Genese 3:1

Ntangu yayi nyoka vwandaka ya kulutila mayele na kati ya baniama yina mfumu Nzambi salaka. Mpe yandi tubaka na kento, yinga, Nzambi tubaka, Beno ke kudia ve bayinti nionso ya disamba?

Genese 3:6-7

Mpe ntangu kento monaka ti yinti vwandaka mbote samu na kudia, mpe ti ya vwandaka kitoko na meso, mpe yinti zolaka pesa ndwenga, yandi bakaka mbuma na yawu, mpe kudiaka, mpe pesaka diaka na bakala ya yandi yina vwandaka na yandi; mpe yandi diaka.

Mpe meso ya bawu zibukaka, mpe bawu zabaka ti bawu vwandaka kinkonga; mpe bawu tungaka matiti ya fiki, mpe bawu salaka bitenda.

Genese 3:14-15

Mpe mfumu Nzambi tubaka na nyoka, Samu nge me sala yayi, nge me singama na kati ya bibulu nionso, mpe na kati ya bibulu nionso ya bilanga; nge ke tambula na zulu ya kivumu ya nge; mpe nge ke kudiaka fundu-fundu bilumbu nionso ya luzingu ya nge:

Mpe Mu ke tula kimbeni kati-kati ya nge mpe kento, mpe kati-kati ya nkuna ya nge mpe nkuna ya yandi; ya ke diata yintu ya nge, mpe nge ke tatika kinkoso ya yandi.

Yayi kele disumu ya ntete ba sonikaka na kati ya Biblia. Mosi yayi ya mayele ya yimbi ya baniama nionso, nyoka, “vunaka” Eve na kudia kitini ya mbuma yina ba pekisaka. Yandi diaka yawu mpe na manima yandi pesaka yawu na bakala ya yandi, yina salaka ti bawu bakula ti bawu vwandaka kinkonga.

Bakyuvu ya kieleka kele: Wapi mutindu nyoka lenda tuba? Yinki mbuma fwana sala samu na kuvwanda kinkonga? Mpe, wapi kisika nkuna ya nyoka ke fwanana na nionso yayi?

Biblia me tuba ti nyoka vwandaka ya kulutila “mayele” ya baniama nionso. Yandi vwandaka mutindu muntu, ti yandi lendaka tambula, tuba, mpe kuvwanda na masolo ya mayele. Na manima yandi vunaka kento ya Adam, Nzambi singaka yandi samu na kuvwanda nyoka, kasi ve na ntwala yimbi salamaka mpe ba kunaka nkuna.

Biblia me tuba na Genese 3:15 ti nyoka vwandaka na nkuna, mpe Nzambi tulaka kimbeni kati-kati ya bankuna zole. Ya kieleka, nkuna ya nyoka vukanaka na nkuna ya kimuntu ya Eve na ntwala ya nkabwani. Wapi mutindu yina nionso lendaka vwanda mbuma ya kudia mbuma mosi? Na yina, mwa banzila ya fioti na manima, “Adam bokilaka kento ya yandi na nkumbu ya Eve; samu yandi vwandaka mama ya bantu nionso kele moyo.” Beno simba ti ba me tuba ve ti Adam vwandaka tata ya bantu nionso yina kele moyo.

Ya kele na “bambuma” ya kuswaswana na kati ya Biblia. Ya kieleka, ya kele na mbuma yina beto lendaka simba, mutindu mbuma mosi, yina ke basikaka mpe ba ke diaka yawu mutindu madia. Ya kele diaka na mbuma yina ke talisaka bisalu ya beto, ata ti ya kele bisalu ya kimuntu mutindu bilanga mpe mumbongo, to bisalu ya kimpeve mutindu kusala bimangu mpe kulonga Nsangu ya mbote. Na manima, ya kele na mbuma ya kivumu, yina ke talisa kubaka kivumu mpe mbutukulu ya mwana.

Keti kudia mbuma yina beto lendaka simba pesaka na Adam mpe Eve lubakusu ti bawu vwandaka kinkonga? To, ya ke lombaka kuvukana ya banzutu kati-kati ya bakala mpe kento samu ti bawu bakula samu na yinki bawu fwana bumba mwa bitini ya banzutu ya bawu?

Yinki salamaka kieleka kilumbu yina na kati ya Disamba samu na kusala ti bantu nionso kubwa?

Mutindu Nkuna ya kento vwandaka na pwelele Nzambi ke na kutalisa Yandi mosi na kati ya nsuni ya muntu, mutindu mosi nkuna ya nyoka kele nzila ya pwelele yina Satana monaka ti yandi vwandaka na kiyeka ya kuzibula kielo na kati ya dikanda ya bantu. Ya vwandaka mpasi samu na Satana (samu yandi kele kaka mpeve ya kimuntu yina ba VANGAKA) samu na kukitalisa yandi mosi na mutindu yina Nzambi kukitalisaka Yandi mosi, na yina disolo ya Genese ke tuba wapi mutindu yandi talisaka nkuna ya yandi mpe kotaka to kukikotisaka yandi mosi na kati ya dikanda ya bantu. Diaka beno bambuka ti ba me bokila Satana “nyoka.” Ya kele nkuna ya yandi to ntunga ya yandi na kati ya dikanda ya bantu beto ke na kuzonzilaka.

