Mu Baibele, Lesa lyonse ale leta Imbila Yakwe ku bantu ba mwisonde ukupitila muli kasesema waku nkulo. Wene asosele kuli Mose ukupitila mu cimpusa cale aka umulilo no ku mupela umulimo wa ku tungulula aba Hebere ukufuma mu Egupti. Impinda ya Mulilo iyalemoneka ne fishibilo fimbi fyapelwe ku kushininkisha ubupyungishi bwakwe. Yohane Kabatisha aletele Imbila ukuteyanya isonde ku kwisa kwakwa Mesia. Pa nshita ya kubatisha Shikulu Yesu mu Mumana wa Yordani, Ishiwi ukufuma ku Muulu lya shininkishe umulimo wakwa Yohane uwa kulanga Umwana wa mpanga wakwa Lesa, “Uyu e Mwana maume wandi uwatemwikwa, muli wene emo Mbekelwa.” Imyaka panuma, i Shiwi lyakwa Shikulu lyalyumfwikwe na kabili ukulanda kuli kasesema lintu Wene asosele kuli Paulo ukupitila mu Lubuuto lukalamba, elyo panuma uku mupela umulimo wa kubika inkuta mu muyano. Monse mu Cipya na mu Cipingo Cakale, Lesa tabalile alanda ku bantu Bakwe ukupitila mu kabungwe kamipepele. Wene lyonse alanda ukupitila mu muntu umo: kasesema Wakwe. Kabili Ale shininkisha aba ba kasesema ukupitila mu fishibilo fyapulamo.

Nomba nga lelo? Bushe Lesa acili alasokolola i Cebo Cakwe kuli bakasesema? Bushe eko ficili ifishibilo fyapulamo? Bushe kuti Lesa atuma kasesema wamu bushiku bwa nomba mwisonde? Ubwasuko buli icinecine, “Ee!”

Nomba tukeshiba shani lintu kasesema aima? Bushe akamoneka shani? Bushe akalacita shani? Cishibilo nshi cintu wene akapela kuli ifwe? Malembo nshi yantu wene akafikilisha?

Bakasesema bakale bali ni mpalume shakwa Lesa, kabili tabali na mwenso wa kusuusha utubungwe twa mipepele. Nakuba, ilingi line balepontelwa kuli bashimapepo. Eliya apinkene no tubungwe twa bukapepa utwa nshita yakwe, ukubepusha ngacakuti Lesa kuti acindika ifya kuninika fyabo, nangu icakwe. Bene bapundile. Bene baseseme. Bene batolokele pa mulu wa cipailo. Bene baicenawile ne myele. Lelo Lesa tabomfwile. Eliya aloleshe ku Muulu no kutila, “Lekeni cishibikwe buno bushiku ukuti imwe muli Lesa mu Israeli, no kuti Ine nine mubomfi Wenu, kabili ukuti Ine nincita ifi fyonse ukulingana ne cebo cenu.” Lyene wene aitile umulilo ukufuma ku Muulu ku kwisa oca ica kuninika. Mikaya kasesema asuushishe Imfumu ya Israeli, na bushimapepo bonse, lintu wene akalipile Shimapepo Mukalamba Zedekia pa kusesema ubufi. Uyu Shimapepo Mukalamba amutobele ulupi kabili Imfumu ya mubikile mu cifungo pa kulanda icishinka. Nangu fye ni Shikulu Yesu alipatilwe nganshi ku tubungwe twa bukapepa utwa nshita Yakwe icakuti ba Mutanike pamo naba cila pa mbifi. Ngacakuti ilyashi lyakale lya cine, kasesema ali no kupatwa ku mibele ya filonganino fya nomba, no kumulenga ukuba uwa miponto, kasesema wa bufi, nangu ifya bipishapo. Lelo Lesa akeminina no mubomfi Wakwe.

Nga cakuti kwali kasesema muli buno bushiku bwa nomba, kuti ena apokelelwa shani ku Lukuta lwaba Katolika? U Lukuta lwaba Baptisti? U Lukuta lwaba Lutherani? Icili conse icilonganino?

