Tala, mu ke tinda beno elie profete na ntwala ya nkwizulu ya kilumbu ya nene mpe ya boma ya MFUMU:
Mpe yandi ke vutula ntima ya batata na bana, mpe ntima ya bana na batata ya bawu, ti mu ke kwisa mpe ke bula ntoto na nsingulu.

---

Buku ya nsuka ya Ngwisani ya Ntama silaka kubeba ya yinza. Kasi na ntwala ya nsuka, ba zabisaka na ntwala ti Elie profete ke vutuka mpe ke talisa Mesiya. Bayankaka ke tubaka ti Jean Baptiste lungisaka profesi yayi.

Bamvula mafunda zole me luta, ba-Juif vwandaka vingila Mesiya kukwisa. Bawu zabaka ti Malachie pesaka profesi ti bakala mosi na mpeve ya Elie ke talisa Mesiya na bawu. Kasi ntangu Jean Baptiste kwisaka, yandi vwandaka Elie yina ba vwandaka vingila. Ntangu bawu yufulaka Yesu samu na yinki Elie me kwisa ntete ve, Yandi tubaka na bawu pwelele ti Jean vwandaka kulungisama ya profesi yayi: “Mpe kana beno ke yamba yawu, yayi kele Elie, yina zolaka kukwisa.” (Elias kele mutindu ya Grec ya nkumbu ya Hebreux, Elie.)

Ya vwandaka kaka na bantu fioti yina yambaka luzayikisu yayi. Samu na bantwadisi yankaka ya misambidi, Jean vwandaka kaka muntu ya kuvweza ya kuzatuka samu na ba-organisation ya bawu. Ve kaka ti bawu zabaka ve mpeve ya Elie, kasi kulutila yimbi, bawu kondwaka diaka Nkwizulu ya Klisto.

Na yina Jean Baptiste lungisaka profesi ya Malachie? Na muvimba ve.

Ya ntete, yinza “yokamaka ve mutindu dibulu ya tiya” kasi, na yina beto zaba ti kaka kitini ya Malachie 4 me lungisama ntete. Kitini yankaka ya Masonuku yina Jean lungisaka ve vwandaka, “kuvutula ntima ya bana na batata ya bawu.” Mpe, Yesu, yandi mosi, pesaka profesi ti Elie ke (na bilumbu ke kwisa) kwisa mpe ke vutula bima nionso. (Matt 17:11)

Na yina beto fwana vingila Elie na ntwala ya Nkwizulu ya Zole ya Klisto!

Ntangu yayi, na kilumbu yayi, ya kele ntangu samu na Nkwizulu ya Zole ya Mfumu Yesu. Diaka, ba silaka beto ti mpeve ya Elie ke talisa Yandi na beto landila Malachie 4. Kasi yinki kimvuka ya bantu ke zaba Elie ntangu ya ke kwisa? Kaka bayina ke na kuvingilaka yandi.

Bandinga yayi ya Mfumu ya beto mpe Mvulusi me kwisa na mabanza ntangu beto ke banza na profesi ya Malachie samu na bangunga yayi ya nsuka ya ntangu:

Kasi mu ke tuba na beno, Ti Elie me kwisaka ntete, mpe beno zabaka yandi ve... Matthieu 17:12

Yinki kana beto me kondwa nkwizulu yayi ya Elie? Beto ke kondwa diaka Nkwizulu ya Zole ya Klisto, mutindu bansoniki mpe ba-Pharisien kondwaka Nkwizulu ya Yandi ya Ntete samu bawu zabaka ve Jean Baptiste?

 

 

 

 

Masonuku

II Rois 2:15

Mpe ntangu bana ya baprofete yina vwandaka kutala na Jericho monaka yandi, bawu tubaka, Mpeve ya Elie kele na zulu ya Elisée. Mpe bawu kwisaka samu na kukutana na yandi, mpe fukamaka na ntoto na ntwala ya yandi.

Esaie 40:3-4

Ndinga ya yandi yina bokaka na kati ya ntoto ya kuyuma, beno yidika nzila ya MFUMU, mpe beno sungika nzila ya nene na kati ya ntoto ya kuyuma samu na Nzambi ya beto.

Biwanda nionso ke kuma lepele, mpe miongo nionso mpe miongo ya fioti ke kulumuka: mpe banzila ya kutengama ke vwanda ya kusungama, mpe bisika ya mabulu ke kuma lepele: [Jean Baptiste]

Malachie 3:1

Tala, mu ke tinda munati-nsangu ya munu [Jean Baptiste], mpe yandi ke yidika nzila na ntwala ya munu: mpe Mfumu, yina beno ke sosaka, ke kota mbala mosi na tempelo ya yandi, mpe munati-nsangu ya ngwisani, yina beno ke zolaka: tala, yandi ke kwisa, me tuba MFUMU ya makesa.

Malachie 4:1-6

Na yina, tala, kilumbu ke kwisa, yina ke pela mutindu dibulu ya tiya [yayi me salamaka ntete ve]; mpe bantu nionso ya lunangu, yinga, mpe bantu nionso yina ke salaka mambu ya yimbi, ke vwanda mutindu matiti: mpe kilumbu yina ke kwisa ke yoka bawu, me tuba MFUMU ya makesa, ti ya ke bika ve na bawu nsimbulu to mavala.

Kasi samu na beno yina ke bangaka nkumbu ya munu mwini ya ludedomo ke telama na kubeluka na mapapu ya yandi; mpe beno ke basika, mpe beno ke dumuka mutindu bibulu na kati ya kidikilu.

Mpe beno ke diata bantu ya yimbi; samu ti bawu ke vwanda fundu-fundu na yisi ya bitambi ya makulu ya beno na kilumbu yina mu ke sala yayi, me tuba MFUMU ya makesa.

Beno bambuka moyo musiku ya Moise musadi ya munu, na yina mu tumaka na yandi na Horeb samu na Israel nionso, na bandongosolo mpe misiku.

Tala, mu ke tinda beno Elie profete na ntwala ya nkwizulu ya kilumbu ya nene mpe ya boma ya MFUMU:

Mpe yandi ke vutula ntima ya batata na bana [Jean Baptiste], mpe ntima ya bana na batata ya bawu [Elie ya bilumbu yayi], ti mu ke kwisa mpe ke bula ntoto na nsingulu.

Matthieu 11:10

Samu yayi kele yandi, samu na yandi ba me sonikaka, Tala, mu ke tinda munati-nsangu ya munu na ntwala ya kizizi ya munu, yina ke yidika nzila ya nge na ntwala ya nge. [Malachi 3:1, Jean Baptiste]

Matthieu 11:14

Mpe kana beno ke yamba yayi, yayi kele Elie, yina zolaka kwisa. [Jean Baptiste]

Matthieu 17:11-12

Mpe Yesu pesaka mvutu mpe tubaka na bawu, Elie kieleka fwana kwisa ntete, mpe kuvutula bima nionso. [Elie ya bilumbu yayi]

Kasi mu ke tuba na beno, Ti Elie me kwisaka ntete, mpe bawu zabaka yandi ve, kasi salaka na yandi nionso yina bawu zolaka. [Jean Baptiste] Mutindu mosi mpe bawu ke talisa mpasi na Mwana ya muntu.

Luc 1:17

Mpe yandi ke kwenda na ntwala ya yandi na mpeve mpe ngolo ya Elie, samu na kuvutula bantima ya batata na bana, mpe yina ke tumamaka ve na ndwenga ya muntu ya ludedomo; samu na kukubika bantu yina me yilama samu na Mfumu. [Jean Baptiste]