Kilumbu ke na kwisa ntangu beto nionso, mpe Baklisto to bantu yankaka, ke bakula kieleka yina kele na simu yina ya rido ya ntangu. Biblia silaka Luzingu ya Kukonda nsuka na bantu yankaka, mpe na bayankaka, ya silaka lufundusu. Muntu nionso na kati ya masolo me kukiyufulaka kieleka yandi mosi, “Yinki ke salama na munu ntangu mu ke kufwa?”

Ntama kuna na ntwala ya vwanda na Biblia mosi samu na kutanga, profete Job talaka yinza. Yandi tubaka samu na kivuvu ya yinti, wapi mutindu ba ke zengaka yawu mpe yawu ke kufwaka, kasi kuna na kati-kati ya masa, ya ke vutuka diaka na luzingu mpe ke basisa matiti ya mubisu. Job zabaka ti muntu, mutindu yinti, ke vumbuka diaka na luzingu:

Kana muntu mosi me kufwa, yandi ke zinga diaka? mu ke vingila na bilumbu nionso ba tulaka samu na munu. Tii kuna nsobolo ya munu ke kwisa.

Beno ke bokila, mpe mu ke pesa beno mvutu: beno ke kuzwa nsatu ya kisalu ya maboko ya beno.

Samu ti ntangu yayi nge ke tanga bitambi ya munu: nge ke tala ve na zulu ya disumu ya munu? (Job 14:14-16)

Job mu banza vwandaka ve na Biblia samu na kutanga, kasi yandi zabaka ti Nzambi kilumbu mosi ke vumbula yandi na ntoni ntangu Mukudi ya bantu kwisaka.

Oh na yina ba sonikaka bandinga ya munu! oh na yina ba basisaka yawu na buku!

Ti ba sonikaka yawu na kilapi ya kisengo mpe tulaka yawu na kati ya ditadi samu na mvula na mvula.

Samu mu zaba ti mukudi ya munu kele moyo, mpe ti yandi ke telema na kilumbu ya nsuka na zulu ya ntoto:

Mpe kana na manima misobi me bebisa nzutu yayi, kasi na kati ya nsuni ya munu mu ke mona Nzambi: (Job 19:23-26)

Profete vwandaka tubila Mfumu Yesu mpe mvumbukulu ya bantu ya Yandi. Na nzila ya luzayikisu Job zabaka ti kana banzutu ya beto me kubeba ya muvimba, Yesu ke vutula nsuni ya beto. Mpe na meso ya beto mosi, beto ke mona Nkwizulu ya Yandi. Bantu nionso ya Nzambi ke vibidila samu na kumona kilumbu yayi ya nkembo.

Mpamba ve, kaka kieleka mutindu Nzambi ke zingaka, ya kele dyaka na diabulu; mpe kaka kieleka mutindu Mazulu kele, ya kele dyaka na difelo. Banzikisa kele mingi ti beto lenda banza yawu. Ntumwa Paul tubaka ti, “Disu me monaka ve, to dikutu me kuwaka ve, to yina me kotaka ve na ntima ya muntu, bima yina Nzambi me yidika samu na bawu yina ke zolaka yandi.” (I Cor. 2:9)

Mabanza ya beto lendaka ve kubakula wapi mutindu nene Mazulu ke vwanda, mpe to yawu lendaka bakula ve boma ya difelo. Yesu tubaka na beto ti difelo kele yimbi mingi ti ya ke vwanda kulutila mbote kana beto me zenga kinama mosi ya nzutu ya beto kulutila mpasi ya kukwenda na kisika yina ya boma.

