Tin-aw nga, ang bautismo importante kaayo, apan mahinungdanon ba kung giunsa kita sa pagbautismo? Aduna ba’y hustong bautismo, o okey na ang bisan unsa na lang? Kung nagatoo ka sa Biblia, kung ingon-ana OO, aduna gyu’y hustong bautismo.
Kadaghanan sa mga kaiglesiahan nagabautismo sa Ngalan sa Amahan, Anak, ug Espiritu Santo, apan dili kini husto sumala sa Biblia.
Diha sa Mga Buhat 19, adunay mga tawo nga nanagtoo na kang Jesus Cristo, apan wala pa nadawat ang Espiritu Santo ngadto sa ilang mga kasingkasing. Kabalo ang apostol nga si Pablo kaniadto sa hustong paagi aron madawat ang Espiritu Santo, busa iya silang gipangutana, “Ngadto ba diay sa unsa ang pagbautismo kaninyo?” Ug miingon sila, “Ngadto sa bautismo ni Juan.” (Mga Buhat 19:3) Nakita ni Pablo nga wala sila nabautismohan sumala kaniadto sa sugo ni Pedro diha sa Mga Buhat 2:38, busa gisugo niya sila nga magpabautismo pag-usab sa Ngalan ni Ginoong Jesus. Dayon, ingon sa gisaad na, nadawat nila ang Espiritu Santo.
Busa, ngano nga nagpangbautismo man ang mga tinun-an kaniadto sa Ngalan ni Jesus sa dihang si Jesus, Mismo, ang miingon kanila nga magbautismo sa Ngalan (dili sa “mga ngalan”) sa Amahan, ug sa Anak, ug sa Espiritu Santo? (Matt 28:19) Nangasayup ba sila? Wala! Ilang gibuhat sa eksakto kung unsa ang gisugo kanila.
Samtang ginabasa mo kini nga artikulo, hunahunaa ang imong ngalan. Usa ba ikaw ka anak? Ang ngalan mo ba, “Anak”? Usa ba ikaw ka inahan? Ang ngalan mo ba, “Inahan”? Siyempre dili, mga titulo lang kana. Aduna ka’y tinuod nga ngalan, ug mao usab ang Dios.
Ania ang tubag:
Ug walay ingon-anang butang sa Biblia sama sa kang kinsa man nga nabautismohan sa ngalan sa Amahan, Anak, Espiritu Santo; tungod kay wala og ingon nianang butang. Ang Amahan dili ngalan; ug ang Anak dili ngalan; ug ang Espiritu Santo dili ngalan; apan ang Ngalan sa Amahan, Anak, Espiritu Santo mao ang Ginoong Jesus Cristo.
Si Jesus Cristo mao ang Dios! Siya mao ang Amahan, ang Anak, ug ang Espiritu Santo.
Kung ginapangita mo ang Espiritu Santo ug nagahunahuna kon ngano nga wala pa kini gihatag sa Ginoo kanimo, kung ingon-ana mahimo nga gusto mong ipangutana sa imong kaugalingon ang mao usab nga pangutana nga gipangutana kaniadto ni Pablo, “Ngadto ba diay sa unsa ang pagbautismo kanimo?”
Mga Pakisayran Niini
Mateo 28:19
Busa panglakaw kamo, ug himoa ninyong mga tinun-an ang tanang kanasuran, sa pagpamautismo kanila sa ngalan sa Amahan, ug sa Anak, ug sa Espiritu Santo:
[Unsa man ang ngalan sa Amahan? Ang ngalan sa Anak? Ang ngalan sa Espiritu Santo?]
Marcos 16:16
Ang nagatoo ug ang magpabautismo maluwas, apan ang dili nagatoo pagahukman sa silot.
Juan 5:43
Ako mianhi sa ngalan sa akong Amahan, ug kamo wala modawat kanako: kung lain ang moanhi sa iyang kaugalingon nga ngalan, siya pagadawaton ninyo.
[Kung siya mianhi sa ngalan sa Amahan, kung ingon-ana unsay Iyang ngalan?]
Juan 10:30
Ako ug ang Amahan usa ra.
Juan 12:45
Ug ang makakita kanako makakita sa nagsugo kanako.
Juan 14:8-9
Si Felipe miingon kaniya, Ginoo, ipakita kanamo ang Amahan, ug igo na kana kanamo.
Si Jesus miingon kaniya, Kadugay na nga ania ako uban kaninyo, ug wala ka pa diay makaila kanako, Felipe? ang nakakita kanako nakakita sa Amahan; ug naunsa bang miingon man ikaw, Ipakita kanamo ang Amahan?
Juan 20:27-28
Unya miingon siya kang Tomas, Iabut ngari ang imong tudlo, ug tan-awa ang akong mga kamot; ug iabut ngari ang imong kamot, ug ihinol kini sa akong kilid: ug dili ka magmaduhaduhaon, kondili magmatinoohon.
Ug si Tomas mitubag ug miingon kaniya, Ginoo ko ug Dios ko.
Mga Buhat 2:38-39
Ug si Pedro miingon kanila, Maghinulsol kamo, ug managpabautismo ang tagsatagsa kaninyo sa ngalan ni Jesus Cristo alang sa pagpasaylo sa mga sala, ug madawat ninyo ang gasa nga Espiritu Santo.
Kay ang saad alang kaninyo, ug sa inyong mga anak, ug sa tanan nga atua sa halayo, bisan ang kapid-an nga pagatawgon sa atong Ginoong Dios.
Mga Buhat 4:12
Ug walay kaluwasan pinaagi kang bisan kinsa pa nga lain: kay walay bisan unsa pang lain nga ngalan sa silong sa langit nga gikahatag ngadto sa mga tawo, nga pinaagi niini maluwas kita.
Mga Buhat 8:12
Apan sa diha nga nagpanoo na sila kang Felipe sa pagmantala niya sa Maayong Balita mahitungod sa gingharian sa Dios, ug sa ngalan ni Jesus Cristo, nanagpabautismo sila, nga mga lalaki ug mga babaye.
Mga Buhat 19:3-6
Ug siya nangutana kanila, Ngadto ba diay sa unsa ang pagbautismo kaninyo? Ug sila nanag-ingon, Ngadto sa bautismo ni Juan.
Ug si Pablo miingon, Si Juan nagbautismo sa bautismo sa paghinulsol, nga nag-agda sa katawhan, nga managtoo sila sa moabot sa ulahi niya, sa ato pa, kang Cristo Jesus.
Ug sa ilang pagkadungog niini, sila gipangbautismohan sa ngalan sa Ginoong Jesus.
Ug sa napandongan na sila ni Pablo sa iyang mga kamot, ang Espiritu Santo mikunsad kanila; ug sila nanagpanulti sa laing mga pinulongan, ug nanaghimo’g mga propesiya.
Mga Taga-Efeso 4:5
Usa ka Ginoo, usa ka pagtoo, usa ka bautismo,
Mga Taga-Colosas 3:17
Ug bisan unsay inyong pagabuhaton sa pulong o sa buhat, buhata ang tanan sa ngalan sa Ginoong Jesus, nga nagahatag og pagpasalamat ngadto sa Dios nga Amahan pinaagi kaniya.
I Juan 5:7
Kay adunay tulo nga nagapamatuod sa langit, ang Amahan, ang Pulong, ug ang Espiritu Santo: ug kining tulo usa ra.