Psaume 96:13

na ntwala ya mfumu: samu yandi ke kwisa, samu yandi ke kwisa samu na kufundisa ntoto: yandi ke fundisa yinza na ludedomo, mpe bantu na kieleka ya yandi.

Ya kele na mafunda ya ba-denomination ya kuswaswana na yinza bubu yayi. Konso nsambulu ke fundisa yankaka, kasi bawu nyonso ke silaka mpulusu na nzila ya denomination ya bawu. Wapi mutindu beto ke zaba yina beto ke soola?

Kana beto soola dibuundu ya Katolika, na yina beto ke ndima lombilu ya basantu, yina kele kaka kusambila biteki. Biblia me tuba, “Samu ya kele na Nzambi mosi, mpe mulombi mosi kati-kati ya Nzambi mpe bantu, muntu yango Yesu Klisto;” (I Tim 2:5). Ba ke bokilaka nganga-Nzambi “Tata” yina Yesu pekisaka na Matt 23:9: “Mpe beno bokila ve muntu mosi tata ya beno na zulu ya ntoto: samu mosi kaka kele Tata ya beno, yina kele na mazulu.” Ba-Assemblée de Dieu ke tubaka na beto ti kutuba na bandinga kele nzikisa ya kieleka ya Mpeve-Santu, ntangu Paul tubaka, “Mu lenda kuzonza na Bandinga ya bantu mpe ya bawanzio, kasi kana mu ke zolaka ve bampangi ya munu, mu kele mutindu ngoma, to ngunga yina ke salaka makelele ya mpamba.” (I Cor 13:1)

Na yina ba-denomination ke tuba na beno na nswalu nionso ti bima mingi na kati ya Biblia me tendulama mbote ve, me zimbisa mbangululu, to beno tula yawu ve samu na yinza ya bubu yayi. Na yina, beno fwana kwikila Biblia to malongi ya ba-denomination? Yinki Nzambi ke sadilaka mutindu kitesilu samu na lufundusu?

Kana mu ke yufula Bakatolika awa na nkokila yayi, “Na nzila ya yinki beno ke banza ti Nzambi ke fundisa yinza?” Bakatolika ke tuba, “Na nzila ya dibuundu ya Katolika.” Mbote mingi, ntangu yayi yinki Dibuundu ya Katolika? Ntangu yayi ba ke na ba-Romain, ba-Grec Orthodoxe, mpe mingi na kati ya bawu. Yinki Dibuundu ya Katolika ya ke vwanda? Ba-Lutherien ke tuba, “Na nzila ya beto,” na yina beno ba-Baptiste me zimbana. Na manima kana mu ke tuba, “Na nzila ya ba-Baptiste,” na yina beno ba-Pentecotiste me zimbana. Na yina ya ke vwanda na muvusu ya mutindu yayi, ata muntu mosi ve ke zaba yinki kusala; na yina Yandi silaka ata fioti ve ti Yandi ke fundisa yinza na nzila ya dibuundu.

Yandi silaka na kufundisa yinza na nzila ya Klisto, mpe Klisto kele Ndinga. Mpe Biblia kele yina ke fundisa yinza, yina kele Yesu Klisto mutindu mosi mazono, bubu yayi, mpe kukonda nsuka.

Masonuku

Jean 1:1

Na mbandukulu vwandaka Ndinga, mpe Ndinga vwandaka na Nzambi, mpe Ndinga vwandaka Nzambi.

Jean 1:14

Mpe Ndinga kumaka nsuni, mpe zingaka na kati-kati ya beto (mpe beto monaka nkembo ya yandi, nkembo mutindu mwana mosi kaka ya Tata,) ya kufuluka na lemvo mpe kieleka.

Jean 5:22

Samu Tata ke fundisaka muntu mosi ve, kasi pesaka lufundusu nionso na Mwana:

Jean 12:48

Yandi yina me manga munu, mpe me yamba ve bandinga ya munu, kele na mosi yina ke fundisa yandi: ndinga yina mu me tuba, yawu yina ke fundisa yandi na kilumbu ya nsuka.

Ephesiens 1:5-7

Na yina ba soolaka beto na ntwala samu na lukumu ya bana na nzila ya Yesu Klisto samu na yandi mosi, landila bumbote ya nzila ya yandi,

Samu na lukumu ya nkembo ya lemvo ya yandi, yina yandi pesaka beto na nzila ya mwana ya yandi ya luzolo.

Na kati ya yandi beto me kuzwa mpulusu na nzila ya menga ya yandi, mulemvo ya masumu, landila bimvwama ya lemvo ya yandi;

Ephesiens 2:5-8

Ata ti ntangu beto vwandaka ya kufwa na kati ya masumu, yandi me kindisa beto kintwadi na Klisto, (na nzila ya lemvo beno me kuzwa mpulusu;)

Mpe me vumbula beto kintwadi, mpe me sala ti beto kuvwanda kintwadi na bisika ya mazulu kati na Klisto Yesu:

Ti na kati ya bansungi yina ke kwisa yandi fwana talisa bimvwama ya kulutila ya lemvo ya yandi na kati ya lutondo ya yandi na ntwala ya beto na nzila ya Klisto Yesu.

Samu ti na nzila ya lemvo beno me kuzwa mpulusu na nzila ya lukwikilu; mpe yina kele ve ya beno mosi: ya kele dikabu ya Nzambi:

I Jean 1:7

Kasi kana beto ke tambula na kati ya nsemo, mutindu yandi kele na kati ya nsemo, beto kele na mbundana mosi na yankaka, mpe menga ya Yesu Klisto Mwana ya yandi me sukula beto na masumu nionso.

Apocalypse 22:18-19

Samu mu ke kebisa bayina ke na kuwa bandinga ya profesi ya buku yayi, Kana muntu mosi bwela na mambu yayi, Nzambi mpe ke bwela na kitumbu na bampasi yina yandi ke kuzwa yina kele ya kusonika na buku yayi:

Mpe kana muntu mosi ke katula mwa diambu na mambu ya buku ya profesi yayi, Nzambi mpe ke katula yandi kikunku ya yandi na bambuma ya yinti ya luzingu, mpe ke katula yandi na mbanza ya santu yina ba me zonzila na kati ya buku yayi.