Ntchakumanyamanya, ubapatizo ngwakukhumbikwira chomene, kweni kasi kuzirwa kuripo umo ise tikubapatizikira? Kasi uliko ubapatizo wa unenesko, panji kasi unyakhe uliwose ungavwira? Usange imwe mukugomezga Baibolo, ipo INYA, uliko ubapatizo waunenesko.

Mipingo yinandi yikubapatiza mu Zina la Wiske, Mwana, na Mzimu Mutuŵa, kweni uwu ntha ndi unenesko kwakulingana na Baibolo.

Mu Milimo 19, kukaŵa ŵanthu ŵanyakhe awo ŵakagomezga kale pa Yesu Khristu, kweni ŵakaŵa ŵandapokere Mzimu Mutuŵa mu mitima yawo. Mpostole Paulos wakamanya nthowa yeneko yakuti ŵapokere Mzimu Mutuŵa, ntheura iyo wakaŵafumba iwo, “Kasi imwe mukabapatizikira mu wanjani?” Ndipo iwo ŵakati, “Mu ubapatizo wa Yohane.” (Milimo 19:3) Paulos wakawona kuti iwo ntha ŵakabapatizika kwakulingana na kulangura kwa Petros mu Milimo 2:38, ntheura iyo wakaŵaphalira kuti ŵakabapatizikeso mu Zina la Fumu Yesu. Ntheura, umo kukalayizgikira, iwo ŵakapokera Mzimu Mutuŵa.

Ntheura, ntchifukwa uli ŵasambiri ŵakabapatiza mu Zina la Yesu apo Yesu, Iyomwene, wakaŵaphalira iwo kuti ŵakabapatize mu Zina (ntha “mazina”) la Wiske, na la Mwana, na la Mzimu Mutuŵa? (Mateyu 28:19) Kasi iwo ŵakanangiska? Yayi! Iwo ŵakachita ndendende umo iwo ŵakaphalirikira.

Apo imwe mukuŵazga makani agha, ghanaghanani za zina linu. Kasi imwe ndimwe mwana? Kasi zina linu ndi, “Mwana”? Kasi imwe ndimwe mama? Kasi zina linu ndi “Mama”? Yayi nadi, agho ndi maudindo waka. Imwe muli nalo zina leneko, ndipo ntheura ndimo waliri Chiuta.

Zgoro liri apa:

Ndipo kulije chinthu chantheura mu Baibolo kuti munyakhe wakabapatizika mu zina la Wiske, Mwana, Mzimu Mutuŵa; chifukwa kulije chinthu chantheura. Wiske ndi zina yayi; ndipo Mwana ndi zina yayi; ndipo Mzimu Mutuŵa ndi zina yayi; kweni Zina la Wiske, Mwana, Mzimu Mutuŵa ndi Fumu Yesu Khristu.

Yesu Khristu ndi Chiuta! Iyo ndi Wiske, Mwana, na Mzimu Mutuŵa.

Usange imwe mukupenja Mzimu Mutuŵa ndipo mukuzizwa chifukwa icho Fumu yichali yindapereke uwu kwa imwe, ntheura imwe panji mungakhumba kuti mujifumbe mwaŵene fumbo lenelira Paulos wakafumba, “Kasi imwe mukabapazikira mu wanjani?”

Mukaŵerenge

Mateyu 28:19

Ipo imwe rutani, ndipo mukasambizge mitundu yose, kuŵabapatizanga iwo mu zina la Wiske, na la Mwana, na la Mzimu Mutuŵa:

[Kasi Zina la Wiske ndi vichi? Zina la Mwana? Zina la Mzimu Mutuŵa?]

Marko 16:16

Uyo wakugomezga na kubapatizika wati waponoskekenge; kweni mweneuyo ntha wakugomezga wati wasuskikenge.

Yohane 5:43

Ine ndafika mu zina la Ŵadada ŵane, ndipo imwe ntha mukundipokerera: usange munyakhe wazamkwiza mu zina lakhe, mweneuyo imwe muzakumupokerera.

[Usange Iyo wakwiza mu Zina la Wiske Wakhe, ipo kasi Zina Lakhe ndi njani?]

Yohane 10:30

Ine na Adada ŵane tiri yumoza.

Yohane 12:45

Ndipo uyo wawona ine wawona iyo mweneuyo wakandituma ine.

Yohane 14:8-9

Filipu wakanena na iyo, Fumu, mutirongore Ŵadada, ndipo ichi chitikhorweskenge ise.

Yesu wakati kwa iyo, Kasi Ine ndakhala nawe nyengo yitali ntheura, ndipouli iwe uchali undanimanye ine, Filipu? uyo wawona ine wawona Ŵadada; ndipo kasi iwe ukuyowoya uli ntheura, Mutirongore ise Ŵadada?

Yohane 20:27-28

Ntheura iyo wakanena na Tomasi, Nyoroskera kuno munwe wako, ndipo laŵiska mawoko ghane; ndipo nyoroskera kuno woko lako, ndipo uliŵike mu luŵavu lane: ndipo ungaŵanga wambura chipulikano, kweni gomezganga.

Ndipo Tomasi wakazgora ndipo wakati kwa iyo, Fumu Yane na Chiuta wane.

Milimo 2:38-39

Ntheura Petros wakati kwa iwo, Rapani, ndipo mubapatizike waliyose wa imwe mu zina la Yesu Khristu ku kugowokereka ku zakwananga, ndipo mupokerenge chawanangwa cha Mzimu Mutuŵa.

Pakuti phangano ndinu, na ŵana ŵinu, na wose awo ŵali kutali, nanga ndi ŵanandi awo Fumu Chiuta withu wachemenge.

Milimo 4:12

Ntha chiriko chiponosko mu linyakhe lirilose: pakuti kulije zina linyakhe kusi kwa mtambo liri kuperekeka ku ŵanthu, ilo ise tikwenera kuponoskekeramo.

Milimo 8:12

Kweni para iwo ŵakati ŵagomezga Filipu kupharazganga vinthu ivi kukhwaskana na ufumu wa Chiuta, na zina la Yesu Khristu, iwo ŵakabapatizika, wose ŵanarumi na ŵanakazi.

Milimo 19:3-6

Ndipo iyo wakati kwa iwo, Ntheura kasi imwe mukabapatikira mu wanjani? Ndipo iwo ŵakati, Mu ubapatizo wa Yohane.

Ntheura Paulos wakati, Yohane nadi wakabapatiza na ubapatizo wa kurapa, kuyowoyanga ku ŵanthu, kuti iwo ŵagomezge pa iyo mweneuyo wakwiza kunyuma zakhe, ndiko kuti, pa Khristu Yesu.

Para iwo ŵakati ŵapulika ichi, iwo ŵakabapatizika mu zina la Fumu Yesu.

Ndipo para Paulos wakati waŵika mawoko ghakhe pa iwo, Mzimu Mutuŵa ukiza pa iwo; ndipo iwo ŵakayowoya malilime, ndipo ŵakachima.

Ŵaefeso 4:5

Fumu yimoza, chipulikano chimoza, ubapatizo umoza.

Ŵakolose 3:17

Ndipo chirichose imwe mukuchita mu mazgu panji mlimo, chitani vyose mu zina la Fumu Yesu, kuperekanga viwongo kwa Chiuta na Wiske kwizira mwa iyo.

I Yohane 5:7

Pakuti kuli ŵatatu awo ŵakuchitira ukaboni kuchanya, Ŵadada, Mazgu, na Mzimu Mutuŵa: ndipo ŵatatu aŵa ndi yumoza.