Kieleka, mbotika kele mfunu mingi, kasi yina ke tadila wapi mutindu beto me kuzwa mbotika? Ya kele na mbotika ya kieleka, to nionso ke salaka? Kana beno ke kwikilaka Biblia, na YINGA, ya kele na mbotika ya kieleka.

Mabuundu mingi ke botikaka na Nkumbu ya Tata, Mwana, mpe Mpeve-Santu, kasi yayi kele mbote ve landila Biblia.

Na Actes 19, ya vwandaka na mwa bantu yina kwikilaka ntete na Yesu Klisto, kasi bawu zwaka ntete ve Mpeve-Santu na kati ya bantima ya bawu. Ntumwa Paul zabaka mutindu ya kieleka samu na kuzwa Mpeve-Santu, na yina yandi yufulaka bawu, “Wapi mutindu beno bakaka mbotika?” Mpe bawu tubaka, “Na mbotika ya Jean.” (Actes 19:3) Paul monaka ti bawu bakaka ve mbotika landila lutumu ya Pierre na Actes 2:38, na yina yandi tumaka bawu na kubaka dyaka mbotika na Nkumbu ya Mfumu Yesu Klisto. Na manima, mutindu ba silaka, bawu kuzwaka Mpeve-Santu.

Na yina, samu na yinki bilandi botikaka na nkumbu ya Yesu ntangu Yesu, Yandi mosi, tubaka na bawu na kubotika na Nkumbu (ve “bankumbu”) ya tata, mpe ya Mwana, mpe ya Mpeve-Santu? (Matt 28:19) Bawu salaka kifu? Ve! Bawu salaka kieleka mutindu ba tumaka bawu.

Mutindu beno ke tanga zulunale yayi, beno banza na nkumbu ya beno. Beno kele mwana? Nkumbu ya beno kele, “Mwana”? Beno kele mama? Nkumbu ya beno kele, “Mama”? Ya kieleka ve, yayi kele kaka bisalu. Beno kele na nkumbu ya kieleka, mpe mutindu mosi Nzambi.

Mvutu yawu yayi:

Mpe ya kele ve na kima mutindu yayi na kati ya Biblia mutindu mosi ata muntu mosi ve me bakaka ntete mbotika na nkumbu ya Tata, Mwana, Mpeve-Santu; samu ya kele ve na kima mutindu yayi. Tata kele nkumbu ve; mpe Mwana kele nkumbu ve; mpe Mpeve-Santu kele nkumbu ve; kasi Nkumbu ya tata, Mwana, Mpeve-Santu kele Mfumu Yesu Klisto.

Yesu Klisto kele Nzambi! Yandi kele Tata, Mwana, mpe Mpeve-Santu.

Kana beno ke na kusosa Mpeve-Santu mpe beno ke kukiyufula samu na yinki Mfumu me pesaka yawu ve na beno ntete, na yina beno fwana zola kukiyufula kyuvu mutindu yina Paul yufulaka, “Wapi mutindu beno bakaka mbotika?”

Masonuku

Matthieu 28:19

Beno kwenda bisika nionso, mpe beno longa na bayinsi nionso, na kubotikaka bawu na nkumbu ya Tata, mpe ya Mwana, mpe ya Mpeve-Santu:

[Yinki kele Nkumbu ya Tata? Nkumbu ya Mwana? Nkumbu ya Mpeve-Santu?]

Marc 16:16

Yandi yina ke kwikila mpe ke baka mbotika ke kuzwa mpulusu; kasi yandi yina ke kwikila ve ke kuzwa kitumbu.

Jean 5:43

Mu me kwisa na nkumbu ya Tata ya munu, mpe beno me yamba munu ve: kana muntu yankaka me kwisa na nkumbu ya yandi mosi, yandi beno ke yamba yandi.

[Kana Yandi kwisa na Nkumbu ya tata ya Yandi, na yina yinki kele Nkumbu ya Yandi?]

Jean 10:30

Munu na Tata ya munu kele mosi.

Jean 12:45

Yandi yina me mona munu yandi me mona yina tindaka munu.

Jean 14:8-9

Philippe tubaka na yandi, Mfumu, talisa na beto Tata, mpe yina me lunga samu na beto.

Yesu tubaka na yandi, Kubanda ntama mu ke vwandaka na beno, mpe nge me zaba munu ve, Philippe? yandi yina me mona munu yandi me mona Tata; mpe wapi mutindu nge ke tuba ti, Talisa na beto Tata?

Jean 20:27-28

Na yina yandi tubaka na Thomas, Tanda musapi ya nge, mpe simba maboko ya munu; mpe tanda diboko ya nge, mpe kotisa yawu na kati ya mpanzi ya munu: mpe kuvwanda na ntembe ve, kasi vwanda na lukwikilu.

Mpe Thomas pesaka mvutu mpe tubaka na yandi, Mfumu ya munu mpe Nzambi ya munu.

Actes 2:38-39

Na yina Pierre tubaka na bawu, Beno balula bantima, mpe beno baka mbotika beno nionso na nkumbu ya Yesu Klisto samu na mulemvo ya masumu, mpe beno ke kuzwa dikabu ya Mpeve-Santu.

Samu nsilulu kele samu na beno, mpe bana ya beno, mpe samu na bayina nionso kele ntama, mpe ya kulutila mingi Mfumu Nzambi ya beto ke bokila.

Actes 4:12

Ya kele ve na mpulusu na muntu yankaka: samu ti ya kele ve na nkumbu yankaka na yisi mazulu yina me pesama na kati ya bantu, na yina beto fwana kuzwa mpulusu.

Actes 8:12

Kasi ntangu bawu kwikilaka ti Philippe vwandaka longa bima ya kimfumu ya Nzambi, mpe nkumbu ya Yesu Klisto, bawu kuzwaka mbotika, babakala mpe bakento.

Actes 19:3-6

Mpe yandi tubaka na bawu, Ti wapi mutindu ya mbotika beno kuzwaka? Mpe bawu tubaka, Na mbotika ya Jean.

Na yina Paul tubaka, Jean ya kieleka botikaka na mbotika ya kubalula ntima, na kutubaka na bantu, ti beno lendaka kwikila na yandi yina ke kwisa na manima ya yandi, ya zola kutuba, na Klisto Yesu.

Ntangu bawu kuwaka yayi, bawu kuzwaka mbotika na nkumbu ya Mfumu Yesu.

Mpe ntangu Paul ntetikaka maboko na zulu ya bawu, Mpeve-Santu kwisaka na zulu ya bawu; mpe bawu tubaka na bandinga, mpe pesaka profesi.

Ephesiens 4:5

Mfumu mosi, lukwikilu mosi, mbotika mosi,

Colossians 3:17

Mpe nionso yina beno ke sala na ndinga to na kisalu, beno sala nionso na nkumbu ya Mfumu Yesu, na kupesaka matondo na Nzambi mpe Tata na nzila ya yandi.

I Jean 5:7

Samu ya kele tatu yina ke pesaka kimbangi na mazulu, Tata, Ndinga, mpe Mpeve-Santu: mpe tatu yayi kele mosi.