Na ntwala Adam kuzwa ntete luzabu ya nsuni samu na Eve, nyoka zwaka luzabu yina na ntwala ya yandi. Mpe ti mosi butukaka na yawu yina vwandaka Cain. Cain vwandaka ya (butukaka ya, butukaka na) yina ya “Yimbi,” (I Jean 3:12.)

…Kieleka ya diambu yango kele ti Eve kuzwaka na kati ya kivumu ya yandi bana-bakala ZOLE (mapasa) ya bankuna ya KUSWASWANA. Yandi vwandaka nata mapasa, ya kivumu ya Cain na manima ya mwa ntangu fioti na yina ya Abel.

Masonuku

Genese 3:6-7

Mpe ntangu kento monaka ti yinti vwandaka mbote samu na kudia, mpe ti ya vwandaka kitoko na meso, mpe yinti zolaka pesa ndwenga, yandi bakaka mbuma na yawu, mpe kudiaka, mpe pesaka diaka na bakala ya yandi yina vwandaka na yandi; mpe yandi kudiaka.

Mpe meso ya bawu zibukaka, mpe bawu zabaka ti bawu vwandaka kinkonga; mpe bawu tungaka matiti ya fiki, mpe bawu salaka bitenda.

[Wapi mutindu bawu zolaka zaba ti bawu vwandaka kinkonga na kudiaka kitini ya mbuma?]

Genese 3:13-15

Mpe MFUMU Nzambi tubaka na kento, Samu na yinki nge me sala yayi? Mpe kento tubaka, Nyoka me vuna munu, mpe mu me kudia.

Mpe MFUMU Nzambi tubaka na nyoka, samu nge me sala yayi, nge me singama na kati ya bibulu nionso, mpe na kati ya bibulu nionso ya bilanga; nge ke tambula na zulu ya kivumu ya nge; mpe nge ke kudiaka fundu-fundu bilumbu nionso ya luzingu ya nge:

Mpe mu ke tula kimbeni kati-kati ya nge mpe kento, mpe kati-kati ya nkuna ya nge mpe nkuna ya yandi; ya ke diata yintu ya nge, mpe nge ke tatika kinkoso ya yandi.

[Nyoka vwandaka na nkuna. Ya kieleka, yayi ke talisa ve na nyoka yina ke tambulaka na kivumu.]

Genese 3:20

Mpe Adam bokilaka kento ya yandi na nkumbu ya Eve; samu yandi vwandaka mama ya bantu nionso kele moyo.

[Samu na yinki ba me bokila ve Adam tata ya bantu nionso kele moyo?]

Genese 4:1-2

Mpe Adam zabaka Eve kento ya yandi; mpe yandi kuzwaka kivumu, mpe butaka Cain, mpe tubaka, mu me kuzwa bakala mosi na MFUMU.

Mpe yandi butaka diaka mpangi ya yandi ya bakala Abel. Mpe Abel vwandaka mvungi ya mameme, kasi Cain vwandaka kisadi ya bilanga.

[Luzingu nionso ke katukaka na Nzambi, ya vwanda kivumu ya makwela to ya makangu. Satana lendaka ve kuvanga luzingu.]

Luc 3:38

Yina vwandaka mwana ya Enoch, yina vwandaka mwana ya Seth, yina vwandaka mwana ya Adam, yina vwandaka mwana ya Nzambi.

[Wapi mwana ya ntete Cain na kati ya Ndonga ya Adam?]

I Jean 3:12

Ve mutindu Cain, yina vwandaka ya muntu yina ya yimbi, mpe yandi kufwaka mpangi ya yandi. Mpe samu na yinki yandi kufwaka mpangi ya yandi? Samu ti bisalu ya yandi vwandaka ya yimbi, mpe bisalu ya mpangi ya yandi vwandaka ya mbote.

[Nzambi vangaka Adam na kifwani ya Yandi mosi. Wapi yimbi ya Cain katukaka, mpe wapi bumbote ya Abel katukaka? Bawu kuzwaka bisalu ya bawu na batata ya bawu.]

Jude 1:14

Mpe Enoch diaka, ya sambwadi kubanda Adam, pesaka profesi ya bima yayi, na kutubaka, Tala, Mfumu ke kwisa na mafunda kumi ya basantu ya yandi,

[Kisika mosi ve na kati ya Biblia Cain kele na Ndonga ya Adam.]