo mazgu ghawo ghakakhozgereka na vimanyikwiro vyambura kutondeka na vyakuziziswa. Iwo ŵakaŵa ŵaprofeti ŵa Chiuta, na Lizgu la Chiuta ku muwiro wawo.

Kasi nyengo ndi zakupambana sono naumo izi zikaŵira para Yesu wakaŵa pano? Ŵakaŵa ŵarongozgi ŵasopisopi awo ŵakamupayika Iyo. Ŵasambiri ŵakaŵa kagulu kachoko pakati pa unyinji wa dongosolo la bungwe lisopisopi. Iwo ŵakasezgeka, kunyozeka, ndipo paumaliro ŵakakomeka chifukwa chakuyima kulimbana na dongosolo la bungwe likuru lisopisopi. Ise panji ntha tikomekenge chifukwa cha chigomezgo chithu muhanyauno, kweni nadi ise tikuzikizgika. Nga ndi ŵaFarisi na ŵaSaduki, iwo ntha ŵangakana minthondwe iyo yikarondezga utumiki wa M’bale Branham ntheura iwo ŵakuchita kuzikizga kunyakhe. Imwe panji mupulikenge kuti iyo wakaŵa muprofeti mutesi, murongozgi wa chipembezo, panji viheni chomene. Mu unenesko, iyo wakaŵa munthu wakujikhizga wa Chiuta uyo wakayima nganganga kwimikana na ulamuliri unonono uwo mabungwe na vipembezo uli nawo pa ŵanthu ŵa Chiuta. Iwo ŵakalimbana na Yesu mu nthowa yeneyira para Iyo wakayima kwimikana na visambizgo vyawo na miyambo.

Chiuta wakachindika kukhumba kwa M’bale Branham kugomezga Lizgu lirilose mu Baibolo, ndipo Iyo wakugwiriska ntchito utumiki wakhe kurongozgera mamiliyoni gha mauzima kwa Yesu Khristu. Muhanyauno, Lizgu la Mungelo wa nambala Seveni likubangura mwakukwezga umo Ili likachitira kale. Pafupifupi ŵanthu thu miliyoni charu chose ŵakugomezga Uthenga wa M’bale Branham. Ili panji lingaŵa gulu lichoko pa thu biliyoni awo ŵakuyowoya kuti Mbakhristu, kweni mphauli apo ŵanthu ŵa Chiuta ntha ŵakaŵa ŵachokovi?

Ise tiri na maupharazgi ghanandi kujumpha 1,200 ghakujamburika ghali na Lizgu ilo likachimika kuti lifikenge mu Chivumbuzi 10:7. Uliwose wa maupharazgi agha ukuvumbura vyamchindindi vinandi vya Chiuta. Lizgu lira liripo kwa imwe usange imwe mukukhumba kuti mulipulike Ili.

Ntha pa nyengo yimoza ine nkhupereka uthenga ku ŵanthu kuti iwo panji ŵangandirondezga ine, panji kujoyina mpingo wane, panji kuyamba wenenawene unyakhe na bungwe. Ine ntha ndiri kuchitapo icho ndipo ntha nichitenge icho sono. Ine ndilije khumbo mu vinthu ivyo, kweni ine ndiri na khumbo mu vinthu vya Chiuta na ŵanthu, ndipo usange ine ningafiska waka chinthu chimoza ine ndiŵenge wakukhutira. Chinthu chimoza icho ndi kuwona kukhazikiskika kwa ubale weneko wauzimu pakatikati pa Chiuta na ŵanthu, mwenemumo ŵanthu ŵakuzgoka vilengiwa viphya mwa Khristu, ŵakuzuzgika na Mzimu Wakhe na kukhala umoyo wakulingana na Mazgu Ghakhe. Ine nkhumuchemani, kumuŵeyani na kuchenjezga mose kuti mupulike lizgu Lakhe pa nyengo iyi, ndipo mupereke maumoyo ghinu kwathunthu kwa Iyo, nga ndiumo ine nkhugomezgera mu mtima wane kuti ine ndiri kupereka vyane vyose kwa Iyo. Chiuta wamutumbikani imwe, ndipo nkhuromba kwiza Kwakhe kukondwereske mtima winu.

Rev. William Marrion Branham