Shikulu Yesu apele umulimo kuli bonse aba Mutetekela: “Nefi fishibilo fikakonka abo abatetekela; Mwi shina lyandi bakatamfishamo ifiwa; bakalandila mu ndimi shipya; Bakekate nsoka; kabili nga banwe cabwanga, tacakabacite akabi; bakabike ndupi shabo pa balwele, nabo bakaba abatuntulu.” (Marko 16:17-18). Bushe ili Lembo lya cishinka ilelo? Nga cakuti te cishinka, ni lilali lintu Ifyebo fyakwa Shikulu fyapwile? Monse mu Baibele, ba kasesema baleundapa abalwele, ukutamfya ifiwa, no kucita ifisungusho. Mose aimike insoka ya mukuba ku cinso ca Israeli ku kubondapa ku kusumwa kwa nsoka sha busungu (Impendwa 21:9). Naamani, uwampamfu umwina Siria, aishile kuli Elisha ku kundapwa ku fibashi (II Ishamfumu 5:9). Ilintu umulumendo aponene ukufuma pa ng’anda yapa mulu, umutumwa Paulo amufukatile no kubwesha umweo mu mubili wafwa (Imilimo Ya Batumwa 20:10). Ifwe twakwata fye ifyalembwa pali nalimo imyaka 3½ iya bumi bwakwa Shikulu Yesu, lelo muli iyo myaka i inono, Wene atwalilile ukundapa abalwele. Impofu shalelengwa ukumona. Abafibashi baleundapwa. Bacibuulu balepokelela ukumfwa. Ifilema fyale enda. Bonse ubulwele bwa musango shani bwale undapwa (Mateo 4:23).

Lesa kabili ashininkishe bakasesema bakwe munshila shimbi pamo no kundapa. Nangu fye ni nkama shafiswa isha pa mutima shalelengwa ukwishibikwa kuli aba baume bakwa Lesa. Imfumu Nebukadnesari akwete iciloto camucushishe, lelo wene taibukishe cali pacinshi. Kasesema Daniele aebele imfumu fyonse fibili iciloto no busesemo ubwakonkelepo (Dan 2:28). Tapali nelyo cimo icafishilwe kuli Solomoni ilyo Namfumu waku Sheba aishile ku cinso cakwe. Wene aisushiwemo no Mupashi icakuti aebele umwanakashi amepusho yonse ayali pa mutima wakwe talati ayepushe (I Ishamfumu 10:3). Elisha aebele Imfumu ya Israeli amapange yonse aya Mfumu yaku Siria, nangu fye niku mashiwi ya munkama ayasoselwe mu muputule wakwe uwa kusendamamo (II Ishamfumu 6:12).

Ukupitila mu milimo Yakwe yine, Shikulu Yesu ilingi alelanga ukuti uyu Mupashi wa kulingulula Mupashi wakwa Kristu. Wene alingulwile imibele yakwa Natanaele lintu Atile, “Moneni umwina Israele wa cine cine, muli wene tamwaba bucenjeshi!” Kabili Yesu atwaliliile ukweba Natanaele kuntu ali lintu Filipi alemweba pa lwakwa Mesia (Yohane 1:48). Lintu Natanaele amwene ukuti Yesu alishiibe ifya mu mutima wakwe, ilyo line a Mwishibe nga Kristu. Umuku wakubalilapo Yesu amwene Petro, Ali mwebele ishina lyakwa wishi, ilya Yona (Yohane 1:42). Petro lyene asuulile fyonse no ku konka Yesu ubumi bwakwe bonse. Yesu akumenye umwina Samaria umwanakashi pa cishima no kumweba imembu shakwe ishakale. Amashiwi ya mwanakashi aya kubalilapo yali, “Mukwai, Nimono kuti muli kasesema” (Yohane 4:19). Bonse aba bantu batatu bali aba bumi bwapusana, lelo balemwishiba Yesu ilyo line lintu Ale langa icabupe ca kulingulula.

Bushe ici icabupe califuminepo lintu ibula lya kulekelesha ilya Baibele lyalembelwe? Ngacakuti ifi fisungusho fyalembwa pa lwalala mu Baibele, fili kwi ilelo? Kasesema wa bushiku bwa nomba cine cine kuti ashininkishiwa ku fisungusho.

Bushe Lesa alilaba abantu Bakwe? Bushe Acili ale undapa abalwele? Bushe Acili alelanda kuli ifwe ukupitila muli bakasesema Bakwe? Bushe umo muli ba kasesesma alimwene libela buno bushiku?

Bushe kucili ubusesemo ubufwile ukufikilishiwa?