Mpe kana diboko ya nge ke nata nge na yimbi, zenga yawu: ya kele mbote mingi samu na nge na kukota na luzingu na diboko mosi, kulutila kuvwanda na maboko zole samu na kukwenda na difelo, na kati ya tiya yina ke kufwa ve: (Marc 9:43)

Na yina nani ke kwenda na Mazulu? Mpe nani ke kwenda na difelo ? Ya kele dibanza ya kyadi, kasi Yesu tubaka ti bantu nionso ke kuzwa ve musendo yina Yandi ke zola kupesa: Beno kota na mwelo ya fioti: samu mwelo kele ya nene, mpe bala-bala kele ya nene, yina ke twadisaka na kubeba, mpe ya ke vwanda na mingi yina ke kota kuna: Samu mwelo kele ya fioti, mpe nzila kele ya fioti, yina ke twadisaka na luzingu, mpe fioti ke vwanda yina ke mona yawu. (Matt 7:13-14)

Yesu tubaka diaka, “Muntu nionso ve yina ke tubaka na munu, Mfumu, Mfumu, ke kota na kimfumu ya mazulu; kasi yandi yina ke salaka luzolo ya Tata ya munu yina kele na mazulu. Mingi ke tuba na munu na kilumbu yina, Mfumu, Mfumu, beto pesaka ve profesi na nkumbu ya nge? mpe beto basisaka ve bampeve ya yimbi na nkumbu ya nge? mpe beto salaka ve bisalu ya nene na nkumbu ya nge? Mpe na yina mu ke tuba na bawu, mu zabaka beno ata fioti ve: beno kwenda ntama ya munu, beno yina ke salaka disumu ya nku.” (Matt 7:21-23)

Kaka samu muntu mosi ke zonzilaka Buklisto yina zola tuba ve ti ya me kuzwaka mpulusu. Na yina, yayi kele kyuvu ya kieleka na kati ya mabanza ya beto: Wapi mutindu mu ke kuzwa Luzingu ya Kukonda nsuka? Yesu pesaka beto mvutu mosi ya fioti: Ya kieleka, ya kieleka, mu ke tuba na beno, Yandi yina ke kwikila ndinga ya munu, mpe ke kwikila na yandi yina tindaka munu, kele na luzingu ya kukonda nsuka, mpe yandi ke kwisa ve na lufundusu; kasi yandi me luta lufwa na luzingu. (Jean 5:24)

Kasi, ya kele na bantu fioti na yinza bubu yayi yina ke zolaka kuzwa ntangu na kati ya bilumbu ya bawu ya kufuluka na bisalu samu na kuwa Ndinga ya Nzambi. Mpe ya kele diaka na fioti mingi yina ke kwikila Ndinga na ntangu bawu me kuwa yawu.

Mabuundu ke tubaka na beto na kuvwanda bantu ya mbote, na kubanza mbote, na kuvuna ve, na kuyiba na kinsweki ve, to kuyiba ve, mpe beto ke kwenda na Mazulu. Bawu ke bakulaka ve ti difelo ke vwanda ya kufuluka na bantu yina ke monanaka ti bawu ke zingaka baluzingu ya mbote. Kieleka kele ti beto ke kwenda ve na Mazulu samu na bisalu ya beto ya mbote to samu beto kele mambele ya dibuundu mosi. Ya kele kaka na nzila mosi samu na Luzingu ya Kukonda nsuka, mpe ya kele na nzila ya Yesu Klisto. Yandi tumaka beto ti beto fwana KWIKILA Ndinga ya Yandi, yina kele Biblia. Na yina, wapi mutindu beto ke kuzwa mpulusu?

Ntangu kilumbu ya lufundusu ke kwisa samu na beno, beno ke kuwa, “Kwisa, nge yina me sakumuka na Tata ya munu, kilandi ya difwa ya kimfumu yina ba me yidika samu na nge kubanda mbandukulu ya yinza,” (Matt 25:34) beno ke kuwa, “Kwenda ntama ya munu, nge yina me singama, na kati ya tiya ya mvula na mvula, yina ba me yidika samu na diabulu mpe bawanzio ya yandi”? (Matt 25:41)

Mutindu meso ya beno ke tanga bandinga yayi, beno kele na nsodolo ya kusala: Beno ke soola kukwikila Ndinga ya Nzambi?

Wapi beno ke lutisa seko?

Masonuku

Job 14:12-16

Na yina muntu ke lalaka, mpe ke telama ve: tii mazulu ke vwanda diaka ve, bawu ke vumbuka ve, to bawu ke telama diaka ve na mpongi ya bawu.

O ti nge zolaka bumba munu na kati ya ntoni, ti nge zolaka bumba munu na kinsweki, tii kuna nganzi ya nge ke luta, ti nge zolaka tula ntangu mosi samu na munu, mpe kubambuka moyo na munu!

