Genesis 3:1

Karon ang bitin malalangon labi pa kay sa ngatanan nga mga mananap sa kapatagan nga gibuhat sa GINOONG Dios. Ug nag-ingon siya sa babaye, Diay, nag-ingon ang Dios, Dili kamo makakaon sa tanan nga mga kahoy sa tanaman?

Genesis 3:6-7

Ug sa nakita sa babaye nga ang kahoy maayo nga kan-on, ug nga kini makalipay sa mga mata, ug nga ang kahoy takus tinguhaon aron makapahimong makinaadmanon sa tawo, mikuha siya sa bunga niini, ug mikaon, ug gihatagan usab niya ang iyang bana kauban niya; ug mikaon siya.

Ug nangabuka ang mga mata nilang duha, ug sila nanghibalo nga sila mga hubo; ug nanagtahi sila sa mga dahon sa higuera, ug nanagbuhat og mga tapis alang sa ilang kaugalingon.

Genesis 3:14-15

Ug ang gInoong Dios nag-ingon sa bitin, Tungod kay ikaw nagbuhat niini, tinunglo ikaw labi pa kay sa tanan nga mga kahayopan, ug labaw sa tanan nga mga mananap sa kapatagan; sa imong tiyan magakamang ka, ug magakaon ikaw sa abog sa tanan nga mga adlaw sa imong kinabuhi:

Ug ibutang ko ang panagkaaway sa taliwala mo ug sa babaye, ug sa taliwala sa imong kaliwat ug sa iyang kaliwat; siya magasamad sa imong ulo, ug ikaw magasamad sa iyang tikod.

Kini mao ang nahaunang kasal-anan nga nasulat diha sa Biblia. Ang pinaka-maliputon sa tanang mananap, ang serpente, “gilimbongan” si Eva sa pagkaon sa usa ka gidili nga bunga. Gikaon niya kini ug dayon gihatag kini ngadto sa iyang bana, nga maoy nagpaamgo kanila nga sila mga hubo.

Ang tin-aw nga mga pangutana maoy: Unsa man pagkahimo nga nakasulti ang bitin? Unsa ma’y kahilambigitan sa mansanas sa pagkahubo? Ug, asa man mohilambigit ang kaliwat sa serpente ngadto niining tanan?

Nagaingon ang Biblia nga ang serpente mao kaniadto ang pinaka “malalangon” sa tanang mga mananap. Sama siya kaayo sa tawo kaniadto, ingon nga siya makalakaw, makasulti, ug mahimo pa gani nga magkaaduna og maalamon nga pagpakig-estorya. Ug human nga gilimbongan niya ang asawa ni Adan, gitunglo siya sa Dios aron mahimong usa ka bitin, apan dili sa wala pa nabuhat ang maong kadaut ug naitanum ang semilya niini.

Nagaingon ang Biblia diha sa Genesis 3:15 nga nagkaaduna ang serpente og kaliwat, ug nagbutang ang Dios og panagkaaway tali sa maong duha ka mga kaliwat. Klaro nga, ang binhi sa serpente misagol sa natural nga binhi ni Eva sa wala pa ang pagpahimulag. Unsaon man pagkahimo nianang tanan nga mamahimong resulta sa pagkaon og mansanas? Dayon, sa pipila ka mga bersekulo human niana, “Gitawag ni Adan ang ngalan sa iyang asawa nga Eva; tungod kay siya mao ang inahan sa ngatanan nga adunay kinabuhi.” Timan-i nga kini wala nagaingon nga si Adan maoy amahan sa ngatanan nga adunay kinabuhi.

Adunay tulo ka nagkalainlaing “mga bunga” diha sa Biblia. Siyempre, adunay literal nga bunga, sama sa usa ka mansanas, nga nagatubo ug ginakaon ingon nga pagkaon. Aduna usab og bunga nga nagapahinungod ngadto sa atong mga buhat, kini natural man nga mga buhat sama sa pagpanguma ug pagnegosyo, o espirituhanong mga buhat sama sa paghimo og mga milagro ug pagwali sa Maayong Balita. Dayon, aduna usab ang bunga sa tagoangkan, nga nagapahinungod sa pagsamkon ug pagpanganak.

Ang pag-kaon ba og usa ka literal nga bunga mohatag kaha kang Adan ug Eva sa pagsabot nga sila diay hubo? O, kini kaha mokinahanglan og usa ka pisikal nga pagpakig-relasyon tali sa usa ka lalaki ug usa ka babaye aron nga masabtan nila kon ngano nga kinahanglan nilang tabonan ang pipila ka bahin sa ilang lawas?

Unsa ba gyud ang nahitabo niadtong adlawa didto sa maong Tanaman aron nga mahulog ang tibuok katawohan?

