Salmo 96:13
Sa atubangan sa GINOO: kay moabot na siya, kay siya moanhi sa paghukom sa yuta: pagahukman niya ang kalibutan uban ang pagkamatarung, ug ang katawohan uban ang iyang kamatuoran.
Adunay linibo ka nagkalainlaing mga denominasyon sa kalibutan karon. Ginakondena sa matag usa ka relihiyon ang uban niini, apan bisan pa niana silang tanan nagasaad og kaluwasan pinaagi sa ilang denominasyon. Unsaon man nato pagkahibalo kon hain sa mga niini ang pilion?
Kon pilion nato ang iglesiang Katoliko, kung ingon-ana ginadawat nato ang pagpangamuyo ngadto sa mga santo, nga walay lain kondili pag-ampo ngadto sa mga diosdios. Nagaingon ang Biblia, “Kay adunay usa ra ka Dios, ug adunay usa ra ka tigpataliwala sa Dios ug sa mga tawo, nga mao ang tawo nga si Cristo Jesus;” (I Tim 2:5). Ginatawag ang pari nga “Father” nga gidili ni Jesus diha sa Mat 23:9: “Ug dili kamo magtawag bisan kinsang tawo nga amahan ninyo sa ibabaw sa yuta: kay usa lamang ang inyong Amahan, ang atua sa langit.” Ginasulti kanato sa Assemblies Of God nga ang pagsulti kono diha sa laing mga dila mao ang labing unang ebidensiya sa Espiritu Santo, sa dihang nag-ingon si Pablo, “Kon ako tigpanulti’g mga dila sa mga tawo ug sa mga manolunda, apan walay gugma, ako usa lamang ka masaba nga agong, o piyangpiyang nga nagatagingting.” (I Mga Taga-Cor 13:1)
Gilayon nga isulti kanato sa halos tanang mga denominasyon nga daghang mga butang diha sa Biblia ang gi-interpretar og sayup, nangawala diha sa paghubad, o dili na magamit sa pangkaron nga kalibutan. Busa, angay ba natong toohan ang Biblia o ang mga denominasyonhong doktrina? Unsa ma’y gamiton sa Dios ingon nga usa ka sukaranan sa paghukom?
Kon pangutan-on ko ang mga Katoliko dinhi karong gabhiona, “Unsa man sa hunahuna ninyo ang pagagamiton sa Dios nga panghukom sa kalibutan?” Moingon ang mga Katoliko, “Pinaagi sa Simbahang Katoliko.” Sige, unsa man nga Simbahang Katoliko? Karon aduna na sila og Romano, Greek Orthodox, ug daghan pa kanila. Hain kaha kini nga Simbahang Katoliko? Moingon ang mga Lutheran, “Pinaagi lang kanamo,” kung ingon-ana wala na kamong mga Baptist. Ug dayon kung moingon kita, “Pinaagi lamang sa Baptist,” kung ingon-ana wala na kamong mga Pentecostal. Mao nga magkaaduna og dakung kalibog, walay mahibalo kung unsa ang buhaton; busa wala gayud Siya misaad nga hukman ang kalibutan pinaagi sa iglesia.
Misaad Siya nga hukman ang kalibutan pinaagi ni Cristo, ug si Cristo mao ang Pulong. Ug ang Biblia ang maoy magahukom sa kalibutan, nga mao si Jesus Cristo ang mao sa gihapon kagahapon, karon, ug hangtud sa kahangturan.
Mga Pakisayran Niini
Juan 1:1
Sa sinugdan mao ang Pulong, ug ang Pulong kauban sa Dios, ug ang Pulong mao ang Dios.
Juan 1:14
Ug ang Pulong nahimong unod, ug nagpuyo ipon kanato (ug atong nakita ang iyang himaya, himaya ingon nga sa bugtong anak gikan sa Amahan,) puno sa grasya ug sa kamatuoran.
Juan 5:22
Kay ang Amahan dili magahukom kang bisan kinsa, hinonoa ang tanang paghukom gitugyan niya ngadto sa Anak:
Juan 12:48
Ang nagasalikway kanako, ug wala modawat sa akong mga pulong, may magahukom kaniya: ang pulong nga akong giingon, maoy magahukom kaniya sa katapusan nga adlaw.
Mga Taga-Efeso 1:5-7
Sa iyang gipili kita nga daan aron mahimong inangkon nga mga anak pinaagi kang Jesus Cristo ngadto sa iyang kaugalingon, sumala sa kahimut-an sa iyang kabubut-on,
Alang sa pagdayeg sa himaya sa iyang grasya, nga sa-walay-bayad gihatag niya kanato diha sa hinigugma.
Nga kaniya anaa ang atong katubsanan pinaagi sa iyang dugo, ang pasaylo sa atong mga paglapas, sumala sa pagkadato sa iyang grasya;
Mga Taga-Efeso 2:5-8
Bisan sa mga patay kita tungod sa atong mga kasal-anan, nagbuhi siya kanato uban kang Cristo, (pinaagi sa grasya nangaluwas kamo;)
Ug gibanhaw kita uban kaniya, ug gipalingkod kita uban kaniya sa mga langitnong dapit diha kang Cristo Jesus:
Aron nga sa mga katuigan nga umalabot makapahayag siya sa labaw gayud nga kadato sa iyang grasya sa kaayo nga alang kanato diha kang Cristo Jesus.
Kay tungod sa grasya kamo nangaluwas pinaagi sa pagtoo; ug kini dili sa inyong kaugalingong kahimoan: kini hatag sa Dios:
I Juan 1:7
Apan kung magalakaw kita diha sa kahayag, maingon nga siya anaa sa kahayag, may kaambitan kita sa usa ug usa, ug ang dugo ni Jesus Cristo nga iyang Anak nagahinlo kanato gikan sa tanang sala.
Pinadayag 22:18-19
Ako nagapamatuod sa tanan nga managpatalinghug sa mga pulong sa propesiya niining basahona, Kon adunay magadugang niini og bisan unsa, kaniya igadugang sa Dios ang mga hampak nga gihisgutan niining basahona:
Ug kon adunay magataktak og mga pulong gikan sa mga pulong sa basahon niining propesiya, pagataktakon sa Dios ang iyang bahin diha sa libro sa kinabuhi, ug diha sa balaang siyudad, ug sa mga butang nga nahasulat dinhi niining basahona.