Kana muntu me kufwa, yandi ke zinga diaka? Bilumbu nionso ba tulaka samu na munu ti mu ke vingila, tii nsobolo ya munu ke kwisa.

Beno ke bokila, mpe mu ke pesa beno mvutu: beno ke kuzwa nsatu samu na kisalu ya maboko ya beno.

Samu ntangu yayi nge ke tanga bitambi ya munu: nge ke tala ve na zulu ya disumu ya munu?

Job 19:23-26

Oh ti ba me sonika bandinga ya munu ntangu yayi! oh ti ba me sonika yawu na buku!

Ti ba me sonika yawu na kilapi ya kisengo mpe ba me tula yawu na kati ya ditadi samu na mvula na mvula!

Samu mu zaba ti mukudi ya munu kele moyo, mpe ti yandi ke telema na kilumbu ya nsuka na zulu ya ntoto:

Mpe ti na manima misobi ya mpusu ya munu me bebisa nzutu yayi, kasi na kati ya nsuni ya munu mu ke mona Nzambi:

Matthieu 7:21-23

Ve bayina nionso ke tubaka na munu, Mfumu, Mfumu, ke kota na kimfumu ya mazulu; kasi yandi yina ke salaka luzolo ya Tata ya munu yina kele na mazulu.

Mingi ke tuba na munu na kilumbu yina, Mfumu, Mfumu, beto pesaka profesi ve na nkumbu ya nge? mpe beto basisaka ve bampeve ya yimbi na nkumbu ya nge? mpe beto salaka ve bisalu ya ngitukulu na nkumbu ya nge?

Mpe na yina mu ke tuba na bawu, mu zabaka beno ata fioti ve: beno kwenda ntama ya munu, beno yina ke salaka kisalu ya nku.

Matthieu 22:14

Samu ba me bokila bantu mingi, kasi ba me soola bantu fioti.

Jean 3:16-17

Samu Nzambi zolaka mingi yinza, ti yandi pesaka Mwana ya yandi mosi kaka, ti muntu nionso yina ke kwikila na yandi ke kufwa ve, kasi ke kuzwa luzingu ya kukonda nsuka.

Samu Nzambi tindaka ve Mwana ya yandi na yinza samu na kufundisa yinza; kasi ti yinza kuzwa mpulusu na nzila ya yandi.

Jean 5:24

Ya kieleka, ya kieleka, mu ke tuba na beno, Yandi yina ke kuwa ndinga ya munu, mpe ke kwikila na yandi yina tindaka munu, kele na luzingu ya kukonda nsuka, mpe yandi ke kwisa ve na lufundusu; kasi yandi me luta lufwa na luzingu.

I Corinthiens 2:9

Kasi mutindu ya kele ya kusonika, Disu me monaka ve, dikutu me kuwaka ve, to yina me kotaka ntete ve na ntima ya muntu, bima yina Nzambi me yidika samu na bawu yina ke zolaka yandi.

I Thessaloniciens 4:13-18

Kasi mu ke zola ve ti beno zaba ve, bampangi, samu na bawu yina kele ya kulala, ti beno vwanda ve na mawa, ti mutindu bayankaka yina kele ve na kivuvu.

Samu kana beto ke kwikila ti Yesu kufwaka mpe vumbukaka diaka, ti mutindu mosi bayina kele ya kulala kati na Yesu ti Nzambi ke nata bawu na yandi.

Samu yayi beto ke tuba na beno na nzila ya ndinga ya Mfumu, ti beto yina kele moyo mpe ke bikana tii na nkwizulu ya Mfumu ke pekisa ve bayina kele ya kulala

Samu Mfumu yandi mosi ke kulumuka na mazulu na kuboka, na ndinga ya archange, mpe mpungi ya Nzambi: mpe bantu ya kufwa kati na Klisto ke vumbuka ntete:

Na manima beto yina kele moyo mpe ke bikana ba ke zangula beto na bawu na matuti, samu na kukutana na Mfumu na mipepe: mpe na yina beto ke vwanda na Mfumu mvula na mvula.

Na yina beno kindisana mosi na yankaka na bandinga yayi.