Sama nga ang Binhi sa babaye sa literal mao ang pagpahimugso sa Dios sa Iyang Kaugalingon diha sa tawhanong unod, mao usab ang binhi sa serpente nga sa literal mao ang paagi nga nakaplagan ni Satanas nga nahimo niyang ablihan ang pultahan para maisal-ot niya ang iyang kaugalingon ngadto sa tawo. Imposibli kadto para kang Satanas (kay usa ra siya ka GILALANG nga personang-espiritu) nga ipaliwat ang iyang kaugalingon sa pamaagi nga gipahimugso sa Dios ang Iyang Kaugalingon, busa ginaingon sa saysay diha sa Genesis kung giunsa niya kaniadto pagpatungha sa iyang binhi ug pagsal-ot o pagpasulod sa iyang kaugalingon ngadto sa kaliwatan sa tawo. Dumdumon ninyo usab nga si Satanas gitawag kaniadto nga “serpente.” Iya kining binhi o ang pagsal-ot niini ngadto sa kaliwatan sa tawo ang maoy atong ginahisgotan.

Sa wala pa nagkaaduna niadto si Adan og lawasnon nga pag-ila kang Eva, aduna na niadto ang serpente og niana nga pag-ila una kaniya. Ug kadtong natawo gikan niana mao si Cain. Si Cain iya sa (natawo sa, nga anak sa) nianang “Maong Dautan,”

I Juan 3:12

…Ang kamatuoran niini mao nga nagkaaduna si Eva sulod sa iyang tagoangkan og DUHA ka anak nga lalaki (nga kaluha) gikan sa MAGKALAHI nga mga pagmabdos. Nagdala siya kaniadto og mga kaluha, nga ang pagsamkon kang Cain nag-una kay sa kang Abel.

Mga Pakisayran Niini

Genesis 3:6-7

Ug sa nakita sa babaye nga ang kahoy maayo nga kan-on, ug nga kini makalipay sa mga mata, ug nga ang kahoy takus tinguhaon aron makapahimong makinaadmanon sa tawo, mikuha siya sa bunga niini, ug mikaon, ug gihatagan usab niya ang iyang bana kauban niya; ug mikaon siya.

Ug nangabuka ang mga mata nilanag duha, ug sila nanghibalo nga sila mga hubo; ug nanagtahi sila sa mga dahon sa higuera, ug nanagbuhat og mga tapis alang sa ilang kaugalingon.

[Unsaon man nila pagkahibalo nga sila hubo gikan sa pagkaon og usa ka prutas?]

Genesis 3:13-15

Ug ang GINOONG Dios nag-ingon sa babaye, Unsa kining imong gibuhat? Ug nag-ingon ang babaye, Ang bitin naglimbong kanako, ug mikaon ako.

Ug ang GINOONG Dios nag-ingon sa bitin, Tungod kay ikaw nagbuhat niini, tinunglo ikaw labi pa kay sa tanan nga mga kahayopan, ug labaw sa tanan nga mga mananap sa kapatagan; sa imong tiyan magakamang ka, ug magakaon ikaw sa abog sa tanan nga mga adlaw sa imong kinabuhi:

Ug ibutang ko ang panagkaaway sa taliwala mo ug sa babaye, ug sa taliwala sa imong kaliwat ug sa iyang kaliwat; siya magasamad sa imong ulo, ug ikaw magasamad sa iyang tikod.

[Aduna gyu’y kaliwat ang serpente. Tin-aw nga, dili kini nagapahinungod sa usa ka halas.]

Genesis 3:20

Ug gitawag ni Adan ang ngalan sa iyang asawa nga Eva; tungod kay siya mao ang inahan sa ngatanan nga adunay kinabuhi.

[Nganong wala man gitawag si Adan ingon nga amahan sa ngatanan nga adunay kinabuhi?]

Genesis 4:1-2

Ug giila ni Adan si Eva nga iyang asawa; ug kini nanamkon, ug nag-anak kang Cain, ug miingon, Nakabaton ako og usa ka lalaki tungod sa panabang sa GINOO.

Ug unya usab nag-anak siya kang Abel nga iyang igsoon. Ug si Abel magbalantay sa mga carnero, apan si Cain mag-uuma sa yuta.

[Ang tanang kinabuhi nagagikan sa Dios, natawo man kini nga lehitimo o ilehitimo. Dili arang nga makalalang og kinabuhi si Satanas.]

Lucas 3:38

Nga anak ni Enos, nga anak ni Set, nga anak ni Adan, nga anak sa Dios.

[Asa na man diay ang panganay nga si Cain diha sa kaliwatan ni Adan?]

I Juan 3:12

Ug dili manginsama kang Cain, nga iya sa dautan, ug nga nagpatay sa iyang igsoon. Ug nganong gipatay man niya siya? Tungod kay dautan man ang iyang kaugalingon nga binuhatan, ug matarung man ang sa iyang igsoon.

[Gibuhat sa Dios si Adan diha sa kaugalingon niyang dagway. Asa man nagagikan ang kadautan ni Cain, ug asa man nagagikan ang kamatarung ni Abel? gipanunod lang nila ang ilang mga kinaiyahan gikan sa ilang mga amahan.]

Judas 1:14

Labot pa usab si Enoc, ang ikapito gikan kang Adan, mitagna mahatungod niini kanila, nga miingon, Ania karon, nagaabot ang Ginoo uban sa iyang mga dagkung panon sa iyang mga balaan,

[Wala ni usa ka dapit sa Biblia nga si Cain makita diha sa kaliwatan ni Adan.]